ឌី សូនីតា ក្តុកក្តួលនឹងទឹកចិត្តម្តាយចំពោះខ្លួន តែការបង្ហាញអារម្មណ៍របស់គាត់ ធ្វើឱ្យនាងយល់ថាជាបរាជ័យ

តារាសម្តែងអ្នកនាង ឌី សូ​នី​តា បានបញ្ចេញអារម្មណ៍​ក្តុកក្តួលជាងខ្លាំង ខណ:ដែលអ្នកម្តាយ​ជាទីស្រលាញ់បាន​យំ​ឱបខ្លួន និងពោល​ពាក្យអាណិត​មក​លើ​រូប​នាង ព្រោះមើលឃើញ​ពី​ការ​នឿយហត់នៅ​ក្នុង​ការ​ខិតខំ​រក​ប្រាក់​មក​ផ្គត់ផ្គង់​គ្រួសារ​តែ​ម្នាក់ឯងជា​ច្រើន​ឆ្នាំ​មកនេះ។

អ្នកនាង ឌី សូនីតា បាន​រៀបរាប់ភ្ជាប់​ជាមួយ​សំ​ណេ​រ ដែលជាសម្តីម្តាយនិយាយទៅកាន់ខ្លួនដូច្នេះថា “កូន​ម៉ែ​ស្អាតណាស់ តែ​ហេតុ​អី​បានកូន​ម៉ែ​មិន​ស្រណុក?”។ ​មួយ​ឃ្លា​នេះ ធ្វើឱ្យតារាស្រីរូបនេះ ក្តុកក្តួលឥតឧបមានិងរៀបរាប់ថា ខ្លួនពិត​រក​ចម្លើយឱ្យម្តាយ​មិនបានឡើយ។

មហាជនភាគច្រើនសុទ្ធតែជ្រាបហើយពីជីវិតរបស់អ្នកនាង ឌី សូនីតា ដែលក្នុងនាមកូន ជាម្តាយ និងដើរតួនាទីជាមេគ្រួសារផង តារាស្រីរូបនេះ ពិតជាសកម្មខ្លាំងក្នុងមុខជំនួញផ្ទាល់ខ្លួន ពិសេសសំអាងការតែម្តង ក៏ដើម្បីតែផ្គត់ផ្គង់គ្រួសារឱ្យរស់នៅបានសុខស្រួល។

ភាពហត់នឿយក្នុងកាតព្វកិច្ចរ៉ាប់រងលើគ្រួសារ ម្តាយរបស់តារាស្រីរូបនេះពិតជាបានមើលឃើញ និងតែងតែបង្ហាញក្តីសោកសង្រេងអាណិតកូន។ ដោយហេតុនេះ ទើបគាត់តែងតែយំរាល់លើកដែលឃើញកូនហត់ និងប្រឹងប្រែងក្នុងជីវិត តែតថភាពនេះ ធ្វើឱ្យអ្នកនាង ឌី សូនីតា បែរជាមានអារម្មណ៍ថាបរាជ័យទៅវិញ។

តាមរយៈសារបង្ហោះពីគណនីហ្វេសប៊ុក អ្នកនាង ឌី សូនីតា រៀបរាប់ដូច្នេះថា “នាង​គិត​ច្រើន​តែ​រឿង​ខ្ញុំ​មួយ​មុខ​គត់ នាង​អាណិតកូន​រហូត​ដល់​គិត​ច្រើន ឃើញ​កូន​ស្អាត​ក៏​យំ ឃើញ​កូន​ហត់​ក៏​យំ ឃើញ​កូន​រវល់​ក៏​យំ ខ្ញុំ​ពិតជា​ចុក​ទ្រូង​ណាស់ មាន​អារម្មណ៍​ថាបរាជ័យ ខ្ញុំ​ប្រឹង​គ្មាន​ន័យ ពេល​ដែល​ឃើញ​គាត់​មិន​រីករាយ​បែប​នេះ​”។

អ្នកនាង ឌី សូ​នី​តា បញ្ជាក់​ប្រាប់​មហាជន​ទៀត​ថា “អ្នក​ម្ដាយ​ខ្ញុំឃើញ​ខ្ញុំ​រ៉ាប់រង​គ្រួសារ​តែ​ម្នាក់ឯង ១០០​មុខ​ម្ម្នាក់ឯង គាត់​ពិបាកចិត្ត​ជំនួស​យើង ខ្ញុំ​ក៏​ប្រាប់​គាត់​ដោយ​ក្ដី​ស្រលាញ់​ថា (​ម៉ាក់​កុំ​ពិបាកចិត្ត​ជំនួស​កូនម៉ាក់​ធ្វើ​ម៉េច​ថែ​សុខភាព​ខ្លួនឯង​ឱ្យ​ល្អ ទោះ​ម៉ាក់​ពិបាកចិត្ត​ក៏​វា​នៅ​តែ​ប៉ុណ្ណឹង ចុះបើ​ម៉ាក់​ឈឺ​ទៀត កូន​រឹតតែ​លំបាក​ថែម​ទៀត ​គាត់​ក៏​បើក​ចិត្ត​ទម្លាក់​ចុះ ហើយ​ធ្វើ​តាម​ខ្ញុំ​ប្រាប់​…”។

ឌី សូនីតា ថា ខ្លូនស៊ូ​លំបាក​ម្នាក់ឯង តែនាងមិន​ចង់​ឃើញ​ទឹកភ្នែកម្តាយទេ ទោះហត់​និង​លំបាក​ប៉ុណ្ណា​ មិន​ដែល​យំ​ឬ​ត្អូញត្អែ​រឱ្យ​ម្តាយ​ឮឬ​ឃើញ​ដែរ រហូតពេល​ខ្លះ​រឹង​មាំ​ពេក​ដល់​ថ្នាក់គាត់​សួរសុខទុក្ខ៕ ចាន់រ៉ា