ក្រុមការងារជញ្ជីងចល័ត ចុះឃាត់រថយន្ត ចំនួន ២គ្រឿង ដឹកលើសទម្ងន់តាមផ្លូវជាតិលេខ៧

ក្រុមការងារជញ្ជីងចល័ត ដឹកនាំដោយ លោក សេង ឈួន រដ្ឋលេខាធិការក្រសួងសាធារណការ និងដឹកជញ្ជូន នៅថ្ងៃទី២៨ ខែកុម្ភៈ ឆ្នាំ២០២៤ នេះ បានចុះប្រតិបត្តិការចាប់រថយន្តដឹកលើសទម្ងន់ចំណុចភូមិសាឡាង១ ឃុំដារ ស្រុកមេមត់ ខេត្តត្បូងឃ្មុំ ដោយឃាត់បានរថយន្តចំនួន២គ្រឿង ដែលដឹករហូតដល់ជិត ៨០ តោន។

រថយន្តដែលឃាត់បានខាងលើ គឺជាប្រភេទរថយន្តធុនធំសណ្តោងសឺមី ដោយ១គ្រឿងពាក់ស្លាកលេខ កំពង់ចាម 3A- 1770 ដឹករហូតដល់ ៧៧ តោន និងរថយន្តមួយគ្រឿងទៀតពាក់ស្លាកលេខ ត្បូងឃ្មុំ 3A -4329 ដឹករហូតដល់៧៤ តោន ។ បន្ទាប់ពីរកឃើញថារយន្តទាំង២ បានដឹកលើសទម្ងន់ដែលធ្វើប៉ះពាល់ និងខូចខាតដល់ផ្លូវជាតិ សមត្ថកិច្ចបានសម្រេចធ្វើការផាកពិន័យដោយឃាត់រថយន្តទាំង២ទុក មិនឱ្យធ្វើចរាចរណ៍លើដងផ្លូវរយៈពេលមួយឆ្នាំ។

ជាមួយគ្នានោះ រថយន្តដឹកលើសទម្ងន់ទាំង២ ខាងលើនេះ លោក សេង ឈួន បានអំពាវនាវដល់ម្ចាស់រថយន្តដឹកទំនិញទាំងអស់ត្រូវ សូមចូលរួមអនុវត្តច្បាប់ឱ្យបានគ្រប់គ្នា ដើម្បីកាត់បន្ថយគ្រោះថ្នាក់តាមដងផ្លូវ និងថែរក្សាផ្លូវ ដែលរាជរដ្ឋាភិបាលបានចំណាយថវិការច្រើន សម្រាប់បម្រើផលប្រយោជន៍រួមរបស់ប្រជាពលរដ្ឋទាំងអស់គ្នា ។

ទន្ទឹមនឹងនេះដែរ  ម្ចាស់រថយន្តទាំងអស់នៅតែបំពានច្បាប់នោះ អាជ្ញាធរមានសមត្ថកិច្ចមិនលើកលែងឡើយ ដោយត្រូវតែអនុវត្តតាមច្បាប់ ៕

អត្ថបទ និង រូបភាព ៖ ឡេក  ចាន់ពេជ្រ