ម្ចាស់មកុដ Miss Cosmo Cambodia 2025 ត្រៀមទៅប្រកួតលើឆាកអន្តរជាតិ

ឆ្លងកាត់ការប្រកួតយ៉ាងស្វិតស្វាញនិងវគ្គជម្រុះជាច្រើនខែកន្លងមក ទីបំផុតបានរកឃើញម្ចាស់មកុដ Miss Cosmo Cambodia 2025 គឺបានទៅលើកញ្ញា ផន ស្រីពី ខណ:លំដាប់រងទី១បានទៅលើកញ្ញា ប៊ី សុធារី ។

ការប្រឡងវគ្គផ្តាច់ព្រ័ត្រ Miss Cosmo Cambodia 2025 បានធ្វើការផ្សាយផ្ទាល់នៅលើផេកផ្លូវការរបស់ Miss Cosmo Cambodia កាលពីរាត្រីថ្ងៃទី៣០ ខែឧសភា ឆ្នាំ២០២៥ ខណ:បេក្ខនារីម្ចាស់មកុដ Miss Cosmo Cambodia កញ្ញា ផន ស្រពី ត្រូវបានទស្សនិកជនកត់សម្គាល់ឃើញថា នាងមានភាពលេចធ្លោទាំងរូបសម្ផស្ស និងចំណេះដឹងដែលអាចធ្វើបានល្អរហូតដណ្តើមដំណែងម្ចាស់មកុដ។

តាមរយ:ផេកផ្លូវការរបស់ Miss Cosmo Cambodia 2025 បានសរសេរបង្ហោះខ្លឹមសារដោយការចូលរួមអបអរថា “អបអរសាទរដល់កញ្ញា ផន ស្រីពី Srey pi-ស្រីពី ដែលក្លាយជាបវរកញ្ញាឯក Miss Cosmo Cambodia ២០២៥។ កញ្ញានឹងតំណាងឱ្យប្រទេសកម្ពុជានៅលើឆាក Miss Cosmo អន្តរជាតិនាពេលខាងមុខនេះ”។

ជាមួយគ្នានោះដែរ ម្ចាស់មកុដរូបនេះក៏បានបង្ហាញអារម្មណ៍រំភើបសប្បាយរីករាយ និងអរគុណដល់អ្នកគាំទ្រនាងដែលតែងលើកទឹកចិត្តនិងផ្តល់កំលាំងចិត្តដល់នាងគ្រប់ពេល។ កញ្ញា ផន ស្រីពី ម្ចាស់មកុដMiss Cosmo Cambodia 2025 បានប្តេជ្ញាឆន្ទ:របស់ខ្លួនថា នាងនឹងប្រើសំឡេងក្នុងការផ្សព្វផ្សាយវប្បធម៌និងតំបន់ទេសចរណ៍ប្រវត្តិសាស្ត្រអង្គរវត្តដើម្បីបង្ហាញភាពអស្ចារ្យទៅកាន់ឆាកអន្តរជាតិ។

គួររម្លឹកកញ្ញា ផន ស្រីពី មានទេពកោសល្យនិងសមត្ថភាពមិនធម្មតាទេ ខណ:ថ្មីៗកន្លងទៅបវរកញ្ញារូបនេះបានបង្ហាញខ្លួនលើឆាកអន្តរជាតិក្នុងការតំណាងកម្ពុជាចូលរួមប្រកួតកម្មវិធីអន្តរជាតិ Miss Intercontinental 2024 នៅប្រទេសអេហ្ស៊ីប និងបានឈានជើងចូល Top22 ៕ អត្ថបទ៖ ចាន់រ៉ា