សិស្ស​វិទ្យាល័យហ៊ុន សែន ខ្លាកូន រៀបចំ​ពិព័រណ៍​ស្នាដៃសិស្ស រួម​ទាំង​អបអរ​សង្ក្រាន្តឆ្នាំថ្មី

ក្នុងវិទ្យាល័យហ៊ុន សែន ខ្លាកូន ស្ថិតនៅភូមិខ្លាកូនថ្មី សង្កាត់កំពង់ស្វាយ ក្រុងសិរីសោភ័ណ លោកគ្រូអ្នកគ្រូ និងសិស្សានុសិស្សច្រើនរយនាក់បាន​រៀបចំ​ពិធីតាំងពិពណ៌ស្នាដៃសិស្សនិងសង្ក្រាន្តឆ្នាំថ្មី ឆ្នាំ ២០២៤។

លោក សុខ ចំណាន នាយកវិទ្យាល័យហ៊ុន សែន ខ្លាកូន បានប្រាប់អ្នកយកព័ត៍មានឲ្យដឹងថា ពិធីតាំង​ពិព័រណ៍ស្នាដៃសិស្សានុសិស្សក្នុងវិទ្យាល័យ ហ៊ុន សែន ខ្លាកូននាពេលនេះបានបង្ហាញអំពីចំណេះដឹងចំណេះធ្វើរបស់សិស្សានុសិស្ស ដើម្បីបន្តវេនអភិវឌ្ឍន៍សង្គមជាតិ។

ជាមួយគ្នានេះក៏មានរៀបចំកម្មវិធី​​អបអរពិធីបុណ្យ​សង្ក្រាន្តឆ្នាំថ្មី មានការ​លេងល្បែងប្រជាប្រិយមានដូចជាចោលឈូង បោះអង្គុញ លាក់កន្សែង​ ទាញព្រ័ត ដណ្ដើមស្លឹកឈើ វាយក្អម រាំវង់ រាំក្បាច់ រាំសារ៉ាវ៉ាន់ ជាដើម។

លោកសុខ ចំណាន នាយកវិទ្យាល័យហ៊ុន សែន ខ្លាកូន បន្តទៀតថា កម្មវិធី​សង្ក្រាន្តនេះលោកបានណែនាំដល់សិស្សនុសិស្សទាំងអស់ត្រូវ​ពង្រឹងសណ្ដាប់ធ្នាប់ ពិសេស​ហាម​ដាច់ខាតការ​លេង​បាញ់​ទឹក ជះ​ទឹក និង​ប៉ាត​ម្សៅនិងល្បែងផ្សេងៗទៀតដែលប៉ះពាល់ដល់វប្បធម៍ខ្មែរ ដែល​គ្មាន​សណ្តាប់ធ្នាប់ គ្មាន​របៀបរៀបរយ គ្មាន​ភាព​ថ្លៃថ្នូរ ព្រមទាំងគ្មាន​សុវត្ថិភាពជាដើម៕

អត្ថបទ៖ វ៉ាន់ ណាង