ផេកផ្លូវការ Miss Cosmo បង្ហាញរូបព្រះនាងតូចគ្រងឈុតបុរាណខ្មែរ រួមនឹងបវរកញ្ញ២រូប ទាក់ក្រសែភ្នែកមហាជន

ផេកផ្លូវកម្មវិធីប្រកួតសម្រស់ Miss Cosmo បានបង្ហាញរូបភាពក្នុងឈុតបុរាណខ្មែរ ដែលគ្រងដោយព្រះនាងតូច នរោត្តម ចេណ្ណា រួមនឹង Miss Cosmo 2024 ២រូប គឺកញ្ញា អុិន លក្ខិណា (Miss Cosmo Cambodia 2024) និង Ketut Permata Juliastrid (Miss Cosmo 2024) ជាមួយរូបរាងដ៏ស័ក្តិសមឥតទាស់ ធ្វើឱ្យមហាជនលាន់មាត់សរសើរគ្រប់ៗគ្នា។

តាមរយៈសំណេរជាភាសាអង់គ្លេស ដែលជាខ្លឹមសារខ្លីទាក់ទងនឹងព័ត៌មានត្រួសៗនៃឈុតបុរាណខ្មែរដ៏មានតម្លៃ សាធារណជាតិ និងអន្តរជាតិ ដែលនិយមតាមដានវិស័យបវរកញ្ញា បានសម្តែងការពេញចិត្តនិងកោតសរសើរយ៉ាងខ្លាំងនូវការតុបតែងកាយជាមួយនឹងឈុតដ៏ប្រណិតនេះ។

ក្នុងខ្លឹមសារនោះ បានរៀបរាប់ថា “តើអ្នកដឹងទេ? របាំអប្សរា​ ដែលតែងតែបង្ហាញខ្លួននៅតាមប្រាង្គប្រាសាទខ្មែរ បានក្លាយជាអត្តសញ្ញាណមួយនៃព្រលឹងវប្បធម៌ និងសិល្បៈខ្មែរ ចាប់តាំងពីសតវត្សទី៩ មកម្ល៉េះ។ តាំងពីបុរាណ របាំមួយនេះ ត្រូវបានគេរាំថ្វាយអាទិទេព ដើម្បីសុំសេចក្ដីសុខដល់ប្រជារាស្ត្រ និងប្រទេសជាតិ។ សព្វថ្ងៃនេះ គេបានចាត់ទុក របាំអប្សរា ជារបាំបុរាណខ្មែរមួយដែលផ្សារភ្ជាប់ជាមួយប្រវត្តិសាស្រ្តដ៏សម្បូរបែបរបស់កម្ពុជា”។

ប្រភពដដែលបន្តថា ឈុតអប្សរានេះ ត្រូវបានគ្រងយ៉ាងស្រស់ស្អាតដោយ ព្រះនាងនរោត្តម ចេណ្ណា ឯកអគ្គរដ្ឋទូតកិត្តិយសនៃ Miss Cosmo Cambodia 2025 រួមជាមួយនឹង Miss Cosmo 2024 និង Miss Cosmo Cambodia 2024 ខណៈឈុតទាំងនេះជាការរៀបចំឡើងដោយ ភួងមាល័យ បាយសីខ្មែរ ។

បើតាម ភួងមាល័យ បាយសីខ្មែរ ចំពោះមកុដដែលព្រះនាងតូច នរោត្តម ចេណ្ណា គ្រង គឺជា «កុដអប្សរប្រាង្គកំពូលបាកាន នៃប្រាសាទអង្គរវត្ត» សាងពីស្ពាន់ស្រោបមាសខ្មែរវិចិត្រកម្មអលង្ការ ប្រកបដោយខេមរៈសោភ័ណ តាមលំអាននៃដូនតាខ្មែរ និងជាការរចនាដោយ ហាងមកុដ និងអលង្ការ ភួងមាល័យ បាយសីខ្មែរ ៕