ផ្ដើមពីការលេងជាមួយបងស្រី តារាឆ្នើម Nishida ក្លាយជាកីឡាករបាល់ទះអាជីពដ៏ជោគជ័យ

Yuji Nishida ចាប់ផ្តើមលេងបាល់ទះតាំងពីថ្នាក់បឋមសិក្សា ដោយសារ​សមត្ថភាពដ៏អស្ចារ្យ និងសមិទ្ធផល​សម្រេច​បាន​នៅសាលា​រៀន​ បានរុញច្រានឲ្យកីឡាករបាល់ទះវ័យ២៣ឆ្នាំជាប់​ក្នុង​ក្រុមជម្រើសជាតិជប៉ុន។

កើតថ្ងៃទី៣០ ខែមករា ឆ្នាំ២០០០ កីឡាករ​កម្ពស់​១.៩២​ម៉ែត្រ​​​ជា​តារា​ឆ្នើម​​ជំនាញដៃឆ្វេង​​ក្នុង​ក្រុម​ជម្រើស​ជាតិ​ជប៉ុន និង​ក្លិប​អាជីព​ Panasonic Panthers។

កាល​ពី​កុមារភាព​​ រូបគេបាន​លេងបាល់ទះ​ជាមួយបងស្រី និងបងប្រុសរបស់​ខ្លួន។ ពេលនោះ រូប​គេ​​បានចូលរួម​ជា​មួយ​ក្រុម Daian Beetles របស់​បង​ប្រុស។ ថ្នាក់​ទី​៤ បឋមសិក្សា រូបគេបានសម្រេចគោលដៅដ៏ធំ​មួយ​​គឺ​​ការឈ្នះ​ជើង​ឯកព្រឹត្តិការណ៍​បាល់ទះ​ជប៉ុន​ដើម្បី​ទាំង​អស់​គ្នា លើក​ទី​២៩ នៅ​ខេត្ត Mei។ នៅ​ថ្នាក់​ទី​៦ ​បឋមសិក្សា រូប​គេ​បាន​ក្លាយ​ជា​ប្រធាន​ក្រុម និង​បាន​ដឹកនាំ​ក្រុម​ឈ្នះ​ពាន President’s Cup កម្រិត​ក្លិប​បាល់ទះ​ខេត្ត​ Mei។

ក្រោយ​ពី​បញ្ចប់​​ថ្នាក់បឋមសិក្សា Nishida បានចូលរៀន​នៅ​អនុវិទ្យាល័យ​មួយ​ក្នុង​ស្រុក និង​មានឱកាសចូលរួមក្នុងការហ្វឹកហាត់ជាមួយក្លិបបាល់ទះ Kaisei នៅទីក្រុង Yokkaichi ខេត្ត Mie។ ដោយសារការបង្ហាញសមត្ថភាពដ៏លេចធ្លោនៅទីនោះបានធ្វើឲ្យពីលោក Masanobu Onishi ដែលជាអ្នកគ្រប់គ្រងក្រុមបាល់ទះ និងលោក Katsunari Fujita ជាប្រធានក្រុម​បាន​ចាប់​អារម្មណ៍​លើរូបគេ។

នៅខែមិថុនាឆ្នាំដដែល Nishida បានចូលរួមជាមួយក្រុមក្លិបវិទ្យាល័យ NFO Ocean Star ដែលត្រូវបានណែនាំដោយលោក Fujita។ នៅខែមីនា ឆ្នាំ២០១៣ រូប​គេ​ត្រូវបានជ្រើសរើស​ចូល​រួម​ក្នុង​ក្រុម​យុវជន​​អាយុ​១៤​ឆ្នាំ​របស់​ស្រុក Hokusei នៃខេត្ត Mie។ នៅខែសីហា ឆ្នាំដដែលរូបគេត្រូវជាប់ឈ្មោះក្នុងក្រុមថ្នាក់ខេត្ត និងបានប្រកួតប្រជែងជាមួយក្រុមមកពីទូទាំងប្រទេសជប៉ុនក្នុងពានរង្វាន់ Junior Olympic Cup។

ក្រោយមក Nishida បានចូលរួមជាមួយ U-19 ដែលជាក្រុមទើបបង្កើតថ្មី​នៅ​ស្រុក Veertian។ នៅ​ខែមិថុនា ក្រុមពួកគេបានឈ្នះពានរង្វាន់យុវជន U-19 របស់​ខេត្ត Mie និង​ខែកញ្ញា បន្ដឈ្នះជើងឯកថ្នាក់ជាតិ​កម្រិត​យុវជន​​ទៀត។ រូបគេក៏បានទទួលពានរង្វាន់ Japan Young Club Volleyball Federation ជាកីឡាករឆ្នើមក្នុងការប្រកួតនោះ។

ដល់ខែមីនា ឆ្នាំ២០១៧ កីឡាករ Nishida ជាប់ឈ្មោះក្នុងក្រុមបាល់ទះជម្រើសជាតិ​ជប៉ុន​អាយុក្រោម១៩ឆ្នាំ​ដើម្បី​ប្រកួត​ជើង​ឯក​អាស៊ី​អាយុ​ក្រោម​១៩​​ឆ្នាំ (Asian Boys U19)។ នៅខែតុលា ឆ្នាំ២០១៧ រូបគេបានចូលរួមក្លិប JTEKT Stings។ Nishida បានទទួលពាន​ Rookie ប្រចាំ​ឆ្នាំ​ក្នុងព្រឹត្តិការណ៍ Kurowashiki។

Yuji Nishida ត្រូវបានកោះហៅឱ្យចូល​ជម្រើសជាតិ​ជប៉ុន​ក្រុមធំលើកដំបូងក្នុងខែមេសា នៅ​ពេល​មាន​អាយុ១៨ឆ្នាំ។ រូបគេបានបង្ហាញខ្លួនជាមួយជម្រើសជាតិនៅថ្ងៃទី២៥ ខែឧសភា ឆ្នាំ២០១៨ ក្នុងការប្រកួត Nations League លើកដំបូងនៅទីក្រុង Rouen ប្រទេសបារាំង។ បន្ទាប់មកនៅខែកញ្ញា រូប​គេ​បានចូលរួមប្រកួតក្នុងព្រឹត្តិការណ៍ពិភព​លោក​ FIVB Volleyball Men’s World Championship ឆ្នាំ២០១៨ ​នៅ​ប្រទេសអុីតាលី និងប៊ុលហ្គារី។ នៅក្នុងពានរង្វាន់ V.League រដូវកាលឆ្នាំ២០១៨-១៩ កីឡាករ Nishida និងកីឡាករ Issei Otake មកពី Panasonic Panthers បានឈ្នះពានរង្វាន់ជាកីឡាករចំណូលថ្មីល្អបំផុតដូចគ្នា។

នៅខែតុលាបន្ទាប់ ព្រឹត្តិការណ៍ FIVB Volleyball Men’s World Cup ឆ្នាំ២០១៩ ត្រូវបានធ្វើឡើងនៅប្រទេសជប៉ុន។ Yuji Nishida បានឈ្នះ​រង្វាន់ជាអ្នកវាយសេវ៉ាល្អបំផុត និងជាស្មាត់ដែលល្អបំផុត ជាមួយការបង្ហាញទម្រង់ដ៏គួរឲ្យចាប់អារម្មណ៍។

រូបគេបានបន្តជួយក្រុម JTEKT Stings ឈ្នះពានរង្វាន់ V.League ជាលើកដំបូងរបស់ពួកគេ។ នៅខែធ្នូ ឆ្នាំ២០២០ Nishida បានបន្តជួយឲ្យក្រុមមួយនេះ​ឈ្នះ​ជើងឯក​ Emperor’s Cup និង Empress’ Cup All Japan Volleyball Championship បន្ទាប់ពីយកឈ្នះ Panasonic Panthers ក្នុងលទ្ធផល ៣-១។

រូប​គេ​បាន​ជួយ​ក្រុម​បាល់ទះ​ជម្រើស​ជាតិ​ជប៉ុន​ឈ្នះមេដាយ​មាសទ្វីប​អាស៊ី ឆ្នាំ​២០២៣ និង​ឈ្នះ​មេដាយ​សំរិទ្ធ​ឆ្នាំ​២០១៩។៕

អត្ថបទ៖ ផា រតនា