លោក Netanyahu ទុក២ជម្រើស ឲ្យក្រុមហាម៉ាស

នាយករដ្ឋមន្ត្រីអ៊ីស្រាអែល លោក Benjamin Netanyahu បានប្តេជ្ញាប្រយុទ្ធជាមួយក្រុមហាម៉ាសមិនដកដៃ រហូតដល់ចលនាប៉ាឡេស្ទីនមួយនេះបាត់សូន្យពីផែនដី ហើយតំបន់ហ្គាហ្សាលែងរងការគំរាមកំហែងបន្តទៀត ប៉ុន្តែលោកក៏បានឲ្យជម្រើស២ទៅក្រុមហាម៉ាសផងដែរ នោះគឺ ជម្រើសទី១ ពួកគេត្រូវតែចុះចាញ់ ហើយបើពួកគេនៅតែរឹងទទឹង ជម្រើសទី២ គឺពួកគេត្រូវស្លាប់។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ការអត្ថាធិប្បាយរបស់លោកកើតឡើង បន្ទាប់ពីក្រុមហាម៉ាស ច្រានចោលសំណើផ្អាកបាញ់មនុស្សធម៌ថ្មីរយៈពេល ៤០ ថ្ងៃដែលដាក់ដោយទីក្រុងហ្ស៊េរុយសាឡិម ជាថ្នូរនឹងការដោះលែងចំណាប់ខ្មាំងអ៊ីស្រាអែល ៤០ នាក់។

ក្នុងសារជាវីដេអូបង្ហោះលើបណ្តាញសង្គម X, លោក Netanyahu បញ្ជាក់ច្បាស់ៗថា “យើង​តស៊ូ​រហូត​ដល់​ទទួល​បាន​ជ័យ​ជម្នះ! សង្គ្រាមនេះគ្មានថ្ងៃចប់ទេ លុះត្រាយើងសម្រេចបានគោលដៅទាំងអស់។ យើងត្រូវកម្ចាត់ក្រុមហាម៉ាសឲ្យរលាយក្លាយជាផេះផង់ និងរំដោះចំណាប់ខ្មាំងរបស់យើងទាំងអស់មកវិញ។ ជម្រើស​ដែល​ខ្ញុំ​ស្នើ​ទៅហាម៉ាស គឺ​សាមញ្ញបំផុត៖ ចុះ​ចាញ់ ឬ​ស្លាប់”។ លោកបន្ថែមថា បន្ទាប់ពីលុបបំបាត់ក្រុមហាម៉ាស អ៊ីស្រាអែលនឹងធានាថា តំបន់ហ្គាហ្សានឹងមិនបង្កការគំរាមកំហែងទៀតទេ ហើយអ្នកដែលគិតថាយើងនឹងបញ្ឈប់ គឺគិតខុសហើយ។

តាមសេចក្តីរាយការណ៍ សារនេះហាក់ដូចជាថតនៅល្ងាចថ្ងៃពុធ បន្ទាប់ពីកិច្ចពិភាក្សាស្តីពីបទឈប់បាញ់មួយ ត្រូវបរាជ័យ។

ដោយដកស្រង់ប្រភពមិនបញ្ចេញឈ្មោះ កាសែត Wall Street Journal រាយការណ៍ថា អ៊ីស្រាអែលស្នើបញ្ឈប់ប្រតិបត្តិការយោធា រយៈពេលមួយសប្តាហ៍ ជាថ្នូរនឹងការដោះលែងចំណាប់ខ្មាំង និងអនុញ្ញាតឲ្យមានជំនួយមនុស្សធម៌បន្ថែមទៀត ចូលទៅក្នុងតំបន់ប៉ាឡេស្ទីន។ ទោះជាយ៉ាងណាក៏ដោយ ក្រុមហាម៉ាសបានច្រានចោលសំណើនេះ ហើយទទូចថា កិច្ចពិភាក្សាណាមួយអាចកើតឡើងបាន លុះត្រាអ៊ីស្រាអែល បញ្ឈប់ការវាយលុករបស់ខ្លួន នៅហ្គាហ្សាជាមុនសិន។

គួរបញ្ជាក់ថា ក្រុមសកម្មប្រយុទ្ធប៉ាឡេស្ទីន បានចាប់ចំណាប់ខ្មាំងអ៊ីស្រាអែលប្រមាណ២៤០នាក់ ក្នុងអំឡុងការលុកលុយរបស់ខ្លួនកាលពីថ្ងៃទី៧ខែតុលា ដែលឆក់យកជីវិតមនុស្សប្រមាណ១២០០នាក់។

ក្រោយចំណាប់ខ្មាំងមួយចំនួន ត្រូវបានដោះដូរក្នុងអំឡុងបទឈប់បាញ់រយៈពេលមួយសប្តាហ៍កាលពីចុងខែវិច្ឆិកា មកទល់ពេលនេះនៅសល់ចំណាប់ខ្មាំងប្រហែល១២០នាក់ទៀត កំពុងស្ថិតក្នុងដៃក្រុមហាម៉ាស៕

ប្រែសម្រួល៖ Vann Vann

ប្រភព៖ RT

ចុចអាន៖ តួលេខមនុស្សស្លាប់នៅហ្គាហ្សា កើនដល់ ២០០០០នាក់