បក្សលោក Pita ប្រឈមហានិភ័យរំលាយចោល ក្រោយចាញ់ក្ដីនៅតុលាការ

គណបក្សចលនាឆ្ពោះទៅមុខ​ដឹកនាំដោយលោក​ Pita Limjaroenrat ដែល​ទទួល​បាន​សំឡេង​ច្រើន​ជាង​គេ​ក្នុង​ការ​បោះ​ឆ្នោត​សកលកាល​ពី​ឆ្នាំ​មុន ប្រឈមនឹងហានិភ័យ​រំលាយចោល ​បន្ទាប់​ពី​តុលាការ​រកឃើញថា គណបក្សមួយនេះបានបំពានរដ្ឋធម្មនុញ្ញ​ ពាក់ព័ន្ធទៅនឹងច្បាប់ប្រមាថព្រះមហាក្សត្រថៃ ។ ​នេះបើយោងតាមចេញផ្សាយរបស់សារព័ត៌មាន BBC កាលពីថ្ងៃទី៣១ ​ខែមករាកន្លងទៅ ។

ប្រធានគណបក្សលោក Pita Limjaroenrat ដែលជាអ្នកនយោបាយវ័យក្មេងមានការអប់រំនៅសាកលវិទ្យាល័យ Harvard មានរឿងចម្រូងចម្រាសជាច្រើនពាក់ព័ន្ធនឹងរបបរាជានិយម ក៏ដូចជានៅក្នុងក្រុមចម្រុះដែលលោកជ្រើសរើសបាន ក្រោយឈ្នះសំឡេងភាគច្រើននៅក្នុងការបោះឆ្នោតឆ្នាំ ២០២៣ ។

តុលាការធម្មនុញ្ញនិយាយថា គណបក្សចលនាឆ្ពោះទៅមុខមិនស្ថិតនៅក្នុងជួររដ្ឋាភិបាលនោះទេ ដោយសារតែគោលនយោបាយធ្វើវិសោធនកម្មច្បាប់ស្តីពីការប្រមាថព្រះមហាក្សត្ររបស់បក្ស គឺរំលោភរដ្ឋធម្មនុញ្ញ ។ តុលាការធម្មនុញ្ញបានសម្រេចថា គណបក្សចលនាឆ្ពោះទៅមុខ និងមេដឹកនាំរបស់ខ្លួនបង្ហាញសកម្មភាពក្នុងន័យអំពាវនាវឲ្យមានការផ្ដួលរំលំរបបរាជាធិបតេយ្យរបស់ប្រទេសថៃ ដែលមានព្រះមហាក្សត្រជាប្រមុខរដ្ឋ ។

ទន្ទឹមនោះ តុលាការបាន​បញ្ជា​ឲ្យគណបក្សចលនាឆ្ពោះទៅមុខ ​បញ្ឈប់​រាល់​សកម្មភាព ឬ​ទស្សនៈ​តស៊ូមតិឲ្យលុបចោល​ច្បាប់ប្រមាថព្រះមហាក្សត្រ និងហាមឃាត់ការធ្វើវិសោធនកម្មច្បាប់នេះថែមទៀតផងដែរ ហើយ​នេះបង្ហាញថា គណបក្សរបស់លោក Pita អាចនឹងត្រូវបានរំលាយចោល និងអាចមានការហាមឃាត់មេដឹកនាំបក្សមិនឲ្យប្រឡូកក្នុងនយោបាយរយៈពេលជាច្រើនឆ្នាំ ។

ទោះយ៉ាងណា គណបក្សចលនាឆ្ពោះទៅមុខបានអះអាងថា វាជាតួនាទីស្របច្បាប់របស់សភាជាប់ឆ្នោត ដើម្បីពិនិត្យច្បាប់ ដែលជាផ្នែកនៃក្រមព្រហ្មទណ្ឌ ខណៈច្បាប់​ស្តី​ពី​ការប្រមាថព្រះមហាក្សត្រ​របស់​ប្រទេស​ថៃ​ត្រូវ​បាន​ផ្លាស់​ប្តូរ​​ចំនួន ២ ​លើក​រួច​មក​ហើយ​ ប៉ុន្តែ​វា​នៅ​តែ​ជា​ឧបករណ៍​ដ៏​មាន​ឥទ្ធិពល​មួយ​ដើម្បីប្រឆាំង​នឹង​អ្នក​នយោបាយ ហើយតាម​រយៈ​ការ​សម្រេច​របស់តុលាការ​នេះទៀតសោត ក៏កាន់តែ​ធ្វើ​ឲ្យ​ច្បាប់​ប្រមាថមហាក្សត្រ​​មិន​អាច​ប៉ះពាល់​បាន ។

គួរបញ្ជាក់ថា ពាក់ព័ន្ធនឹងច្បាប់ប្រមាថមហាក្សត្រនេះដែរ កាលពីដើមខែនេះបុរសអាយុ ៣០ ឆ្នាំម្នាក់នៅទីក្រុងបាងកកត្រូវបានកាត់ទោសឲ្យជាប់ពន្ធនាគាររយៈពេល ៥០ ឆ្នាំពីបទរិះគន់របបរាជានិយមថៃ និងមានមនុស្សជាង ២៦០​ នាក់ត្រូវបានចោទប្រកាន់ក្រោមច្បាប់នេះ ចាប់តាំងពីខែវិច្ឆិកា ឆ្នាំ២០២០ មក ៕

អត្ថបទ ៖ ប៊ុន សុភាព