លោកបណ្ឌិត ញឹម វណ្ណដា មានក្តីរំភើប បន្ទាប់ឃើញ សម្តេច ម៉ែន សំអន អញ្ជើញសួរសុខទុក្ខផ្ទាល់

លោក​បណ្ឌិត ញឹម វណ្ណដា សមាជិក​ក្រុមប្រឹក្សា​ជាតិ​រណសិរ្ស​សាមគ្គី អភិវឌ្ឍន៍​មាតុភូមិ​កម្ពុជា និង​ជា​តំណាងរាស្ត្រ​មណ្ឌល​ព្រៃវែង បាន​កើត​ក្តី​រំភើប​ក្រៃលែង បន្ទាប់ពី​បាន​ឃើញ​វត្តមាន សម្តេច​កិត្តិ​សង្គហ​បណ្ឌិត ម៉ែន សំអន ប្រធាន​ក្រុមប្រឹក្សា​ជាតិ​រណសិរ្ស​សាមគ្គី អភិវឌ្ឍន៍​មាតុភូមិ​កម្ពុជា ដឹកនាំ​ប្រតិភូ បាន​អញ្ជើញ​សួរ​សុខ​ទុក្ខ​ដល់​គេហដ្ឋាន​ផ្ទាល់ ស្ថិតនៅ​សង្កាត់​ទួល​សង្កែ ខណ្ឌ​ឫស្សីកែវ រាជធានី​ភ្នំពេញ កាលពី​ព្រឹក​ថ្ងៃ​ព្រហស្បតិ៍ ៧ រោច ខែអាសាឍ ឆ្នាំ ម្សាញ់ សប្តស័ក ព​.​ស ២៥៦៩ ត្រូវ​នឹង​ថ្ងៃ​ទី ១៧ ខែ​កក្កដា ឆ្នាំ ២០២៥ ខណៈ​ពេល​កំពុង​សម្រាក​ព្យាបាល​ជំងឺ។

ក្នុង​ឱកាស​នេះដែរ ​ក៏​មានការ​អមដំណើរ​ដោយ លោក ញ៉ែម វ៉ាលី អនុប្រធាន អចិន្ត្រៃយ៍ និង​ជា អគ្គលេខាធិការ​ , លោក សំហេង បុរស អគ្គលេខាធិការ​រង និង​លោកស្រី ញ៉ែម ច័ន្ទ​លក្ខិណា អគ្គហេរញ្ញិក។

សម្តេច​កិត្តិ​សង្គហ​បណ្ឌិត ក៏បាន​ពាំនាំ​ការ​ផ្ដាំផ្ញើ​នឹករលឹក​ពី សម្តេច​តេ​ជោ ប្រធាន​ព្រឹទ្ធសភា និង​ជា​គណៈអធិបតី​កិត្តិយស​រណសិរ្ស សាមគ្គី អភិវឌ្ឍន៍​មាតុភូមិ​កម្ពុជា និង​សម្តេច​កិត្តិ​ព្រឹទ្ធ​បណ្ឌិត ប៊ុន រ៉ានី ហ៊ុន សែន ​, សម្តេច​ធិបតី ហ៊ុន ម៉ាណែត នាយករដ្ឋមន្ត្រី នៃ​ព្រះរាជាណាចក្រ​កម្ពុជា និង​ជា​គណៈអធិបតី​កិត្តិយស​រណសិរ្ស សាមគ្គី អភិវឌ្ឍន៍​មាតុភូមិ​កម្ពុជា និង​លោកជំទាវ​បណ្ឌិត ពេជ ចន្ទ​មុនី្ន ហ៊ុន ម៉ាណែត ជូន​លោក​បណ្ឌិត ញឹម វណ្ណដា និង​ក្រុម​គ្រួសារ។

លោក​បណ្ឌិត ញឹម វណ្ណដា ក៏​បាន​ប្រសាសន៍​ថា ក្រុម​គ្រួសារ​ពិតជា​មាន​សេចក្តីរំភើប​រីករាយ​យ៉ាង​ខ្លាំង មិនអាច​យក​អ្វី​មក​ប្រៀបផ្ទឹម​បាន​ឡើយ និង​សូម​សម្តែង​នូវ​ការ​ដឹងគុណ​យ៉ាង​ជ្រាលជ្រៅ​ចំពោះ សម្តេច​តេ​ជោ ហ៊ុន សែន​ , សម្តេច​កិត្តិ​ព្រឹទ្ធ​បណ្ឌិត ប៊ុន រ៉ានី ហ៊ុន សែន ​, សម្តេច​ធិបតី ហ៊ុន ម៉ាណែត , លោកជំទាវ​បណ្ឌិត ពេ​ជ ចន្ទ​មុន្នី ហ៊ុន ម៉ាណែត និង​សម្តេច​កិត្តិ​សង្គហ​បណ្ឌិត ម៉ែន សំអន ព្រម​ទាំង​ថ្នាក់ដឹកនាំ​រណសិរ្ស​គ្រប់​លំដាប់​ថ្នាក់ ដែល​បាន​អញ្ជើញ​មក​សួរសុខទុក្ខ​ដល់​គេហដ្ឋាន និង​គោរព​ជូនពរ​ដល់ សម្តេច​កិត្តិ​សង្គហ​បណ្ឌិត និង​ថ្នាក់ដឹកនាំ សូម​ទទួល​បាន​នូវ​សុខភាព​ល្អ ជួបប្រទះ​តែ​នឹង​ពុទ្ធពរ​ទាំង ៤ ប្រការ គឺ អាយុ វណ្ណៈ សុខៈ ពលៈ កុំបី​ឃ្លៀងឃ្លាត​ឡើយ៕

អត្ថបទ ៖ វិមាន