ផ្ទុះបាតុកម្មហិង្សាប្រឆាំង​ជន​អន្តោប្រវេសន៍ក្នុងទីក្រុង Dublin ប្រទេសអៀរឡង់

មនុស្សជាង ១ពាន់នាក់បានចូលរួមបាតុកម្ម​​ដែល​​បង្ក​ទៅ​ជា​ហិង្សា​ប្រឆាំងជនអន្តោប្រវេសន៍​នៅភាគនិរតីទីក្រុង Dublin ប្រទេសអៀរឡង់ បន្ទាប់ពីមានសេចក្តីរាយការណ៍ថា អ្នកស្វែងរកសិទ្ធិជ្រកកោនអាយុ២៦ឆ្នាំ បានរំលោភផ្លូវភេទលើក្មេងស្រីអាយុ ១០ ឆ្នាំនៅជិតសណ្ឋាគារ Citywest ដែលប្រើដើម្បីធ្វើជាផ្ទះរបស់អ្នកស្វែងរកសិទ្ធិជ្រកកោន។ នេះបើយោងតាមការចេញផ្សាយរបស់សារព័ត៌មាន Al Jazeera កាលពីថ្ងៃទី២២ខែតុលា។

ការតវ៉ាបានប្រែក្លាយជាហិង្សាភ្លាមៗ នៅពេលដែលក្រុមបាតុករបានគប់ដប បាញ់កាំជ្រួច និងដុតឡានប៉ូលិស ខណៈពួកគេស្រែកពាក្យស្លោកប្រឆាំងជនអន្តោប្រវេសន៍ដូចជា «ជីវិតអៀរឡង់សំខាន់» និង «ដកជនអន្តោប្រវេសន៍ចេញ» ។

រដ្ឋមន្ត្រីយុត្តិធម៌អៀរឡង់ លោក Jim O’Callaghan បានថ្កោលទោសអំពើហិង្សានេះថាជាការប៉ុនប៉ងដើម្បី «ធ្វើឱ្យមានការមិនពេញចិត្ត» ខណៈដែលនាយករដ្ឋមន្រ្តីអៀរឡង់លោក Micheal Martin បានហៅស្ថានភាពនេះថាធ្ងន់ធ្ងរបំផុត។

ភាពចលាចលនេះបានរំឭកឡើងវិញនូវបាតុកម្មស្រដៀងគ្នាកាលពីខែវិច្ឆិកា ឆ្នាំ ២០២៣ដែលក្រុមប្រឆាំងអន្តោប្រវេសន៍បានដុតរថយន្ត និងវាយប្រហារប៉ូលិសនៅកណ្តាលទីក្រុង Dublin បន្ទាប់ពីមានឧប្បត្តិហេតុចាក់សម្លាប់បុរសជនជាតិអាល់ហ្សេរី។

គួរបញ្ជាក់ថាអៀរឡង់ និងចក្រភពអង់គ្លេសថ្មីៗនេះបានជួបប្រទះការកើនឡើងនៃមនោសញ្ចេតនាប្រឆាំងនឹងអន្តោប្រវេសន៍។ ទោះបីជាមិនមានសមាជិកស្តាំនិយមក្នុងសភាក៏ដោយ ក៏អៀរឡង់កំពុងមានភាពតានតឹងកាន់តែខ្លាំងឡើងលើជនអន្តោប្រវេសន៍ ដែលនាំឱ្យមានការផ្ទុះឡើងនូវអំពើហិង្សាជាបន្តបន្ទាប់នៅទូទាំងប្រទេស៕

អត្ថបទ៖ ប៊ុន សុភាព