អ្នកនាំពាក្យ៖ ករណីពលរដ្ឋទៅទទួលអំណោយនៅ​មុខភូមិគ្រឹះអ្នកឧកញ៉ា សុខ គង់ ស្លាប់៤នាក់ ខណៈ៥នាក់ទៀតកំពុងសង្គ្រោះ

លោកវរសេនីយ៍ឯក សំ វិច្ឆិកា អ្នកពាក្យនៃស្នងការដ្ឋាននគរបាលរាជធានីភ្នំពេញ បានឲ្យដឹងនៅមុននេះបន្តិចថា ហេតុការណ៍ប្រជ្រៀតគ្នានៅទីតាំងចែកអំណោយភូមិគ្រឹះរបស់អ្នកឧកញ៉ា សុខ គង់ មានអ្នកស្លាប់ចំនួន៤នាក់ហើយ ខណៈ៥នាក់ផ្សេងទៀតកំពុងសង្គ្រោះបន្ទាន់​នៅមន្ទីរពេទ្យ។ បើតាមលោក សំ វិច្ឆិកា អ្នកស្លាប់ទាំង៤នាក់មានប្រុស២នាក់ និងស្រី២នាក់ ហើយភាគច្រើនជាមនុស្សចាស់ មានបញ្ហាសុខភាព។

អ្នកនាំពាក្យបន្ថែមថា ក្រោយពីកើតមានបាតុភាពនេះកើតឡើង កម្លាំងអាជ្ញាធរបានចុះដល់ទីតាំងនោះ ដើម្បីសម្រួលចរាចរណ៍ និងជួយសង្គ្រោះបន្ទាន់ភ្លាមៗ រួចអស់ហើយដែរ។

សូមបញ្ជាក់ថា​ នៅព្រឹកថ្ងៃទី២៣​ មករា នេះ មានហេតុការណ៍ភ្ញាក់ផ្អើលនៅពេលប្រជាពលរដ្ឋជាច្រើនបាននាំគ្នាប្រជ្រៀតចូលទៅទទួលអំណោយនៅមុខភូមិគ្រឹះអ្នកឧកញ៉ា សុខ គង់ នៅបណ្ដោយមហាវិថីព្រះនរត្ដម ក្នុងសង្កាត់ផ្សារថ្មីទី៣ ខណ្ឌដូនពេញ បណ្ដាលឲ្យមានអ្នកដួលសន្លប់ជាបន្តបន្ទាប់ ត្រូវបានកម្លាំងអាជ្ញាធរចុះសម្របសម្រួល និងបញ្ជូនរថយន្ដសង្គ្រោះបន្ទាន់ទៅមន្ទីរពេទ្យ៕