ម្ចាស់ផលិតកម្ម LD កោតសរសើរ បញ្ញា សិទ្ធ ដែលឱ្យតម្លៃកុនក្នុងស្រុក តាមរយៈការបំផុសមហាជនរួមគ្នាគាំទ្រ

លោក លៀក លីដា ផលិតករភាពយន្តខ្មែរ និងជាថៅកែផលិតកម្ម LD បានលើកសរសើរនិងចាត់ទុកតារាសម្តែងលោក បញ្ញា សិទ្ធ ជាអ្នកសិល្ប:គំរូល្អម្នាក់ដែលចេញគិតគូរ និងឱ្យតម្លៃលើភាពយន្តជាតិ តាមរយ:ការបំផុសមហាជនរួមគ្នាគាំទ្រ។

លោក លៀក លីដា បានលើកឡើងដូច្នេះ ស្របពេលដែលលោក បញ្ញា សិទ្ធ បានលើកឡើងពីភាពអស្ចារ្យនៃស្នាដៃផលិតរឿង «ភ្លើងឆេះក្លឹបក្រោមដី» របស់ផលិតកម្ម LD ដែលកំពុងចាក់បញ្ចាំងនៅតាមរោងកុនផ្ទុះការគាំទ្រ និងសរសើរទឹកដៃនៃការផលិតហើយដឹកនាំសម្តែងបានល្អ។

តាមរយ:កិច្ចសម្ភាសន៍មួយតារាសម្តែងស្រស់សង្ហាលោក បញ្ញា សិទ្ធ បានបំផុសនូវចំណាប់អារម្មណ៍ដោយចង់ឱ្យបងប្អូនទស្សនិកជនគួរទៅទស្សនាភាពយន្តរឿង «ភ្លើងឆេះក្លឹបក្រោមដី» ឱ្យហើយជៀសវាងស្ដាយក្រោយ។ ឆ្លើយតបនឹងការបំផុសនេះលោក លៀក លីដា ដែលជាផលិតករបានបង្ហាញមោទនភាពនឹងសរសើរទឹកចិត្ត បញ្ញា សិទ្ធ។

លោក លៀក លីដា បានលើកឡើងថា វប្បធម៌នៃការអបអរអ្នកដទៃ បងមិនដែលបានហៅប្អូនថតសូម្បីតែមួយរឿងហើយក៏មិនបានជួលឱ្យប្អូនមកប្រូម៉ូតរឿងបងដែរ តែនេះគឺជាចរិតដែលល្អរបស់ប្អូន ចូលរួមអបអរលើភាពជោគជ័យរបស់អ្នកដទៃ។ ខណៈនេះ ត្រូវបានគេចាត់ទុកថា ជាទង្វើដ៏គំរូសម្រាប់អ្នកគាំទ្រផងដែរ។

ភាពយន្តរឿង «ភ្លើងឆេះក្លឹបក្រោមដី» គឺផលិតឡើងដោយបានដកស្រង់ចេញពីរឿងពិតដែលបានកើតមានឡើងនៅក្នុងខេត្តសៀមរាបកាលពីកន្លងទៅ ខណ:ដែលរឿងនេះកំពុងចាក់បញ្ចាំង ក៏ទទួលបាននូវការសរសើរនិងគាំទ្រច្រើនផងដែរ។

ដោយឡែក បើក្រឡេកទៅមើលតួអង្គសម្តែងក្នុងរឿងនេះដោយភាគច្រើនតួអង្គសំខាន់ៗ ត្រូវបានមហាជនឃើញថាសុទ្ធសឹងតែមានសមត្ថភាពក្នុងការសម្តែង៕ អត្ថបទ៖ ចាន់រ៉ា