ព័ត៌មានអន្ដរជាតិ

សភាក្រិកអនុម័តទិញប្រព័ន្ធការពារដែនអាកាស ពីអ៊ីស្រាអែល និងធ្វើទំនើបកម្មកងទ័ពអាកាស

បានផុស

៤ ខែ មុន

នៅ

ថ្ងៃអង្គារ ១៧ មីនា ២០២៦

ដោយ

គណៈកម្មាធិការសភាក្រិកបានអនុម័តគម្រោងទិញប្រព័ន្ធការពារដែនអាកាសច្រើនស្រទាប់និងដ្រូនពីប្រទេសអ៊ីស្រាអែល មានតម្លៃជាង៣ប៊ីលានដុល្លារ រួមទាំងយន្តហោះចម្បាំង F-១៦ ចំនួន៣៨គ្រឿង ដោយតម្លៃសរុបប្រមាណជាង ៤.៦ប៊ីលានដុល្លារ។ នេះបើតាមប្រភពពីរប្រាប់ភ្នាក់ងាររ៉យទ័រកាលពីថ្ងៃចន្ទ ទី១៦ ខែមីនា ឆ្នាំ២០២៦។

ក្រិកកំពុងចរចាជាមួយអ៊ីស្រាអែល ដើម្បីផ្តល់ផ្នែកធំនៃប្រព័ន្ធមីស៊ីលសម្រាប់ការពារផ្នែកលើអាកាស ឬហៅថា «Achilles Shield» មានតម្លៃប៉ាន់ស្មានជាង ៣ប៊ីលានដុល្លា។

យន្តហោះចម្បាំងF-១៦ របស់ប្រទេសក្រិក។ រូបភាព៖ Reuters

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ប្រភពព័ត៌មានជាន់ខ្ពស់មួយរូបនិយាយថា៖ «គណៈកម្មាធិការសភាបានអនុម័តគម្រោងនេះ និងការធ្វើយ៉ាងណាឱ្យយន្តហោះចម្បាំង F-១៦ កាន់តែមានភាពប្រសើរឡើង»។ តាមសេចក្តីរាយការណ៍ សម័យប្រជុំរបស់គណៈកម្មការសភាបានធ្វើឡើងដោយសម្ងាត់បំផុត។

ប្រទេសក្រិកមានគម្រោងទិញយន្តហោះចម្បាំង F-១៦ Block-៥០ ចំនួន៣៨គ្រឿងបន្ថែមទៀត ដែលមានអាយុកាលតាំងពីទសវត្សរ៍ឆ្នាំ១៩៩០ ទៅជាកំណែទម្រង់បែបទំនើប «Viper» ក្នុងតម្លៃជាងមួយប៊ីលានដុល្លា។

យន្តហោះចម្បាំង F-16C Block 50 គឺជាយន្តហោះចម្បាំងពហុមុខងារកម្រិតខ្ពស់ ដែលត្រូវបានអភិវឌ្ឍន៍បន្តពីស៊េរី F-16 មុនៗ ដោយបំពាក់ម៉ាស៊ីន F110-GE-129 ដ៏ខ្លាំងក្លា។ វាមានសមត្ថភាពខ្ពស់ក្នុងការប្រយុទ្ធតាមអាកាស និងការវាយប្រហារលើដី ដោយប្រើរ៉ាដាថ្មី និងអាវុធទំនើបៗដូចជាមីស៊ីល AGM-65D Maverick, គ្រាប់បែកនាំផ្លូវឡាស៊ែរ GBU-12/24 និងកញ្ចប់កំណត់គោលដៅ LITENING។

យ៉ាងណា ប្រទេសក្រិកមានកងនាវាយន្តហោះ F-១៦ ជាង១៥០គ្រឿង និងបានធ្វើឱ្យមានភាពទំនើបជាង ៤០គ្រឿងផងដែរ។

រដ្ឋាភិបាលក្រិក បាននិយាយថា ខ្លួនមានគម្រោងចំណាយសរុបប្រហែល ៣២ប៊ីលានលានដុល្លារ នៅឆ្នាំ២០៣៦ ដើម្បីធ្វើទំនើបកម្មកងកម្លាំងប្រដាប់អាវុធរបស់ខ្លួន ខណៈប្រទេសនេះងើបចេញពីវិបត្តិបំណុលឆ្នាំ ២០០៩-២០១៨ និងព្យាយាមរក្សាល្បឿនជាមួយគូប្រជែងប្រវត្តិសាស្ត្ររបស់ខ្លួន គឺប្រទេសតួកគី។

ការទិញថ្មីនេះក៏ត្រូវការការអនុម័តពីស្ថាប័នធ្វើការសម្រេចចិត្តកំពូលរបស់ប្រទេសលើកិច្ចការការបរទេស និងការពារជាតិ គឺ KYSEA ផងដែរ។

គណៈកម្មាធិការនៅថ្ងៃចន្ទបានផ្តល់សញ្ញាភ្លើងខៀវ សម្រាប់ការធ្វើទំនើបកម្មលើនាវាចម្បាំង MEKO-២០០ ចាស់ចំនួន ៤គ្រឿង និងកិច្ចព្រមព្រៀងថែទាំសម្រាប់យន្តហោះដឹកជញ្ជូនយោធា C២៩J ផងដែរ៕

ប្រែសម្រួល៖ ណឺ មិនា