អាមេរិកស្នើពន្ធ ១៥% លើ EU ​ខណៈរំពឹងកិច្ចព្រមព្រៀងពាណិជ្ជកម្មមុន ១ សីហា

មន្រ្តីការទូតរបស់សហភាព​អឺរ៉ុប (EU) បាន​អះអាងថា សហរដ្ឋអាមេរិក​បាន​ស្នើការលើដាក់ពន្ធ ១៥ ភាគរយ លើគ្រប់ទំនិញ​នាំចូលពី EU ខណៈភាគីទាំង ២ រំពឹង​ថានឹង​សម្រេច​បាន​កិច្ចព្រមព្រៀងពាណិជ្ជកម្ម​មុនថ្ងៃ ១ សីហា ដែលពន្ធខ្ពស់របស់ប្រធានាធិបតី ដូណាល់ ត្រាំ កំណត់ចូលជាធរមាន។ នេះបើតាមការចុះផ្សាយរបស់បណ្ដាញព័ត៌មាន​ BBC។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ការបង្ហាញពីសុទិដ្ឋិនិយមនេះ ធ្វើឡើងខណៈដែល​ EU ព្រួយបារម្ភពីពន្ធខ្ពស់ ៣០ ភាគរយ ដែល​ ត្រាំ ដាក់លើប្លុកនេះ។ អ្នកនាំពាក្យគណៈកម្មាធិការអឺរ៉ុប បាន​បដិសេធការប៉ាន់ស្មានលើ​ការចរចា​ចុងក្រោយកាលពីថ្ងៃព្រហស្បតិ៍ ប៉ុន្តែបាននិយាយថា ​ក្រុមចរចារបស់ EU កំពុងធ្វើការយ៉ាងសស្រាក់សស្រាំ ដើម្បី​បាន​ដំណោះស្រាយសម្រាប់អ្នកប្រើប្រាស់ និងក្រុមហ៊ុនរបស់អឺរ៉ុប។

ចំណែក​ឯ​អ្នកនាំពាក្យសេតវិមាន លោក​ Kush Desai បាននិយាយមុននេះថា ការ​ចរចាណាមួយអំពីកិច្ចព្រមព្រៀង ​គួរតែចាត់ទុកថាជាការរំពឹងទុក​ លុះត្រាតែវាត្រូវបានបញ្ជាក់ដោយប្រធានាធិបតី។

លោក ត្រាំ បាននិយាយកាលពីថ្ងៃពុធថា ​លោកអាច​ដកពន្ធ ៣០ ភាគរយ ដែល​កំណត់លើ EU បើសិន​ជា «ប្រសិនបើពួកគេយល់ព្រមបើកសហភាព [អឺរ៉ុប] ​សម្រាប់អាជីវកម្មអាមេរិក»។ ចំណែក​ឯ​រដ្ឋមន្ត្រីក្រសួងរតនាគារសហរដ្ឋអាមេរិក លោក Scott Bessent បានលើកឡើងថា ការចរចាជាមួយ​ EU កំពុងមាន​វឌ្ឍនភាព​ល្អ។

គួរគូសបញ្ជាក់ថា EU ដើម​ឡើយ រំពឹង​ពីអត្រាពន្ធត្រឹម ១០ ភាគរយ មុន ត្រាំ ផ្ញើលិខិតពន្ធដំឡើងដល់ ៣០ ភាគរយ។ ​ជាការឆ្លើយតប EU បាន​បង្ហាញជំហរចរចា ខណៈប្ដេជ្ញាចេញវិធានការវាយបក៕