ត្រីងាប់​ពេញ​បឹងបួ​និង​ច្រាំងសមុទ្រ​​​ជាងរយ​រតោន​នៅ​ប្រទេសក្រិក​ដោយ​កត្តាអាកាសធាតុ​

ត្រីងាប់ដែល​ត្រូវបាន​ប៉ាន​ប្រមាណ​មាន​ជាង១០០តោន ត្រូវបានប្រមូលនៅក្នុង និងជុំវិញកំពង់ផែ Volos កណ្តាលប្រទេសក្រិក​ ដោយសារតែការប្រែប្រួលអាកាសធាតុខ្លាំង ខណៈប្រទេសនេះកំពុងជួបប្រទះនូវបញ្ហាកង្វះទឹកនិង​អាកាសធាតុក្តៅ​ខ្លាំង​។ នេះបើយោងតាមការចេញផ្សាយរបស់តីភ្នាក់ងារព័ត៌មាន AP កាលពីថ្ងៃទី៣១ខែសីហានេះ។

សភាពាណិជ្ជកម្មក្រុង Volos បានឱ្យដឹងថា ហេតុការណ៍​ត្រីងាប់​បានប៉ះពាល់ដល់អាជីវកម្មក្នុងស្រុកនៅតាមមាត់សមុទ្រ ដោយកាត់បន្ថយសកម្មភាពពាណិជ្ជកម្មចំនួន៨០ភាគរយ ក្នុងរយៈពេលបីថ្ងៃកន្លងមកនេះ ខណៈត្រីទឹកសាបជាច្រើនបានងាប់ពេញឈូងសមុទ្រចម្ងាយ៣២០គីឡូម៉ែត្រ នៅ​ភាគខាងជើងនៃទីក្រុងអាថែន និងទន្លេនៅក្បែរនោះ។ ត្រីនេះមាន​ប្រភព​មកពីបឹង Karla នៅកណ្តាលប្រទេសក្រិក ដែលជាកន្លែងមានសាកសពត្រីហូរមកតាំងពីនៅដើមទសវត្សរ៍ឆ្នាំ១៩៦០ និងបានស្ដារឡើងវិញនៅឆ្នាំ ២០១៨ ដើម្បីទប់ទល់នឹងឥទ្ធិពលនៃគ្រោះរាំងស្ងួត។

យោងតាមអភិបាលរងតំបន់នៃតំបន់ Thessaly បានប្រាប់ទូរទស្សន៍រដ្ឋថា «មានត្រីងាប់រាប់លានក្បាលនៅតាមផ្លូវ​ពីបឹង Karla និង ២០គីឡូម៉ែត្រទៅខាងកើត ខណៈ​ពេល​នេះ​មាន​កិច្ច​ខិត​ខំ​ប្រឹង​ប្រែង​ដ៏​ធំ​មួយ​កំពុង​ដំណើរការ​ដើម្បី​សម្អាត​ត្រី​ងាប់​រាប់​លាន​ក្បាល​ដែល​បានអណ្តែត​មក​ទើរ​តាម​ច្រាំង​ទន្លេ»។ អ្នកនេសាទរួមទាំងអាជ្ញាធរក្នុងតំបន់ ក៏រួមគ្នាដើម្បីស្រង់ត្រីដែលងាប់ចេញពីសមុទ្រ​ដឹក​ដោយ​រថយន្ត​​ដើម្បីយកទៅដាក់ក្នុងឡដុត។

ទោះយ៉ាងណាអភិបាលក្រុង Volos បានរិះគន់អាជ្ញាធរក្នុងតំបន់ អំពីការធ្វើសកម្មភាពយឺតយ៉ាវពេក ខណៈដែលសភាពាណិជ្ជកម្មទីក្រុងកំពុងចាត់វិធានការផ្លូវច្បាប់ ដើម្បីស្វែងរកការខូចខាត បន្ទាប់ពីសកម្មភាពពាណិជ្ជកម្មធ្លាក់ចុះយ៉ាងខ្លាំង។

គួរបញ្ជាក់ កម្រិតទឹកបានកើនឡើងភ្លាមៗនៅក្នុងរដូវស្លឹកឈើជ្រុះឆ្នាំ២០២៣ ក្នុងអំឡុងពេលព្យុះដ៏សាហាវមួយដែលបានបណ្តាលឱ្យមានទឹកជំនន់យ៉ាងទូលំទូលាយនៅភាគកណ្តាលនៃប្រទេសក្រិក ប៉ុន្តែចាប់តាំងពីពេលនោះមក ទឹក​បានស្រកទៅវិញដោយសារតែមានភ្លៀងធ្លាក់តិច និងរលកកំដៅរដូវក្តៅជាបន្តបន្ទាប់។ ជាមួយគ្នានេះនៅក្នុងឆ្នាំនេះប្រទេស​ក្រិកបានប្រឈមនឹងបញ្ហាកង្វះទឹកយ៉ាងធ្ងន់ធ្ងរផងដែរ ដោយសារតែបឹងសិប្បនិម្មិត Mornos ដែលជាអាងស្តុកទឹកដ៏សំខាន់របស់រដ្ឋធានីអាថែន​របស់​ប្រទេស​ក្រិកអស់ជាច្រើនទសវត្សរ៍មកហើយកំពុងធ្លាក់ចុះនូវកម្រិតទឹកគួរឲ្យព្រួយបារម្ភ។

បញ្ហាត្រីងាប់យ៉ាងសន្ធឹកសន្ធាប់នេះបានបណ្ដាលឲ្យអាជីវកម្មនៅតាមមាត់សមុទ្រ ជាពិសេសនៅក្នុងឧស្សាហកម្មម្ហូបអាហារ ឥឡូវនេះកំពុងផ្អាកប្រតិបត្តិការបណ្ដោះអាសន្ន ខណៈក្លិនស្អុយខ្លាំងនៅតាមមាត់សមុទ្រ បង្កផលផលប៉ះដល់ប្រជាពលរដ្ធ និងអ្នកទេសចរដែលវាបានផ្តល់ផលប៉ះពាល់យ៉ាងធ្ងន់ធ្ងរដល់វិស័យទេសចរណ៍ក្នុងទីក្រុង Volos ផងដែរ៕

អត្ថបទ៖ ប៊ុន សុភាព