ព័ត៌មានអន្ដរជាតិ

ពូទីនផ្តើមសន្ទនាជាមួយត្រាំ ដោយការអបអរត្រាំ បានចៅប្រុសទី១១ដែលទើបកើត

បានផុស

២ ខែ មុន

នៅ

ថ្ងៃអង្គារ ២០ ឧសភា ២០២៥

ដោយ

មេដឹកនាំនៃប្រទេសមហាអំណាចនុយក្លេអ៊ែរ សហរដ្ឋអាមេរិក និង រុស្ស៊ី បានចាប់ផ្តើមការសន្ទនាទូរស័ពដ៏កម្រលើជម្លោះនៅអ៊ុយក្រែនជាង២ម៉ោង ដោយការចាប់ផ្តើមពីការអបអរសាទររបស់ប្រធានាធិបតីរុស្ស៊ី លោក វ៉្លាឌីមៀរ ពូទីន ចំពោះ ប្រធានាធិបតីសហរដ្ឋអាមេរិកដែលទទួលបានចៅប្រុសទី១១ ដែលទើបនឹងកើត និងការជួនពរកូនស្រីពៅរបស់លោក ដូណាល់ ត្រាំ និង ចៅទី១១មានសុខភាពល្អ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ក្រសួងការបរទេសរុស្ស៊ី បានបង្ហោះសារអត្ថាធិប្បាយបន្ថែមរបស់ជំនួយការ ប្រធានាធិបតីរុស្ស៊ី លោក Yuri Ushakov ដែលលើកឡើងថា៖«អ្វីដែលគួរឱ្យចាប់អារម្មណ៍ដែលបានចាប់ផ្តើមដោយប្រធានាធិបតីរបស់យើង [ពូទីន] បានអបអរសាទរលោក ដូណាល់ ត្រាំ ចំពោះកំណើតរបស់ចៅប្រុសទី១១ និងសូមជូនពរឱ្យទារកទើបនឹងកើតនិងកូនស្រីរបស់លោក ត្រាំ មានសុខភាពល្អ»។

តាមការបង្ហោះរបស់ក្រសួងបរទេសរុស្ស៊ី ការសន្ទនាលើកនេះតាមទូរស័ព្ទរបស់ប្រមុខរដ្ឋមហាអំណាចទាំងពីរ គឺជាការសន្ទនាលើកទីបី ចាប់តាំងពីការចូលកាន់អំណាចរបស់រដ្ឋបាលរបស់លោក ដូណាល់ ត្រាំ នៅសេតវិមាន ដែលត្រូវបានពិភពលោកមើលឃើញថា រដ្ឋបាលលោកដូណាល់ ត្រាំ បានក្រឡុកនយោបាយសកលយ៉ាងខ្លាំងបន្ទាប់ពីការចូលកាន់អំណាចត្រឹម៤ខែនេះ។

លោក Yuri Ushakov បានសរសេរថា៖«ការសន្ទនាត្រូវបានធ្វើឡើងតាមរបៀបគោរពគ្នាទៅវិញទៅមក ដែលនេះឆ្លុះបញ្ចាំងពីលក្ខណៈនៃទំនាក់ទំនងផ្ទាល់ខ្លួនរវាងអ្នកដឹកនាំរបស់យើង [ពូទីន]។ បន្ទាប់ពីពាក្យដ៏កក់ក្ដៅទាំងនេះ លោកប្រធានបានប្តូរទៅរបៀបវារៈដែលរៀបចំឡើងភ្លាមៗ»។

អ្នកនាង Tiffany Trump ដែលជាកូនស្រីពៅរបស់ប្រធានាធិបតីសហរដ្ឋអាមេរិក លោក ដូណាល់ ត្រាំ ជាមួយប្រពន្ធទី២ គឺអ្នកស្រី Marla Maples បានរៀបការជាមួយលោក Michael Boulos កាលឆ្នាំ២០២២ និងទើបបានផ្តល់កំណើតកូនប្រុសនៅថ្ងៃទី១៥ ខែឧសភា ពោលគឺប៉ុន្មានថ្ងៃប៉ុណ្ណោះ មុនការសន្ទនារវាងបុរសដែលដឹកនាំប្រទេសមហាអំណាចទាំងពីរកើតឡើង។

យោងសារព័ត៌មាន eonline ចុះផ្សាយកាលថ្ងៃទី១៦ឧសភា ដោយដកស្រង់ការបង្ហោះរបស់នាង Marla Maples លើបណ្តាងសង្គម Instagram ថា៖«សូមស្វាគមន៍មកកាន់ពិភពលោកកូនប្រុសដ៏ផ្អែមល្ហែមរបស់យើង គឺAlexander Trump Boulos។ យើងស្រឡាញ់អ្នកលើសពីពាក្យ! អរគុណដែលចូលមកក្នុងជីវិតយើង! ៥.១៥.២០២៥។»

នាង Tiffany និងលោក Michael Boulos បានជួបគ្នាក្នុងឆ្នាំ២០១៨ និងបានរៀបការនៅក្នុងខែវិច្ឆិកាឆ្នាំ២០២២ ក្នុងលំនៅឋានរបស់លោក ត្រាំ នៅ Mar-a-Lago រដ្ឋផ្លរីដា សហរដ្ឋអាមេរិក៕

ដោយ រ៉ាន់ រើយ