ដល់​ពេល​នេះ ​បក្សី​​​​រាប់​សិបម៉ឺនក្បាល​ត្រូវ​សម្លាប់​ សង្ស័យ​​មាន​មេរោគផ្តាសាយបក្សី​​កាចសាហាវ

បសុ​បក្សីរាប់ពាន់ក្បាលត្រូវបានសម្លាប់​​​បន្ថែមទៀត បន្ទាប់​ពីការ​រកឃើញមេរោគផ្ដាសាយបក្សីដ៏កាចសាហាវ​នៅ​កសិដ្ឋាន​ចិញ្ចឹម​​បក្សី​​បែ​ប​ពាណិជ្ជកម្ម​មួយ​កន្លែង ក្នុង​ County Tyrone ដែលជាស្រុកមួយក្នុងចំណោមស្រុកទាំង៦​នៃប្រទេសអៀរឡង់​ខាងជើង។ នេះបើយោងតាមការចេញផ្សាយរបស់សារព័ត៌មាន BBC នៅថ្ងៃទី២៤ខែកុម្ភៈនេះ។

សត្វស្លាបជិត ១៦០០០ ក្បាលនៅកសិដ្ឋានក្បែរភូមិ Pomeroy នៅក្នុង​County Tyrone នឹងត្រូវបានសម្លាប់បន្ថែមទៀត​ បន្ទាប់ពីសត្វស្លាបប្រហែល ៦៤០០០ក្បាលត្រូវបានសម្លាប់នៅកសិដ្ឋានចិញ្ចឹមបក្សីពាណិជ្ជកម្មនៅជិតទីក្រុង Dungannon កាលពីមួយសប្តាហ៍មុន។

រដ្ឋមន្ត្រីក្រសួងកសិកម្ម បរិស្ថាន និងកិច្ចការជនបទ លោក Andrew Muir បាននិយាយថា ការធ្វើតេស្តបឋមនៅកសិដ្ឋាន Pomeroy កាលពីថ្ងៃសៅរ៍ បង្ហាញពីវត្តមានរបស់មេរោគផ្តាសាយបក្សី H5N1 ដ៏កាចសាហាវ។

លោកថា៖«វាជាការចាំបាច់ដែលម្ចាស់សត្វស្លាបទាំងអស់ត្រូវប្រកាន់ខ្ជាប់នូវវិធានការការពារជីវសុវត្ថិភាពយ៉ាងតឹងរ៉ឹងដើម្បីការពារហ្វូងសត្វរបស់ពួកគេ និងរាយការណ៍ករណីគួរឱ្យសង្ស័យណាមួយជាបន្ទាន់»។

ប្រធានពេទ្យសត្វក៏បានជំរុញឱ្យម្ចាស់កសិដ្ឋានទាំងអស់អនុវត្តតាមឱ្យបានពេញលេញជាមួយនឹងតម្រូវការទាំងអស់ដែលបានអនុវត្តដើម្បីព្យាយាមគ្រប់គ្រងជំងឺនេះ។

ហ្វូងសត្វដែលមានកម្មសិទ្ធិទាំងអស់នៅក្នុងប្រទេសអៀរឡង់ខាងជើង មិនថាជាសត្វពាហនៈ ឬបក្សីដែលចិញ្ចឹមនៅទីវាល បច្ចុប្បន្នកំពុងត្រូវបានជំរុញឲ្យចិញ្ចឹមក្នុងទ្រុងដើម្បីការពារជំងឺដែលប៉ះពាល់ដល់វិស័យនេះ ខណៈឧស្សាហកម្មបសុបក្សីនៅអៀរឡង់ខាងជើងមានតម្លៃ ០.៦ ពាន់លានផោនស្មើនឹងប្រមាណ៧៦លានដុល្លារដល់សេដ្ឋកិច្ច។

គួរបញ្ជាក់ថាជំងឺផ្ដាសាយបក្សីមិនមែនមានតែនៅ អៀរឡង់ទេ នៅសហរដ្ឋអាមេរិកក៏កំពុងតែមានការផ្ទុះឡើងនៃជំងឺនេះផងដែរ ដែកធ្វើឲ្យតម្លែស៊ុតហកឡើងយ៉ាងខ្លាំង។ រហូតមកដល់ពេលនេះ ការផ្ទុះឡើងនៃជំងឺផ្តាសាយបក្សីបានបណ្តាលឱ្យសត្វបក្សីរាប់សិបលានក្បាលងាប់ ប៉ះពាល់ដល់ហ្វូងសត្វគោក្របីជិត១០០០ក្បាល និងបានឆ្លងដល់មនុស្សយ៉ាងហោចណាស់ ៧០ នាក់ ក្នុងនោះមានមនុស្សម្នាក់បានស្លាប់ផងដែរ៕

អត្ថបទ៖ ប៊ុន សុភាព