ព័ត៌មានអន្ដរជាតិ

សមាជិកណាតូ បារាំងនិងក្រិក ពង្រឹងចំណងការពារជាតិ ស្របពេលអសន្តិសុខក្នុងតំបន់

បានផុស

៣ ខែ មុន

នៅ

ថ្ងៃចន្ទ ២០ មេសា ២០២៦

ដោយ

ប្រធានាធិបតីបារាំង លោក អេម៉ានូអែល ម៉ាក្រុង (Emmanuel Macron) នឹងធ្វើដំណើរទៅកាន់ប្រទេសក្រិកនៅសប្តាហ៍ក្រោយ ដើម្បីបន្តកតិកាសញ្ញាសន្តិសុខរវាងប្រទេសទាំងពីរ ដោយផ្អែកលើបរិបទនៃសង្គ្រាមនៅអ៊ីរ៉ង់។ នេះបើយោងតាមមន្ត្រីរដ្ឋាភិបាលក្រិកម្នាក់លើកឡើងកាលពីថ្ងៃអាទិត្យ ដកស្រង់ដោយភ្នាក់ងារសារព័ត៌មានរ៉យទ័រ នៅថ្ងៃទី១៩ ខែមេសា ឆ្នាំ២០២៦ ។

បារាំង និងក្រិក ជាសម្ព័ន្ធមិត្តយូរអង្វែងរបស់នៅក្នុងអង្គការណាតូ បានចុះហត្ថលេខាលើកិច្ចព្រមព្រៀងសន្តិសុខ និងការពារជាតិក្នុងឆ្នាំ ២០២១ ដែលតម្រូវឱ្យពួកគេជួយគ្នាទៅវិញទៅមក ប្រសិនបើមានការវាយប្រហារណាមួយពីសត្រូវ រួមទាំងការទិញនាវាចម្បាំងផលិតនៅបារាំងចំនួនបីគ្រឿង និងយន្តហោះចម្បាំងរបស់បារាំងប្រភេទ Rafale ផលិតដោយក្រុមហ៊ុន Dassault ជាង ២៤ គ្រឿង នៅទីក្រុង Athens ។

ប្រធានាធិបតីបារាំង លោក អេម៉ានូអែល ម៉ាក្រុង។ រូបភាព៖ Reuters

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

មន្ត្រីដែលនិយាយក្នុងលក្ខខណ្ឌមិនបញ្ចេញឈ្មោះថា៖ « ដំណើរទស្សនកិច្ចរបស់ លោក ម៉ាក្រុង ទៅកាន់ប្រទេសក្រិកនៅថ្ងៃទី ២៤-២៥ ខែមេសា នឹងបន្តកិច្ចព្រមព្រៀង [សន្តិសុខជាតិរួមគ្នា] សម្រាប់រយៈពេលប្រាំឆ្នាំទៀត ជាមួយនឹងការបន្តដោយស្វ័យប្រវត្តិបន្ទាប់ពីនោះ»។

មន្ត្រីរូបនោះបន្ថែមថា លោក ម៉ាក្រុង និងរដ្ឋាភិបាលក្រិកក៏នឹងពិភាក្សាអំពីសន្តិសុខដែនសមុទ្រ និងច្រកសមុទ្រ Hormuz ផងដែរ។

គួរបញ្ជាក់ថា ការដឹកជញ្ជូនតាមច្រកសមុទ្រ Hormuz ត្រូវបានជាប់គាំងម្តងទៀតនៅថ្ងៃអាទិត្យ បន្ទាប់ពីអ៊ីរ៉ង់បញ្ជាក់ឡើងវិញនូវការគ្រប់គ្រងលើផ្លូវទឹកយុទ្ធសាស្ត្រនេះ ប៉ុន្មានថ្ងៃមុនពេលបទឈប់បាញ់ដ៏ផុយស្រួយជាមួយសហរដ្ឋអាមេរិក-អ៊ីរ៉ង់កើតឡើងជិតផុតកំណត់។

ប្រទេសក្រិកដឹកនាំបេសកកម្មកងទ័ពជើងទឹករបស់សហភាពអឺរ៉ុបទទួលបន្ទុកការពារកប៉ាល់នៅក្នុងសមុទ្រក្រហម ប៉ុន្តែប្រទេសនេះប្រឆាំងនឹងការចូលរួមក្នុងប្រតិបត្តិការយោធាណាមួយនៅក្នុងច្រកសមុទ្រ Hormuz៕

ប្រែសម្រួល៖ ណឺ មិនា