ការជួញដូរឧបករណ៍​និស្សន្ទនៅ​ផ្សារ​មូលបត្រកម្ពុជា​កើន​ពី​ ៤ លាន​ដុល្លារ ដល់ ៣០០ លាន​ដុល្លារ

ការ​ជួញដូរ​ឧបករណ៍និស្សន្ទ​នៅផ្សារ​មូលបត្រ​កម្ពុជា​បានកើនឡើង​ជា​រៀងរាល់ឆ្នាំ ​គិត​ត្រឹមឆ្នាំ ២០២៣ ទំហំ​នៃ​ការ​ជួញដូរ​បានកើនដល់ ៣០០ លាន​ដុល្លារ។

លោក វិន ភក្តី អគ្គនាយករងនៃនិយ័តករមូលបត្រកម្ពុជាបានឲ្យដឹងថា បច្ចុប្បន្នមានផលិតផលសំខាន់ៗ​កំពុងជួញដូរ​នៅ​ផ្សារមូលបត្រកម្ពុជា​ក្នុងនោះ មានមូលបត្រកម្មសិទ្ធិ និង​មូលបត្រ​បំណុល​។ មូលបត្របំណុលមានទាំងសញ្ញាប័ណ្ណសាជីវកម្ម សញ្ញាប័ណ្ណសាជីវកម្មបៃតង សញ្ញាប័ណ្ណរដ្ឋ​​រួម​ទាំងផលិតផល​ឧបករណ៍និស្សន្ទ និងថ្មីៗនេះក៏បាន​ដាក់ឲ្យដំណើរការ​ទីផ្សារគម្រោង​វិនិយោគ​រួម។

អគ្គនាយករងនៃនិយ័តករមូលបត្រកម្ពុជាបាន​ឲ្យ​ដឹង​ថា ផ្សារមូលបត្រកម្ពុជាបានចាប់ផ្តើម​ដំណើរការ​នៅ​ឆ្នាំ ២០១១ គិតដល់ពេលបច្ចុប្បន្ន មានក្រុមហ៊ុនចំនួន ២២ បាន​បោះផ្សាយលក់មូលបត្រក្នុង​ផ្សារមូលបត្រកម្ពុជា ដែលប្រមូលសាច់ប្រាក់ប្រមាណ ៤០០ លានដុល្លារ។

ក្នុងចំណោមក្រុមហ៊ុនទាំង ២២ មានក្រុមហ៊ុនចំនួន ១១ បានបោះផ្សាយលក់មូលបត្រកម្មសិទ្ធិ និង ១១ ផ្សេងទៀតបោះផ្សាយលក់មូលបត្របំណុល។ ​

ដោយឡែក​​ការ​ដាក់​ឲ្យដំណើរការជួញដូរ​ឧបករណ៍និស្សន្ទ​គិត​ត្រឹម​ឆ្នាំ ២០២៣ បាន​កើនឡើងដល់ ៣០០ លានដុល្លារ ខណៈ​ត្រីមាសទី ១ ឆ្នាំ ២០២៤ ទំហំនៃ​ការ​ជួញដូរមានទំហំ​ដល់ ៥០ លានដុល្លារ។

លោក វិន ភក្តី​បាន​អះអាង​ថា ការ​ដាក់​ឲ្យដំណើរការ​ដំបូង​នៅ​ឆ្នាំ ២០១៧ ទំហំនៃ​ការ​ជូញដូរ​ឧបករណ៍និស្សន្ទ​មាន​ត្រឹម ៤ លាន​ដុល្លារ​ ហើយ​ទំហំនៃ​ការ​ជួញដូរ​មានការ​កើនឡើង​ជា​រៀងរាល់ឆ្នាំ។

ការជួញដូរ​ឧបករណ៍និស្សន្ទបែងចែកជា ៦ ប្រភេទមាន​សរុបជាង ២៤៩ ផលិតផល។ ផលិតផល​ឧបករណ៍​និស្សន្ទ​ទាំង ៦ ប្រភេទ រួម​មាន Forex (ការជួញដូររូបិយប័ណ្ណ) កិច្ចសន្យា​លក់​ពង្រីកថ្លៃលោហធាតុ​មានតម្លៃ កិច្ចសន្យាលក់ពង្រីកថ្លៃប្រេងឆៅ កិច្ចសន្យាលក់ពង្រីកថ្លៃ commodity កិច្ចសន្យា​លក់ពង្រីកថ្លៃសន្ទស្សន៍ និងកិច្ចសន្យាលក់ពង្រីកថ្លៃមូលបត្រកម្មសិទ្ធិ។

លោក វិន ភក្តី បាន​បញ្ជាក់​ថា នេះជាមោទនភាពសម្រាប់ប្រទេសកម្ពុជា ដែលទើបចាប់ផ្ដើមទីផ្សារមូលបត្រក្រោយគេ ហើយ​ទីផ្សារ​មានទំហំតូច ប៉ុន្តែការអនុវត្តទីផ្សារនិងការដាក់ឲ្យអនុវត្តបទបញ្ញត្តិផ្សេងៗ​បាន​ធានា​និរន្តភាព តម្លាភាព សុវត្ថិភាពស្របតាមយន្តការថ្នាក់តំបន់និងសកល។

ដើម្បីស្របតាមសម័យកាលឌីជីថល និយតករបានអនុញ្ញាត​ឲ្យវិនិយោគិន​អាច​បើកករណី​ជួញដូរតាមប្រព័ន្ធ​អនឡាញ និងអាច​ធ្វើការជួញដូរមូលបត្រដោយខ្លួនឯង។ បើ​តាមមន្រ្តីនិយ័តករមូលបត្រកម្ពុជា ការ​អនុញ្ញាតិឲ្យបើកគណនីតាម​អនឡាញ ដើម្បី​សម្រួលដល់វិនិយោគិន។

មកដល់ពេលបច្ចុប្បន្ន និយតករមូលបត្រកម្ពុជាបានផ្តល់អាជ្ញាប័ណ្ណ​អនុញ្ញាតទទួលស្គាល់​ដល់ក្រុមហ៊ុន​ធ្វើអាជីវកម្ម និងផ្តល់សេវាវិស័យមូលបត្រប្រហែល ១៣០ ក្រុមហ៊ុន ក្នុងនោះ​មាន​ក្រុមហ៊ុនមូលបត្រ ក្រុមហ៊ុនទីប្រឹក្សាហិរញ្ញវត្ថុ ក្រុមហ៊ុនទីប្រឹក្សាវិនិយោគ ក្រុមហ៊ុន​ចែកចាយ​លក់មូលបត្រ ក្រុមហ៊ុនសមភាគីកណ្តាល ឈ្មួញ​ជួញ​ដូរទីផ្សារនិស្សន្ទ ក្រុមហ៊ុន​គ្រប់គ្រង​មូលនិធិ ក្រុមហ៊ុនថែរក្សាទ្រព្យសម្បត្តិជំនួស ក្រុមហ៊ុនចែកចាយ​លក់ទិញត្រឡប់មកវិញ​ឬទូទាត់​សង ក្រុមហ៊ុនអភិបាលមូលនិធិ រួមទាំងក្រុមហ៊ុនផ្តល់​សេវាផ្សេងទៀត​ដែល​បម្រើវិស័យ​មូលបត្រ​កម្ពុជា។

បច្ចុប្បន្ននៅទូទាំងសាកលលោក ក៏ដូចជានៅក្នុងតំបន់និងក្នុងប្រទេសកម្ពុជាមានការឆបោក​ជា​ច្រើន ដែល​ទាមទារការ​ចាប់​អារម្មណ៍ និងការយកចិត្តទុកដាក់​ខ្ពស់ពីអាជ្ញាធរ​និងវិនិយោគិន​ទូទៅ។

លោក វិន ភក្តី អគ្គនាយករងនៃនិយ័តករមូលបត្រកម្ពុជាបាន​គូស​បញ្ជាក់ថា និយតករមូលបត្រកម្ពុជាតែងតែយកចិត្តទុកដាក់ខ្ពស់ចំពោះកិច្ចគាំពារវិនិយោគិន និងផលប៉ះពាល់សម្រាប់ការវិនិយោគលើវិស័យបូលបត្រ។ លោកក៏​ស្នើវិនិយោគិន​​ធ្វើប្រតិបត្តិការ​ជាមួយក្រុមហ៊ុនដែលមានអាជ្ញាបណ្ណ​ពីនិយ័តករមូលបត្រកម្ពុជា ដើម្បីចូលរួម​ទប់ស្កាត់​ការឆបោកការវិនិយោគ ដែលនាំ​ឲ្យ​ប៉ះពាល់កេរ្តិ៍ឈ្មោះ​និងទំនុកចិត្ត​លើ​ទីផ្សារ​មូលបត្រកម្ពុជា៕