ក្រុមហាម៉ាសព្រមានថា ចំណាប់ខ្មាំង នឹងគ្មានជីវិតចេញពីតំបន់ហ្គាហ្សា ឡើយ

កាលពីថ្ងៃអាទិត្យទី១០ខែធ្នូ ក្រុមហាម៉ាសបានព្រមានថា គ្មានចំណាប់ខ្មាំងណាម្នាក់នឹងមានជីវិតចាកចេញពីតំបន់ហ្គាហ្សាឡើយ លុះត្រាតែភាគីអ៊ីស្រាអែល ធ្វើតាមការទាមទាររបស់ខ្លួន។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

នៅក្នុងសេចក្តីថ្លែងការណ៍តាមទូរទស្សន៍ អ្នកនាំពាក្យក្រុមហាម៉ាសនិយាយថា អ៊ីស្រាអែលនឹងមិនទទួលបានអ្នកទោសរបស់ពួកគេទាំងនៅរស់ឡើយ បើគ្មានការដោះដូរនិងការចរចាដើម្បីបំពេញតាមលក្ខខណ្ឌ។

តាមការបញ្ជាក់ពីអ៊ីស្រាអែល, នៅតែមានចំណាប់ខ្មាំង១៣៧នាក់ទៀត កំពុងឃុំឃាំងក្នុងតំបន់ហ្គាហ្សា ខណៈក្រុមសកម្មជននិយាយថា ជនជាតិប៉ាឡេស្ទីនប្រហែល៧០០០នាក់ កំពុងស្ថិតនៅក្នុងគុកអ៊ីស្រាអែល។

ក្រុមហាម៉ាស បានបង្កជម្លោះថ្មីជាមួយនឹងការវាយប្រហារដ៏សាហាវបំផុតលើអ៊ីស្រាអែលកាលពីថ្ងៃទី៧ខែតុលា ដោយពេលនោះបានសម្លាប់មនុស្សប្រហែល១២០០នាក់ ហើយចាប់ចំណាប់ខ្មាំងប្រហែល២៤០នាក់ ទៅតំបន់ហ្គាហ្សា។

អ៊ីស្រាអែល ​បាន​ឆ្លើយតប​ជាមួយការវាយប្រហារមិនប្រណីដៃ ធ្វើឲ្យជ្រោយហ្គាហ្សាត្រូវខ្ទេចខ្ទីនិង​​សម្លាប់​មនុស្ស​យ៉ាងតិច ១៧៩៩៧នាក់ ​ភាគច្រើន​ជា​ស្ត្រីនិង​កុមារ។

ថ្វីបើអង្គការផ្តល់ជំនួយនានាព្រមានថា ទឹកដីនេះកំពុងស្ថិតនៅលើមាត់ជ្រោះនៃជំងឺឆ្លងនិងភាពអត់ឃ្លានក៏ដោយ ប៉ុន្តែប្រមុខអង្គការសហប្រជាជាតិ ហាក់ដូចមិនចេញសកម្មភាពណាមួយគួរឲ្យកត់សម្គាល់សោះ ជាមួយក្រុមប្រឹក្សាសន្តិសុខ លើការបង្កើតបទឈប់បាញ់។

ប្រមុខ UN លោក Tedros Adhanom Ghebreyesus និយាយថា “ប្រព័ន្ធសុខាភិបាលរបស់ ហ្គាហ្សា ជិតដួលរលំហើយ ដោយមានតែមន្ទីរពេទ្យចំនួន១៤ប៉ុណ្ណោះក្នុងចំណោមមន្ទីរពេទ្យ៣៦ ដែលអាចដំណើរការបាន”។

UN ប៉ាន់ប្រមាណថា ប្រជាជន១.៩លាននាក់ក្នុងចំណោម២.៤លាននាក់នៅហ្គាហ្សា ត្រូវផ្លាស់ទីលំនៅ ដោយប្រហែលពាក់កណ្តាលនៃពួកគេគឺជាកុមារ៕

ប្រែសម្រួល៖ Vann Vann

ប្រភព៖ CNA

ចុចអាន៖ សមាជិកណាតូមួយប្រទេស បន្ទោសអាមេរិក ចំពោះការរារាំងដំណោះស្រាយសន្តិភាពនៅ ហ្គាហ្សា