រដ្ឋាភិបាលលែងត្រី ១,៥ លានក្បាល ចូលបឹងទន្លេបាទី

ក្រសួងកសិកម្ម រុក្ខាប្រមាញ់ និងនេសាទ បានលែងត្រីមេពូជ កូនត្រី និងវារីសត្វសរុបជាង ២០​ប្រភេទ​ ប្រមាណ ១,៥​លាន​​ក្បាល ដូចជា ត្រីប្រា ត្រីពោ ត្រីឆ្ពិន ត្រីកាហែ ត្រីគល់រាំង អណ្តើក កន្ធាយ បង្កងទឹកសាបចូលបឹងទន្លេបាទី ស្ថិតនៅក្នុងភូមិសាស្រ្តឃុំក្រាំងធ្នង់ ស្រុកបាទី ខេត្តតាកែវ។

ការលែងត្រីបានធ្វើឡើងក្នុងពិធី ប្រារព្ធទិវាមច្ឆជាតិលើកទី២០ ក្រោមអធិបតីភាពសម្ដេចធិបតី ហ៊ុន ម៉ាណែត នាយករដ្ឋមន្ត្រីកម្ពុជានៅព្រឹកថ្ងៃទី ០១ ខែកក្កដា ឆ្នាំ ២០២៥។

ទិវាមច្ឆជាតិ១ កក្កដា ត្រូវ​បាន​រៀប​ចំ​ឡើ​ងជា​រៀង​រាល់​ឆ្នាំក្នុ​ងគោល​បំណង​ដើម្បីផ្សព្វផ្សាយ​និង​បំផុស​​​ស្មារ​តី​​​ឱ្យប្រជាពលរដ្ឋ​នៅទូទាំងប្រទេសចូលរួមអភិរក្ស និងអភិវឌ្ឍធនធានជលផល​ប្រកប​ដោយ​​​និរន្តរ​ភាព សំដៅបង្កើនផលស្តុកមច្ឆជាតិ បំពេញសេចក្តីត្រូវការអាហារមូលដ្ឋានប្រចាំថ្ងៃ ធា​នា​​សន្តិសុខ​ស្បៀង និងជួយទ្រទ្រង់ជីវភាពប្រជា​ពលរដ្ឋ។

ជារៀងរាល់ឆ្នាំ ត្រីមេពូជ កូនត្រី និងវារីសត្វពូជក្នុងស្រុកប្រមាណ ៥លានក្បាល ត្រូវបានលែង​ចូល​ទៅ​ក្នុងដែនទឹកធម្មជាតិ។

លោក ឌិត ទីណា រដ្ឋមន្ត្រីក្រសួងកសិកម្ម មានប្រសាសន៍ថា ជលផលគឺជាអនុវិស័យធំទី២ បន្ទាប់ពី​អនុវិស័យដំណាំ ជាមួយនឹងការរួមចំណែក ២០%ក្នុងវិស័យកសិកម្ម។

ក្រសួងកសិកម្ម យកចិត្តទុកដាក់ខ្ពស់ក្នុងការគ្រប់គ្រង អភិរក្ស និងអភិវឌ្ឍធនធានជលផល ប្រកប​ដោយ​​និរន្តរភាព ដោយរក្សាតុល្យភាពរវាងការអភិរក្ស និងការអភិវឌ្ឍ។

ក្នុងឆ្នាំ២០២៤ កម្ពុជាសម្រេចបានផលនេសាទទឹកសាបជិត ៤៧ម៉ឺនតោន កើនឡើង៩,៥% ធៀប​នឹង​ឆ្នាំ២០២៣ ដែលសបញ្ជាក់ឱ្យឃើញពីប្រសិទ្ធភាពនៃការងារគ្រប់គ្រង និងអភរិក្សរបស់រដ្ឋបាល​ជលផល ដោយមានការចូលរួមគាំទ្រយ៉ាងសកម្មពីក្រសួង-ស្ថាប័នថ្នាក់ជាតិ និងក្រោមជាតិ ជាពិ​សេស​​អាជ្ញាធរមូលដ្ឋាន ក្នុងការចូលរួមទប់ស្កាត់ និងបង្ក្រាបបទល្មើសនេសាទ ដែលមាន​លក្ខណៈ​បំផ្លិច​បំផ្លាញធ្ងន់ធ្ងរ។

សម្ដេចធិបតី ហ៊ុន ម៉ាណែត នាយករដ្ឋមន្ត្រីកម្ពុជា មានប្រសាសន៍ថា ក្នុងវិស័យកសិកម្ម រាជរដ្ឋាភិបាលនៅតែបន្តផ្តល់អាទិភាពខ្ពស់ ដើម្បីធានាសន្តិសុខស្បៀង លើក​កម្ពស់ ជីវភាពប្រជាពលរដ្ឋ ​និងទ្រទ្រង់កំណើនសេដ្ឋកិច្ច ដោយរក្សាតុល្យភាពរវាងការអភិរក្ស និងការ​អភិវឌ្ឍ។

សម្ដេចធិបតី ហ៊ុន ម៉ាណែតបញ្ជាក់ថា៖ «តាមរ​យៈ​ការអនុវត្តនូវគោលនយោបាយដែល​បានដាក់​ចេញ​ក្នុងស្មារតីបុរេសកម្ម និងប្រកបដោយ​ប្រសិទ្ធភាព វិស័យ​កសិ​កម្ម​ក​ម្ពុជា​បន្តរក្សាបាននូវ​ភាព​រឹងមាំ មានភាពធន់ និងរួ​មចំណែកយ៉ាងសំខាន់ក្នុងកា​របន្ធូរបន្ថយ​ផល​ប៉ះពាល់​​ជា​អវិជ្ជ​មាន​មក​លើ​សេដ្ឋ​​កិច្ច​កម្ពុជា ជាពិសេស បញ្ចៀសបាននូវវិបត្តិស្បៀង​អាហារ និងកង្វះ​អាហា​រូបត្ថម្ភ ព្រម​ទាំងចូលរួម​កា​ត់​ប​ន្ថ​យអ​តិ​ផរណាតម្លៃស្បៀងក្នុងប្រទេស ទោះបីកម្ពុជាជួបបញ្ហាគ្រោះធម្មជាតិ​​ជាច្រើនលើក ហើយ​ពិភព​លោក​ជួប​ប្រទះ​វិបត្តិ​សកលជា​បន្ត​បន្ទាប់ក្តី»៕

អត្ថបទ៖ ឡេង ដេត