សម្ដេច ហ៊ុន ម៉ាណែត ថា សម រង្ស៊ី ជាមនុស្សប្រឆាំង ដើម្បីប្រឆាំងសូម្បីតែសមិទ្ធផលជាតិ

ក្រោយការលើកឡើងចោទប្រកាន់ដោយគ្មានមូលដ្ឋានពីសំណាក់បុគ្គល សម រង្ស៊ី ជុំវិញគម្រោងព្រែកជីកហ្វូណន-តេជោ ថា ជាការបម្រើឱ្យផលប្រយោជន៍ផ្នែកយោធារបស់ចិននោះ ត្រូវបានសម្ដេចនាយករដ្ឋមន្ត្រី ហ៊ុន ម៉ាណែត ឆ្លើយតបចំៗ​ថា បុគ្គល សម រង្ស៊ី ជាមនុស្សប្រឆាំង ដើម្បីប្រឆាំងសូម្បីតែសមិទ្ធផលសម្រាប់ជាតិ។

ប្រតិកម្មតបនៅថ្ងៃទី២៦ ខែមេសា ឆ្នាំ២០២៤នេះ សម្ដេចធិបតី ហ៊ុន ម៉ាណែត បានចោទជាសំណួរថា «តើអ្នកនយោបាយចាស់វស្សាម្នាក់នេះ ជាមនុស្សល្ងង់ ឬជាមនុស្សចេះធ្វើល្ងង់?

ក្នុងន័យនេះ សម្ដេចធិបតី បានគូសបញ្ជាក់ដូច្នេះថា «ប្រជាជនកម្ពុជាមួយប្រទេសបានយល់អំពីអត្ថប្រយោជន៍ចំពោះសេដ្ឋកិច្ច និងសង្គមជាតិកម្ពុជា ដែលគម្រោងព្រែកជីកហ្វូណន-តេជោនេះ នឹងផ្ដល់ឱ្យសម្រាប់ប្រទេស និងប្រជាជនខ្មែរ។ ប៉ុន្តែបែរជា សម រង្សី ដែលជាអ្នកនយោបាយចាស់វស្សាដែលតែងតែតាំងខ្លួនជាអ្នកស្រឡាញ់ជាតិ មិនមានសមត្ថភាពក្នុងការមើលឃើញ ឬទទួលស្គាល់នូវអ្វីដែលល្អសម្រាប់ខ្មែរទៅវិញ»។

សម្ដេចធិបតី នាយករដ្ឋមន្ត្រី សង្កត់ធ្ងន់ដូច្នេះថា៖ «តើគាត់ជាមនុស្សល្ងង់ពិតប្រាកដ ឬជាមនុស្សចេះប៉ុន្តែចេះល្ងង់។ ជាមនុស្សប្រឆាំង ដើម្បីប្រឆាំង ប្រឆាំងគ្មានរើសពេលវេលា ឬប្រធានបទ ប្រឆាំងសូម្បីតែសមិទ្ធផលសម្រាប់ជាតិ និងប្រជាជនខ្មែរខ្លួនឯងក៏ដោយ»។

លើសពីនេះ សម្ដេចធិបតី ក៏បានលើកឡើងពីភាពមិនច្បាស់របស់បុគ្គលប្រឆាំងរូបនេះ ដែលសូម្បីតែភូមិសាស្ត្រពាក់ព័ន្ធនឹងខេត្តដែលគម្រោងនេះនឹងតភ្ជាប់ ក៏គាត់ក្តាប់មិនបាន និយាយមិនត្រូវផង៕