ជីវិតកម្សាន្ដ

ឌី សូនីតា បកស្រាយច្បាស់ៗ ក្រោយបញ្ចប់ទំនាក់ទំនងជាមួយ ចន អេឡិចហ្សូរ៉ា

បានផុស

១១ ខែ មុន

នៅ

ថ្ងៃសុក្រ ២៨ មេសា ២០២៣

ដោយ

ក្រោយពីមានការជជែកវែកញែកជុំវិញរឿងរ៉ាវដែលថា តារាសម្ដែងលោក ចន អេឡិចហ្សូរ៉ា ពុំមែនជាស្វាមី និងឪពុករបស់កូននោះ តារាសម្តែងអ្នកនាង ឌី សូនីតា បានចេញមុខបញ្ជាក់យ៉ាងច្បាស់ៗ ដើម្បីស្រាយចម្ងល់មហាជន។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

បើតាមការបកស្រាយរបស់តារាសម្តែងអ្នកនាង ឌី សូនីតា បានរៀបរាប់ថា «ថ្ងៃនេះទូរស័ព្ទខ្ញុំជិតផ្ទុះ ដោយសារមានសារជាច្រើនផ្ញើមក មើលហើយក៏ស្លុតចិត្ត ជាពិសេសឮម្ដាយទាំងសងខាងរបស់ពួកខ្ញុំ ឆាតមក ខ្ញុំមានអារម្មណ៍ថាខុសធ្ងន់ទៀតហើយដែលធ្វើឲ្យពួកគាត់ពិបាកចិត្តដោយសារទង្វើរបស់ពួកខ្ញុំ។ មានមនុស្សជាច្រើនដែលចង់ដឹងរឿងរបស់ពួកខ្ញុំ ហើយពួកខ្ញុំមិនទម្លាប់យករឿងដែលអវិជ្ជមានបង្ហាញនៅលើបណ្ដាញសង្គមទេ»។

អ្នកនាង ឌី សូនីតា និយាយទៀតថា «ពួកខ្ញុំខំស្ងាត់កន្លងមក ក៏ដោយសារតែគិតថា រឿងរបស់ពួកខ្ញុំ អ្នកណាខុស ឬត្រូវ ក៏ជារឿងរបស់ពួកខ្ញុំ ជីវិតរបស់ពួកខ្ញុំការពិតបែបណា ទោះបីបង្ហាញ ឬ មិនបង្ហាញឲ្យគេដឹង ក៏នៅតែជារឿងរបស់ពួកខ្ញុំ ពួកខ្ញុំអ្នកជួប ពួកខ្ញុំអ្នកដោះស្រាយ។ ចម្លែកអ្វីតែបងស្រីនោះ យករឿងរបស់ពួកខ្ញុំមកវែកញែករកហេតុផល។ បងស្រី ខ្ញុំនិយាយត្រង់ ខ្ញុំមិនដែលមានរឿងជាមួយបងសូម្បីតែម្ដង ទោះបីជាកន្លងមកបងបានធ្វើអ្វីខ្លះ និងនិយាយអ្វីខ្លះដាក់ខ្ញុំ ក៏ខ្ញុំនៅតែមិនមាត់។ ហើយបងដឹងថាខ្ញុំដឹងរឿងមកពីណាទេ គឺ បងប្រុសជាអ្នកប្រាប់ខ្ញុំ ហើយឲ្យខ្ញុំស្ងាត់រហូតមកដល់ពេលនេះ»។

តារាស្រី ឌី សូនីតា លើកឡើងថា «ពេលដែលពួកខ្ញុំបញ្ចប់ទំនាក់ទំនងជាង ១ ឆ្នាំមកហើយ បងក៏វាយប្រហារខ្ញុំចំមុខតែម្ដង។ បងស្រីនិយាយមកហាក់ដឹងច្បាស់ថា ជីវិតពួកខ្ញុំពីរនាក់បានជួបរឿងអីខ្លះអញ្ចឹង នៅមកភ្ជាប់ប្រធានបទកូនស្រីខ្ញុំចូលទៀត។ ខ្ញុំបញ្ជាក់ប្រាប់បងដោយបើកចំហដែរចុះថា ទោះកូនខ្ញុំឪពុកជាអ្នកណាក៏ជារឿងរបស់ពួកខ្ញុំ សំខាន់ពួកខ្ញុំទទួល និងប្រឈមមុខទៅថ្ងៃមុខជាមួយគ្នាបែបណា? ពួកខ្ញុំបានដើរតួនាទីធ្វើឪពុកម្ដាយគេបានដោយល្អកម្រិតណា? ដោយមានទំនួលខុសត្រូវបែបណា? បន្ទាប់ពីការដែលខ្វែងគំនិតគ្នាមានរឿងជាច្រើនដែលកើតឡើងក្នុងជីវិតពួកខ្ញុំ ពួកខ្ញុំក៏សម្រេចចិត្តបញ្ចប់ បញ្ចប់ដោយស្ងប់ស្ងាត់ ដោយអភ័យ ដោយសន្តិវិធី ដោយអស់ចិត្ត ហើយមិនព្យាយាមលាតត្រដាងទេ ព្រោះគិតដល់កូន»។

អ្នកនាង ឌី សូនីតា បន្តថា «ហេតុអ្វីពេលនេះបងទើបមកបើកកកាយវែកញែក? ខ្ញុំគិតថា បងជាម្តាយគេមួយរូប បងគួរតែយល់ក្នុងនាមជាម្តាយ តែមើលទៅបងហាក់ដូចជាចង់បានអ្វីម្យ៉ាងទាំងដែលមិនមែនរឿងរបស់បង។ បងនិយាយមកហាក់ទាមទារយុត្តិធម៌ឲ្យ បង សូរ៉ា ទាំងដែលបងមិនបានដឹងហេតុផលពួកយើងទាំងពីរឲ្យច្បាស់នៅឡើយ។ បងគិតតែប៉ុននេះចុះ ជីវិតមួយនេះវាមិនស្រស់បំព្រងដូចអ្វីដែលយើងគិត និងប៉ងទេ គ្មានអ្នកណាម្នាក់ចង់មានរឿងឲ្យឈឺក្បាលទេ ពួកខ្ញុំក៏មិនទម្លាប់ចង់ល្បីដោយរឿងមិនល្អដែរ»។

អ្នកនាង ឌី សូនីតា និយាយទៀតថា «ពួកខ្ញុំបានមកដល់ដំណាក់កាលនេះមិនមែនតិចដងទេដែលពួកយើងព្យាយាមផ្សះផ្សាគ្នារកចំណុចកណ្ដាលដើម្បីបន្ត ប៉ុន្តែជីវិតពួកខ្ញុំក៏វាមិនដូចអ្វីដែលមហាជន ក៏ដូចជាបងស្រីគិត រឿងពួកខ្ញុំវានៅតែជារឿងពួកខ្ញុំដដែល ទោះបីបងគិតថាដឹងច្បាស់ក៏នៅតែមិនច្បាស់។ មនុស្សពីរនាក់បើសុទ្ធតែជាអ្នកត្រូវ ក៏មិនបែកបាក់គ្នាដែរ វាមានហេតុ និងផល ហើយហេតុផលអស់ទាំងនោះ គឺនៅតែជារឿងផ្ទៃក្នុងរបស់ពួកខ្ញុំ សំខាន់ថាតើយើងរើសផ្លូវមួយណាដែលជាជម្រើសល្អសម្រាប់រវាងគ្នា និងគ្នា។ មកដល់ពេលនេះខ្ញុំមិនដែលនិយាយថា អ្នកណាត្រូវ អ្នកណាខុស ដឹងតែម្យ៉ាង គឺបញ្ចប់ទំនាក់ទំនងរួចហើយ»។

ឌី សូនីតា និយាយថា «បងសូរ៉ា ជាមនុស្សតែម្នាក់ដែលមិនទម្លាប់និយាយរឿងអវិជ្ជមានរបស់ខ្លួនទៅកាន់ក្រុមគ្រួសារទេ ព្រោះគាត់ស្រលាញ់ម្តាយគាត់ណាស់ ហើយដោយសារតែបែបនេះទើបពួកខ្ញុំក៏មិនចង់បង្ហាញពីរឿងអវិជ្ជមានមួយយចំនួនទៅកាន់ពួកគាត់ដែរ រឿងរបស់ពួកខ្ញុំមួយចំនួន សូម្បីតែអ្នកម្តាយពួកយើងក៏មិនដឹងផង។ ពួកគាត់ចាស់ៗហើយ មិនគួរមកពិបាកចិត្តខ្លាំងដោយសារពួកខ្ញុំ តែទីបញ្ចប់បងស្រីក៏លើកយករឿងហ្នឹងមកវែកញែកឲ្យគ្រួសារខ្ញុំទាំងពីរពិបាកចិត្តរហូតដល់ប៉ះពាល់អារម្មណ៍ពួកគាត់។ បងស្រី មិនខ្លាចបាបកម្មដោយមិនដឹងខ្លួនដោយសារតែទង្វើដែលឈឺឆ្អាលរឿងរបស់អ្នកដទៃហួសហេតុចឹងទេ?។ ខ្ញុំពិតជាសោកស្ដាយនៅកំហុសរបស់ខ្ញុំដែលធ្វើជាម្តាយគេមិនបានល្អ ហើយឲ្យគេលើកយកកូនមកធ្វើជាប្រធានបទបែបពេបជ្រាយគាត់ទាំងដែលគាត់មិនទាន់ដឹងអី ឈឺណាស់ ឈឺពិតមែន។ ជាចុងក្រោយ ខ្ញុំសូមផ្តាំទៅបងស្រីវិញថា ទោះបីជាកូនស្រីខ្ញុំជាកូន ឬមិនមែនកូនរបស់បងសូរ៉ា ក៏គាត់នៅតែជាកូនរបស់ខ្ញុំ មិនមែនជាកូនស្រីរបស់ប្តីបងទៅបានហើយ ហើយរឿងបងបំផ្លើសការពិតដែលថាឪពុកកូនខ្ញុំជាអ្នកណានិយាយដូចការពិតនោះ បងចាំត្រៀមខ្លួនផង។ បញ្ជាក់ ចាប់ពីពេលនេះ ម៉ោងនេះ កូនខ្ញុំជាកូនរបស់ ឌី សូនីតា តែម្នាក់ មិនមានឪពុកទេ បង សូរ៉ា ក៏មិនត្រូវជាអ្វីនឹងកូនខ្ញុំ ហើយនឹងខ្ញុំដែរ។ កូនខ្ញុំគ្មានឪពុកតាំងពីដើម»។ ឌី សូនីតា បន្ថែម៕

អត្ថបទ ៖ ចាន់រ៉ា