សមត្ថកិច្ចកំពុងតាមប្រមាញ់ មុខសញ្ញាឃាតករ ​កាប់ស្រ្តី​ម្នាក់​បណ្តាល​ឲ្យ​ស្លាប់

ករណីឃាតកម្មមួយបានកើតឡើងបង្កដោយជនសង័្សយមិនស្គាល់អត្តសញ្ញាណម្នាក់ ជិះកង់មួយគ្រឿងប្រដាប់ដោយកាំបិត បានធ្វើសកម្មភាពកាប់ទៅលើជនរងគ្រោះឈ្មោះ ហោ ប៉ុក ភេទ ស្រី អាយុ ៨៤ ឆ្នាំ បណ្តាលឱ្យស្លាប់នៅកន្លែងកើតហេតុ។

ក្រោមបទបញ្ជាដឹកនាំផ្ទាល់របស់​ស្នងការនៃស្នងការដ្ឋាននគរបាលខេត្តបាត់ដំបង កងកម្លាំងនគរបាលបានចុះអន្តរាគមន៍តាមចាប់ខ្លួនជនសង័្សយ ខណៈជននេះ​បានយកកង់ទៅទម្លាក់ចោលហើយបន្តគេចខ្លួនចូលទៅក្នុងព្រៃភ្នំចំណុចឃុំតាគ្រាម ស្រុកបាណន់ ខេត្តបាត់ដំបង ។

ផ្តើមពីការស្រាវជ្រាវ ជនសង័្សយមានឈ្មោះ សឿន ទន់ ភេទប្រុស អាយុ ២៥ឆ្នាំ បច្ចុប្បន្នរស់នៅអូរពងមាន់ ឃុំតាគ្រាម ស្រុកបាណន់ ខេត្តបាត់ដំបង ជាជនដែលប្រើប្រាស់គ្រឿងញៀន ហើយធ្លាប់ត្រូវបាននាំខ្លួនយកទៅធ្វើការអប់រំបន្សាបគ្រឿងញៀននៅមជ្ឈមណ្ឌលនាពេលកន្លងមក និងមានចរិកកោងកាច។

ចាប់តាំពីពេលកើតហេតុរហូតមកដល់ពេលនេះ សមត្ថកិច្ចនគរបាលមិនទាន់ចាប់ខ្លួនជនសង័្សយបាននៅឡើយទេ ខណៈ​សមត្ថកិច្ចស្នងការនៃស្នងការដ្ឋាននគរបាលខេត្តបាត់ដំបង បានប្រើប្រាស់កងកម្លាំងនគរបាលក្នុងភូមិសាស្រ្ត ពាក់ព័ន្ធរួមជាមួយសមត្ថកិច្ចផ្សេងទៀត រួម​ទាំង​កងប្រជាការពារតាមប្រម៉ាញ់ជនសង័្សយ។

សមត្ថកិច្ចនៅតែបន្តសុំការចូលរួមសហការណ៍ពីគ្រប់សមត្ថកិច្ចពាក់ព័ន្ធ អាជ្ញាធរមូលដ្ឋានប្រជាពលរដ្ឋដែលរស់នៅក្នុងមូលដ្ឋានពាក់ព័ន្ធ ដើម្បីបានព័ត៌មានជាក់ច្បាស់ផ្តល់មកសមត្ថកិច្ចតាមគ្រប់មធ្យោបាយ ដែលអាចធ្វើទៅបាននិងឈានទៅធ្វើការចាប់ខ្លួនជនសង័្សយ។

តាមព័ត៌មានចុងក្រោយ ជនសង័្សយត្រូវបានប្រជាពលរដ្ឋប្រទះឃើញស្ថិតនៅចំណុចភ្នំទទឹង ក្នុងភូមិសាស្រ្តឃុំតាគ្រាម ស្រុកបាណន់ ខេត្តបាត់ដំបង ដែលសមត្ថកិច្ចកំពុងប្រតិបត្តិការទៅកាន់ចំណុចនោះ៕