រដ្ឋមន្ត្រី៖ វត្តមានរថយន្តអគ្គិសនី រួមចំណែកដល់កំណើនសេដ្ឋកិច្ចកម្ពុជា

លោក ហែម វណ្ណឌី រដ្ឋមន្ត្រីក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ បាន​លើកឡើងថា វត្តមានរថយន្តអគ្គិសនីនៅកម្ពុជា នឹងផ្ដល់ឱកាសការងារថ្មី និងរួមចំណែក​ដល់​កំណើនសេដ្ឋកិច្ច ហើយឧស្សាហកម្មរថយន្តអគ្គិសនីនៅកម្ពុជា​អាចជាកាតាលីករ​ដើម្បី​ជំរុញ​ការផ្ទេរបច្ចេកវិទ្យា ចំណេះដឹង និងចំណេះធ្វើ ដែលនឹងផ្តល់អត្ថប្រយោជន៍ដល់​វិស័យ​គាំទ្រ​ផ្សេងៗ​ទៀតនៅក្នុងសេដ្ឋកិច្ច។

លោក ហែម វណ្ណឌី​លើកឡើងក្នុងពិធីដាក់ឱ្យប្រើប្រាស់រថយន្តអគ្គិសនីម៉ូដែល​ចុងក្រោយរបស់​ក្រុមហ៊ុន RMA Cambodia គឺរថយន្ត Chang An Deepal LO7 និង Chang An Deepal SO7 នៅថ្ងៃទី ២៣ ខែសីហា ឆ្នាំ ២០២៤។

លោក ហែម វណ្ណឌី បានលើកឡើងពីនិន្នាការរថយន្តអគ្គិសនីនៅលើទីផ្សារពិភពលោក ដែល​ជំរុញ​ដោយតម្រូវការអ្នកប្រើប្រាស់ផង និងបទបញ្ញតិអន្តរជាតិដែលទាមទារឱ្យកាត់បន្ថយ​ការ​បំភាយឧស្ម័នពុលពីយានយន្ត។

រាជរដ្ឋាភិបាលតាមរយៈក្រសួងសាធារណការ និងដឹកជញ្ជូន និងក្រសួងស្ថាប័នពាក់ព័ន្ធនានា បានប្រឹងប្រែងធ្វើឱ្យប្រសើរឡើងចំនួនស្ថានីយសាកអាគុយកាន់តែច្រើន និងលក្ខណ្ឌអំណោយ​ផលផ្សេងៗទៀតកាន់តែប្រសើរ។

យោងតាមតួលេខ នៃការចុះបញ្ជីយានយន្តអគ្គិសនី គិតត្រឹមរយៈពេល៦ខែ ឆ្នាំ២០២៤ ចំនួនយានយន្តរបស់ក្រុមហ៊ុន​BYDឈរលើកំពូលតារាដែលមានចំនួន ៦៥៨គ្រឿង ដេញតាមពីក្រោយដោយយានយន្តម៉ាក TOYOTA ចំនួន ២៦១​គ្រឿង និងម៉ាកTESLAចំនួន ១៨៦គ្រឿង ព្រមទាំងម៉ាកផ្សេងៗទៀត៕