រដ្ឋបាលរាជធានី នាំយកអំណោយ៦៥មុខ ប្រគល់ជូនវីរកងទ័ពជួរមុខ និង​ពលរដ្ឋ​ភៀស​សឹក ជាង៣ម៉ឺននាក់

ឧត្ដមានជ័យ ៖ រដ្ឋបាល​រាជធានីភ្នំពេញ នៅថ្ងៃទី ២៩ ខែកក្ដដា ឆ្នាំ២០២៥ បាន​នាំ​យក​អំណោយ​របស់សប្បុរសជន ជាសម្ភារៈ បរិក្ខារ គ្រឿងឧបភោគ បរិភោគ ចំនួន៦៥មុខ ប្រគល់​ជូន​វីរ​កងទ័ពជួរមុខ និង​ពលរដ្ឋ​ភៀស​សឹក ដែលរងផលប៉ះពាល់ចំនួន៤ស្រុក ស្មើ២៤ឃុំ ជាង១ម៉ឺនគ្រួសារ ស្មើជាង៣ម៉ឺននាក់ ស្ថិតនៅទីតាំងកន្លែងសុវត្ថិភាពស្រុកអន្លង់វែង ខេត្ដឧត្ដមានជ័យ។

អំណោយ​ទាំងអស់​នេះ ត្រូវ​បាន​លោក អុីម រ៉នហាស្សាន់ អភិបាលរងរាជធានីភ្នំពេញ តំណាង លោក ឃួង ស្រេង អភិបាល​រាជធានីភ្នំពេញ ប្រគល់ជូនដល់ លោក​កិត្តិសង្គហ​បណ្ឌិត​ទេសរដ្ឋមន្ដ្រី គន់ គីម ប្រធានគណកម្មាធិការគ្រប់គ្រង​គ្រោះហន្ដរាយ និង​លោក ងួន ទ្ធីរិទ្ធ អភិបាល​ស្រុកអន្លង់វែង ខេត្ដឧត្ដរមានជ័យ ដើម្បី​ចែក​ជូន​បន្ត​ដល់​ប្រជាពលរដ្ឋ​ដែល​បាន​ជម្លៀស​ចេញ​ពី​ផ្ទះ​សម្បែង​ចំនួន១៤៥៧៣គ្រួសារ ស្មើនឹង៣៦៧៦៣នាក់ ក្នុងនោះមានកុមារចំនួន៦៦៧នាក់ផងដែរ ។

អំណោយ​ដែល​រដ្ឋបាលរាជធានីភ្នំពេញ​នាំ​យក​មក​ប្រគល់​ជូន​ដល់​កង​ទ័ពជួរមុខ និង​ប្រជាពលរដ្ឋ​ភៀសសឹក នៅ​ពេល​នេះ រួមមាន មី ទឹកសុទ្ធ ត្រីខកំប៉ុង ទឹកត្រី ទឹកស៊ីអ៉ីវ ភួយមុង កន្ទេល បន្លែ ត្រីសាច់ និងសម្ភារ ប្រើប្រាស់ផ្សេងៗទៀត សរុបទាំងអស់ចំនួន៦៥ មុខ។

លោក អុីមរ៉ន ហាស្សាន់ អភិបាលរង​រាជធានី​ភ្នំពេញ តំណាង​ឱ្យ​អភិបាលរាជធានីភ្នំពេញ លោកឃួង ស្រេង បាន​អរគុណ​ចំពោះ​ទឹក​ចិត្ត​សប្បុរសជន​នានា នៅ​រាជធានីភ្នំពេញ​ ដែល​តែង​តែ​ចូលរួម​ចែក​រំលែក​ធនធាន តាមលទ្ធលភាព រៀងៗខ្លួន ​ដើម្បីឧបត្ថម្ភ​ដល់​វីរកងទ័ព​ជួរមុខ​ និង​ក្រុម​គ្រួសារ​ប្រជាពលរដ្ឋ​ ដែល​បាននឹងកំពុង​ជម្លៀស​ចេញ​ពីផ្ទះសម្បែងមក​ស្នាក់​នៅ​ទីកន្លែង​សុវត្ថិភាព។

នេះ​ពិត​ជា​បាន​បង្ហាញ​ឱ្យ​ឃើញ​ពី​សាមគ្គីភាព​ជាធ្លុងមួយខ្មែរ​ស្រលាញ់​ខ្មែរ​។ ខ្ញុំសូម​អរគុណ​នូវ​ទឹក​ចិត្ត​របស់​បងប្អូន​ប្រជាពលរដ្ឋ​យើង និង​សប្បុរសជន ក្នុង​ស្មារតី​ខ្មែរ​ជួយ​ខ្មែរ។

ក្នុង​នាម​សមរភូមិ​ក្រោយ​រដ្ឋបាលរាជធានីភ្នំពេញ នៅតែបន្ដជួយបងៗកងទ័ពជួរមុខ និង​បង​ប្អូនប្រជាពលរដ្ឋដែលជម្លៀស​មក​រក​ទីកន្លែង​សុវត្ថិភាព​នេះ ជារៀងរហូត។

លោក កិត្តិសង្គហបណ្ឌិត ទេសរដ្ឋមន្ដ្រី គន់ គីម ក៏បានអរគុណជូនចំពោះ លោក ឃួង ស្រេង អភិបាលរាជ ធានីភ្នំពេញ តាមរយៈលោក អុីមរ៉ន ហាស្សាន់ ដឹក​នាំ​អំណោយ​សប្បុរសជន​យក​មក​ផ្ដល់​ជូន​វីរកងទ័ពជួរមុខ នៅខេត្ដឧត្ដមានជ័យនាពេលនេះ លោក និង​ធ្វើ​ការ​បែង​ចែក​ជូន​ទៅ​កងទ័ពលេខ៤១ ពិតជាបានបង្ហាញឱ្យឃើញពីសាមគ្គីភាពជាធ្លុងមួយ ​ខ្មែរ​ស្រលាញ់​ខ្មែរ​ពិតប្រាកដ ។

តាម​របាយការណ៍​របស់​អភិបាលរង​ខេត្តឧត្ដរមានជ័យ បាន​ឱ្យដឹងថា គិតត្រឹមថ្ងៃទី២៩ ខែ​កក្កដា ឆ្នាំ ២០២៥នេះ មានប្រជាពលរដ្ឋចំនួន២៤ ឃុំក្នុង ចំណោម ៤ស្រុកក្នុងខេត្ដឧត្ដមានជ័យ អាជ្ញាធរ បាន​ជម្លៀស​ចេញ​មក​រក​ទីកន្លែង​សុវត្ថិភាព​ សរុប​ចំនួន១៤៥៧៣គ្រួសារស្មើនឹង៣៦៧៦៣នាក់ ក្នុង​នោះ​ក៏​មាន​កុមារ៦៦៧នាក់៕

ដោយ ៖ ស្រីរ័ត្ន