អ្នកខេត្តសៀមរាប នាំគ្នាចាប់ត្រី តាមរបៀបបុរាណ ដើម្បីទុកប្រារព្ធបុណ្យភូមិ

ប្រជាពលរដ្ឋជាច្រើននាក់នៅព្រឹកថ្ងៃទី១១ ខែកុម្ភៈ ឆ្នាំ២០២៤នេះ បានមកប្រមូលផ្តុំគ្នានៅបឹងធំមួយ ស្ថិតនៅក្នុងភូមិបង្កោង ឃុំអំពិល ស្រុកប្រាសាទបាគង ខេត្តសៀមរាប ដើម្បីរៀបចំពិធីពិធីចុះចាប់ត្រីរួមគ្នាតាមកាលកំណត់។

ពិធីនេះធ្វើឡើងនៅក្នុងបឹងដ៏ធំក្នុងភូមិ និងជាបឹងបុរាណដែលអ្នកភូមិប្រើប្រាស់សម្រាប់ស្រោចស្រពផលកសិកម្ម និងមានការយាមកាមមិនឱ្យមានការនេសាទអ្វីទាំងអស់ គឺទុកសម្រាប់ពិធីចុះចាប់ត្រីរួមគ្នា។

បឹងដ៏ធំមួយនេះ ត្រូវបានអ្នកភូមិអភិរក្សត្រីទុកមិនឱ្យមានការនេសាទផ្តេសផ្តាសនោះឡើយ គឺសម្រាប់តែរកត្រីរួមគ្នាដើម្បី​យកមកធ្វើជាចង្ហាន់ប្រគេនព្រះសង្ឃក្នុងថ្ងៃឡើងមាឃ ឬឡើងអ្នកតា និងធ្វើម្ហូបសម្រាប់គ្រួសារ ព្រមទាំងទទួលភ្ញៀវ ដែលជាទំនៀមទម្លាប់ របស់អ្នកស្រុកតំបន់អង្គរ ប្រារព្ធធ្វើជារៀងរាល់ឆ្នាំ។

ការរកត្រីនេះ អនុញ្ញាតឱ្យប្រជាជនក្នុងភូមិបង្កោងតែប៉ុណ្ណោះ ដោយមិនអនុញ្ញាតឱ្យតែប្រជាជនភូមិក្រៅចុះចាប់នោះឡើយ និងប្រើប្រាស់តែឧបករណ៍បុរាណទាំងអស់ រួមមានដូចជា ឈ្នាង អង្រុត និងសំណាញ់ជាដើម។

ចំពោះការចាប់ត្រីនេះ គណៈកម្មការបានកំណត់ជាពីរផ្នែក គឺផ្នែកទី០១ប្រជាជនទាំងអស់អាចរកត្រីទុកសម្រាប់ខ្លួនឯងផ្ទាល់ និងផ្នែកទី០២ នៃបឹងដែលដាក់សម្រាស់ការពារមិនឱ្យចាប់ពីដំបូងនោះ ត្រូវចាប់ទុករួមសម្រាប់ធ្វើទឹកនំបញ្ចុកប្រគេនព្រះសង្ឃ៕

អត្ថបទ៖ កុសល