ក្រុមហ៊ុនមូលបត្រ​ នឹងទទួលរងពិន័យ ឬដកហូតអាជ្ញាបណ្ណ បើរកឃើញថា មិនអនុវត្តតាមច្បាប់ប្រឆាំងការសម្អាតប្រាក់

និយ័តករមូលបត្រកម្ពុជា នៅថ្ងៃទី ១៧ ខែកុម្ភៈ ឆ្នាំ ២០២៦ បានប្រកាសដាក់ទណ្ឌកម្មខាងវិន័យ និងដកហូតអាជ្ញាបណ្ណប្រកបអាជីវកម្ម ចំពោះបុគ្គលរាយការណ៍ក្នុងវិស័យមូលបត្រ (ក្រុមហ៊ុនមូលបត្រ ឈ្មួញជើងសារឧបករណ៍និទស្សន្ទ) ដែល​មិនប្រតិបត្តិតាមបញ្ញត្តិនៃ​ច្បាប់ស្តីពី​ការប្រឆាំង​ការសម្អាតប្រាក់ និងហិរញ្ញប្បទានភេរវកម្ម ដើម្បីធានា និងបង្កើនប្រសិទ្ធិភាពនៃការអនុវត្តច្បាប់។

ប្រកាសនេះ មានវិសាលភាព អនុវត្តចំពោះបុគ្គលរាយការណ៍​ក្នុងវិស័យមូលបត្រ រួមមាន ក្រុមហ៊ុនមូលបត្រ ដែលធ្វើអាជីវកម្មជើងសារមូលបត្រ ឈ្មួញជើងសារឧបករណ៍និទស្សន្ទ បុគ្គលផ្សេងទៀតដែលពាក់ព័ន្ធដោយផ្ទាល់ ជាមួយវិនិយោគិនមូលបត្រ។

ចំពោះទណ្ឌកម្មខាងវិន័យ នឹងត្រូវទទួលរងការព្រមាន ការស្ដីបន្ទោស រហូតដល់ដកហូតអាជ្ញាបណ្ណអាជីវកម្ម និង​ផាក​ពិន័យ ប្រសិនបើរកឃើញថា ក្រុមហ៊ុនចុះបញ្ជី មិនអនុវត្តកាតព្វកិច្ច ដែលមានចែងក្នុងច្បាប់ពាក់ព័ន្ធនឹងការប្រឆាំង​ការសម្អាតប្រាក់ និងហិរញ្ញប្បទានភេរវកម្ម៕