លោក ត្រាំ៖ ខ្ញុំគិតថា គីម ជុងអ៊ុន នឹកខ្ញុំ!

តាមការចុះផ្សាយរបស់ Yahoo News, ក្នុងសមាជបក្សសាធារណរដ្ឋនៅថ្ងៃសុក្រទី១៩ ខែកក្កដា ឆ្នាំ២០២៤ លោក ដូណាល់ ត្រាំ ក៏បានឆ្លៀតឱកាសលើកយកឈ្មោះមេដឹកនាំកូរ៉េខាងជើងលោក គីម ជុងអ៊ុន ប្រាប់ទៅអ្នកចូលរួមផងដែរ ដោយគូសបញ្ជាក់ថា “ខ្ញុំគិតថាគាត់នឹកខ្ញុំហើយគាត់ចង់ឃើញខ្ញុំវិលត្រឡប់មកវិញ”។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

កាលកាន់តំណែងជាប្រធានាធិបតីអាមេរិក លោក ត្រាំ បានជួបលោក គីម ច្រើនដងដែរ ហើយថែមទាំងនិយាយថា អ្នកទាំងពីរ ចុះសម្រុងគ្នាយ៉ាងខ្លាំងទៀតផង។

លោក ត្រាំ ប្រាប់ទៅទស្សនិកជនក្នុងទីក្រុង Milwaukee ថា “សារព័ត៌មានទាំងឡាយប្រហែលមិនចូលចិត្ត ពេលខ្ញុំនិយាយអ៊ីចឹង។ តើអ្នកអាចចុះសម្រុងជាមួយគាត់ដោយរបៀបណាទៅ? តាមពិតអ្នកដឹងទេ វាល្អដែរ ដែលអាចរួមរស់ជាមួយអ្នកដែលមានអាវុធនុយក្លេអ៊ែរច្រើន”។

ស្របពេលជាមួយគ្នានោះ អតីត​ប្រធានាធិបតីរូបនេះក៏គូសបញ្ជាក់ដែរថា លោក​នឹង​បន្ត​ទាក់ទង​ជាមួយ​លោក គីម ប្រសិនបើ​ឡើងកាន់តំណែងវិញ។

សូមបញ្ជាក់ជាថ្មី ក្នុងឆ្នាំ២០១៩ លោក ត្រាំ បានក្លាយជាប្រធានាធិបតីកំពុងកាន់តំណែងដំបូងគេរបស់អាមេរិក ដែលជាន់ដីកូរ៉េខាងជើង ពេលលោកជួបមេដឹកនាំ គីម ជុងអ៊ុន នៅតំបន់គ្មានយោធា ហើយអ្នកទាំងពីរ ក៏បានយល់ព្រមចាប់ផ្តើមការចរចាឡើងវិញ លើកិច្ចព្រមព្រៀងនុយក្លេអ៊ែដែលអូសបន្លាយយូរពេលជាយូរមកហើយដែរ៕

អត្ថបទ៖ សុខ សុវណ្ណ