ក្រុម​ក្មេង​ទំនើង​៩​នាក់ បើក​ឆាក​ប្រយុទ្ធគ្នា​នៅ​ស្រុក​រវៀង ត្រូវ​នគរបាល​ឃាត់ខ្លួន

ព្រះវិហារ ៖ ក្រុមក្មេងទំនើង​ចំនួន​២ក្រុមនៅស្រុករវៀង បានបើកឆាកប្រយុទ្ធគ្នា ត្រូវបានកម្លាំងនគរបាលព្រហ្មទណ្ឌកម្រិតស្រាល នៃស្នងការដ្ឋាននគរបាលខេត្តព្រះវិហារ សហការជាមួយកម្លាំងនគរបាលស្រុករវៀង ធ្វើការស្រាវជ្រាវឃាត់ខ្លួនបានជាបន្តបន្ទាប់ រួចកសាងសំណុំរឿងបញ្ជូនទៅតុលាការ។

លោក​វរសេនីយ៍ឯក គង់ គា នាយការិយាល័យព្រហ្មទណ្ឌកម្រិតស្រាល នៃ​ស្នងការ​ដ្ឋាន​នគរបាល​ខេត្តព្រះវិហារ បាន​ឱ្យ​ដឹង​ថា ក្រុមក្មេងទំនើង២ក្រុមដែលបើកឆាកប្រយុទ្ធគ្នា គឺ​បាន​កើត​ឡើង កាលពីថ្ងៃទី១៥ កក្កដា ឆ្នាំ២០២៥ វេលាម៉ោង១៨និង៥០នាទីនៅត្រង់ចំណុចក្រុមហ៊ុនទ្រីភាព ស្ថិតនៅភូមិអូពោធិ៍ ឃុំរមណីយ ស្រុករវៀង ខេត្តព្រះវិហារ។

លោក​បន្ត​ថា ក្រោយហេតុការណ៍កើតឡើង​បង្ក​ដោយ​ក្រុមក្មេងទំនើងទាំង២ក្រុមនេះ ដោយ​អនុវត្តន៍តាមបទបញ្ជា និង ការណែនាំពីលោកឧត្តមសេនីយ៍ទោ សួស សុខដារ៉ា ស្នងការ​នគរបាលខេត្តព្រះវិហារ កម្លាំង​នគរបាលការិយាល័យព្រហ្មទណកម្រិតស្រាល បានសហការណ៍ជាមួយកម្លាំងនគរបាលស្រុករវៀង បាន​ស្រាវជ្រាវឈានដល់ការកំណត់មុខសញ្ញា និងបានធ្វើការឃាត់ខ្លួនមុខសញ្ញាចំនួន៩នាក់ ជា​មួយ​នឹង​ការ​ដក​ហូតវត្ថុតាងរួមមាន៖ កាំបិតផ្គាក់ចំនួន២ដើម ម៉ូតូចំនួន៥គ្រឿង និងទូរស័ព្ទដៃចំនួន៤គ្រឿងផងដែរ។

បច្ចុប្បន្នក្រុមក្មេងទំនើង​ជា​ជនសង្ស័យ​ទាំង​៩នាក់ និង​វត្ថុតាងខាងលើ ត្រូវ​បាន​កម្លាំង​នគរបាល​ជំនាញ​កំពុងសាងសំណុំរឿង នឹង​បញ្ជូន​ខ្លួន​ទៅ​កាន់​សាលាដំបូង​ខេត្តព្រះវិហារ ន​ាព្រឹកថ្ងៃទី១៧ ខែកក្កដាឆ្នាំ២០២៥ ដើម្បីចាត់ការតាមនីតិវិធីច្បាប់៕

ដោយ ៖ ជុន កុសល