សម្ដេចតេជោ ឧបត្ថម្ភជីដូនម្នាក់១ខែ៥០ម៉ឺនរៀល ដើម្បីកុំឱ្យបន្តលក់សណ្ដែកដីទាំងវ័យជរា

សម្ដេចតេជោ ហ៊ុន សែន បានឧបត្ថម្ភទឹកប្រាក់ចំនួន ៥០ម៉ឺនរៀលក្នុងមួយខែជូនដល់ជីដូនជរាម្នាក់ ដើម្បីជួយសម្រួលជីវភាពរស់នៅប្រចាំថ្ងៃ និងមិនឱ្យជីដូនម្នាក់នោះបន្តលក់សណ្ដែកដីទាំងវ័យជរាតទៅទៀត។ នេះបើតាមសំណេរនៅលើប្រព័ន្ធតេឡេក្រាមរបស់សម្ដេចតេជោ។

សម្ដេចតេជោបានសរសេរដូច្នេះថា “ថ្ងៃនេះតាមរយៈលោក សេង ទៀង ខ្ញុំឱ្យរកលោកយាយលក់សណ្តែកដី
ស្ងោ ដែលមានព្រះជន្ម៨៧ឆ្នាំ។គាត់ចេញពីខេត្តតាកែវមកលក់នៅភ្នំពេញមកព្រឹកត្រឡប់ទៅវិញពេលល្ងាច។
ខ្ញុំសំណូមពរឱ្យគាត់ឈប់លក់សណ្តែកដីដែលធ្វើដំណើរផ្លូវឆ្ងាយដោយជំនួសវិញនូវការផ្តល់ថវិការបស់ខ្ញុំ៥០មុឺនរៀលក្នុងមួយខែ”។

ថ្វីត្បិតតែទឹកប្រាក់ដែលសម្ដេចតេជោឧបត្ថម្ភប្រចាំខែហាក់មិនសូវច្រើន តែសម្ដេចតេជោបានអះអាងថា “ទឹកប្រាក់នេះមានចំនួនច្រើនជាងប្រាក់ដែលគាត់លក់បាន ៥ពាន់ទៅ១មុឺនរៀលក្នុងមួយថ្ងៃ”។

ក្រៅពីការឧបត្ថម្ភទឹកប្រាក់ជាប្រចាំថ្ងៃ សម្ដេចតេជោ ហ៊ុន សែន តាមរយៈលោក សេង ទៀង នៅថ្ងៃទី០២ ខែមករាឆ្នាំ ២០២៤នេះ ក៏បានផ្តល់ថវិកាជូនលោកយាយចំនួន២លានរៀលផងដែរ៕