គណៈបញ្ជាការ​ឯកភាព​រាជធានី ​ទទួល​ខុស​ត្រូវ​លើ​សន្តិសុខ ក្នុងកម្មវិធីព្យុហយាត្រា​សាមគ្គីភាព របស់​ស.ស.យ.ក.

លោក​សន្តិបណ្ឌិត នេត សាវឿន ឧបនាយករដ្ឋមន្ត្រី បាន​សម្រេច​ក្នុង​ការ​ប្រគល់ភារកិច្ច​ដ៏ធំ​មួយ​ជូន​ទៅ​លោកឃួង ស្រេង អភិបាល​នៃគណៈអភិបាលរាជធានីភ្នំពេញ និង ជាប្រធានគណៈបញ្ជាការ​ឯកភាព​រាជធានីភ្នំពេញ នោះគឺ​កិច្ចការ ការពារ​សន្តិសុខ សុវត្ថិភាព ឱ្យបានជោគជ័យ១០០% ក្នុង​កម្មវិធី ព្យុហយាត្រាសាមគ្គីភាព របស់សហភាពសហព័ន្ធយុវជន កម្ពុជា ដែលគ្រោងនឹងធ្វើឡើងនាព្រឹកថ្ងៃទី១៨មិថុនាខាងមុខនេះ។

ការ​សម្រេចរបស់​លោក​សន្តិបណ្ឌិត នេត សាវឿនបានធ្វើឡើង នារសៀលថ្ងៃទី១៦ ខែមិថុនា ឆ្នាំ២០២៥នេះ ក្នុងកិច្ចប្រជុំពិភាក្សាស្តីពីការរៀបចំកម្មវិធី ព្យុហយាត្រាសាមគ្គីភាព របស់សហភាពសហព័ន្ធយុវជន កម្ពុជានៅសាលារាជធានីភ្នំពេញ។

លោក​សន្តិបណ្ឌិត នេត សាវឿន បានមានប្រសាសន៍លើកឡើងថា បញ្ហា​សន្តិសុខសុវត្ថិភាពនៅក្នុងកម្មវិធី ព្យុហយាត្រា​សាមគ្គីភាព របស់សហភាពសហព័ន្ធយុវជន កម្ពុជា ត្រូវបានប្រគល់ជូនលោកឃួង ស្រេង ដែលជា​ប្រធានគណៈបញ្ជាការឯកភាពរាជធានីភ្នំពេញ ដោយកងកម្លាំងប្រដាប់អាវុធទាំង៣ប្រភេទ មានទាំងកម្លាំងប៉ូលិស កង​រាជអាវុធហត្ថ​និង​កង​អង្គរក្ស​ជា​អ្នក​គាំទ្រ​ដោយ​ផ្ទាល់ ដាច់​ខាត​ពិធី​នេះ​ត្រូវ​តែ​រក្សា​ឱ្យ​បានសន្តិសុខ សុវត្ថិភាព ១០០% មិនត្រូវ​ឱ្យមានហេតុការណ៍អ្វីកើតឡើងដាច់ខាត ទាំង​នៅ​ក្នុងរាជធានីភ្នំពេញនិងផ្លូវចេញ ចូលរាជធានីភ្នំពេញ ព្រោះថា នេះ​ជាព្រឹត្តិការណ៍នយោបាយដ៏ធំ​បំផុត​ដែល​យើង​ត្រូវ​តែ​ធ្វើ​ឱ្យ​បាន​ហ្មត់ចត់​បំផុត។

លោក​ហ៊ុន ម៉ានី ឧបនាយក​រដ្ឋមន្ត្រី​ រដ្ឋមន្ត្រី​ក្រសួង​មុខងារសាធារណៈ និង ជា​ប្រធាន​សហភាពសហព័ន្ធយុវជនកម្ពុជា បាន​មាន​ប្រសាសន៍​លើក​ឡើង​ផង​ដែរ​ថា សម្រាប់​សហភាពសហព័ន្ធយុវជនកម្ពុជា បាន​ត្រៀម​ជា​មួយ​នឹង​ការ​កែសម្រួលនូវចំណុចខ្លះដើម្បី​ឱ្យសមស្របទៅនឹងគម្រោងផែនការក្នុងកិច្ច ការពារសន្តិសុខ សុវត្ថិភាពទាំងខ្លឹមសារ ដោយមិនត្រូវបានយកទៅកែច្នៃឡើយ។

បន្ថែមពីនេះសហព័ន្ធយុវជនកម្ពុជា ក៏បានធ្វើលិខិតបញ្ជូនទៅបណ្ដាលស្ថានទូតនានា នៅក្នុងរាជធានីភ្នំពេញ ប្រមាណជាង២០ស្ថានទូតរួចហើយ ដើម្បី​ឱ្យ​ពួកគាត់បានជ្រាបពីព័ត៌មាននិងប្រាប់ពួកគាត់​ឱ្យ​ដឹងពី​គោល​បំណង​របស់យើងជុំវិញការធ្វើពិធីនេះផងដែរ។

លោកឃួង ស្រេង បានមានប្រសាសន៍បញ្ជាក់ផងដែរថា សម្រាប់ពិធីនេះ យើងមានការបំពាក់មីក្រូតាមដងផ្លូវនិងនៅកន្លែង​ប្រារព្ធពិធី មានទាំងការពង្រឹងកាមេរ៉ាសុវត្ថិភាព ចាប់តាមបណ្ដាផ្លូវនានា។ ចំណែកខណ្ឌទាំង ១៤ត្រូវបង្កើនចំណុចខ្ពស់ទាំងអស់ ពិសេសកិច្ចការពារ សន្តិសុខ សុវត្ថិភាពជូនស្ថានទូតថៃ ប្រជាពលរដ្ឋថៃនិងអ្នករកស៊ីជនជាតិថៃជាដើម។

ជាមួយនឹងការរក្សាសន្តិសុខ សុវត្ថិភាពជូនប្រជាពលរដ្ឋទូទៅ ដោយមិនត្រូវឱ្យមានសម្លេងផ្ទុះជាដាច់ខាត។ បន្ថែមពីនេះ រដ្ឋបាលរាជធានភ្នំពេញក៏បានត្រៀមនៅរថយន្តសង្គ្រោះ ដោយបានទាក់ទងជាមួយនឹងបណ្ដាលពេទ្យ នានានៅក្នុងរាជធានីភ្នំពេញ ពោលគឺនៅពេលដែលមានបងប្អូនប្រជាពលរដ្ឋ មានបញ្ហាសុខភាពកើតឡើង យើងជួយសង្គ្រោះបានទាន់ពេលវេលា។

លោក នេត្រ ភក្ត្រា រដ្ឋមន្ត្រី​ក្រសួង​ព័ត៌មាន ក៏បានបញ្ជាក់ឱ្យដឹង​ដែរ​ថា ក្រសួងព័ត៌មាន មានតួនាទី ក្នុងការផ្សាយបន្តផ្ទាល់ព្រឹត្តិការណ៍នយោបាយដ៏ធំនេះ ដោយ​ទូរទស្សន៍ជាតិ និង ទូរទស្សន៍បាយ័នសហការគ្នា។ ចំណែក ឯទូរទស្សន៍ផ្សេងៗ ទៀត​ក៏​ត្រូវ​បាន​ផ្សាយបន្តផ្ទាល់ទាំងអស់ផងដែរ។ បន្ថែមពីរនេះក្រសួងព័ត៌មាន ក៏​បាន​អនុញ្ញាត​ឱ្យ​សារព័ត៌មានជាតិ និងបរទេស ជាច្រើនស្ថាប័នធ្វើការផ្សព្វផ្សាយយ៉ាងទូលំទូលាយផងដែរ៕

ដោយ ៖ ស្រីរ័ត្ន