ខេត្តស្វាយរៀងរៀបចំការប្រកួតទូកប្រពៃណីខ្នាតអន្តរជាតិដើមខែក្រោយ

ព្រឹត្តិការណ៍ប្រកួតកីឡា​ទូកប្រពៃណីខ្នាតអន្តរជាតិ ទូកនាគ ទូកកានូ-កាយ៉ាក់ និងទូករ៉អុីង ជ្រើសរើសជើងថ្នាក់ជាតិនឹងប្រព្រឹត្តទៅនៅទឹកដីខេត្តស្វាយរៀង ក្រោយមានការ​ឯកភាពពីលោក ស សុខា ឧបនាយករដ្ឋមន្រ្ដី រដ្ឋមន្រ្ដីក្រសួងមហាផ្ទៃ និងជាប្រធានសហព័ន្ធកីឡាទូកកានូ និងរ៉ូអុីងកម្ពុជា។

ព្រឹត្តិការណ៍ប្រកួតទូកប្រពៃណីខ្នាតអន្តរជាតិ ទូកនាគ ទូកកានូ-កាយ៉ាក់ និងទូករ៉អុីង ជ្រើសរើសជើងថ្នាក់ «ពានរង្វាន់ឯកឧត្តម​អភិសន្តិបណ្ឌិត​ ស​ សុខា» លើទី១ ចាប់ពីថ្ងៃទី២ ដល់ទី៤ ខែសីហា ឆ្នាំ២០២៤ វេលាម៉ោង៨ព្រឹក នៅទន្លេវ៉ៃគោ។ គោលបំណង​នៃ​ការបង្កើតកម្មវិធីនេះ​ឡើង​គឺដើម្បីចូលរួមចំណែកស្វែងរកធនធាន​អត្តពលិក​បន្ថែម។ ជាពិសេសដើម្បីការអភិវឌ្ឍ​កីឡាទូកប្រពៃណីខ្នាតអន្តរជាតិ ទូកនាគ ទូកកានូ-កាយ៉ាក់ និងទូករ៉អុីង និង​ជាការលើកទឹកចិត្តដល់ក្រុមកីឡាករ កីឡាការិនី។

ព្រឹត្តិការណ៍នេះក៏​ផ្នែក​​កម្សាន្ត​​ សម្រាប់​ប្រជា​ពល​រដ្ឋ​ក្នុងខេត្តស្វាយរៀង និងប្រជាជន​កម្ពុជា ហើយជា​ឱកាស​​ដើម្បីផ្សព្វផ្សាយ​វិស័យ​ទេសចរណ៍​ក្នុង​ខេត្ត​ស្វាយរៀង និង​ទូទាំង​ប្រទេស។

រដ្ឋបាលខេត្តស្វាយរៀងបានប្រកាសជូនសាធារណជន អាចចូលរួមឧបត្ថម្ភជាថាវិកា និងសម្ភារផ្សេងៗ ដល់កម្មវិធី​បាន តាមលទ្ធភាព ដើម្បីចូលរួមចំណែកលើកស្ទួយវិស័យកីឡាទូកប្រពៃណីខ្នាតអន្តរជាតិ ទូកនាគ ទូកកានូ-កាយ៉ាក់និងទូករ៉អុីង នៅកម្ពុជា៕

អត្ថបទ៖ ផា រតនា