ប៉ាគីស្ថាន និរទេសជនភៀសខ្លួនអាហ្វហ្គានីស្ថានទ្រង់ទ្រាយធំឡើងវិញ ទោះបី UN ព្រមានក៏ដោយ

យោងតាមការចេញផ្សាយរបស់ទីភ្នាក់ងារព័ត៌មាន​AP នៅថ្ងៃទី០៥ខែសីហា ប្រទេសប៉ាគីស្ថានបានចាប់ផ្តើមការនិរទេសជនភៀសខ្លួនអាហ្វហ្គានីស្ថានដោយបង្ខំឡើងវិញប្រហែល ១.៤ លាននាក់ បន្ទាប់ពីការស្នាក់នៅស្របច្បាប់របស់ពួកគេបានផុតកំណត់កាលពីខែមិថុនា ខណៈអង្គការសហប្រជាជាតិព្រមានពីហានិភ័យរបស់ចំណាត់ការនេះ។

ប្រជាជនអាហ្វហ្គានីស្ថានដែលកាន់ប័ណ្ណបញ្ជាក់ការចុះឈ្មោះ (PoR) មិនត្រូវបានផ្តល់ការពន្យារពេលដោយរដ្ឋាភិបាលប៉ាគីស្ថានទៀតទេ បើទោះបីជាមានការអំពាវនាវសម្រាប់ពេលវេលាបន្ថែមទៀតដើម្បីដោះស្រាយបញ្ហាផ្ទាល់ខ្លួនក៏ដោយ។

អាជ្ញាធរប៉ាគីស្ថានក៏កំពុងកំណត់គោលដៅជនជាតិអាហ្វហ្គានីស្ថាន ៨០ម៉ឺននាក់ផ្សេងទៀតដែលមានប័ណ្ណសញ្ជាតិអាហ្វហ្គានីស្ថាន ដោយប្រកាសថាពួកគេជាអ្នករស់នៅខុសច្បាប់។ ប៉ូលិសនៅទូទាំងខេត្តមួយចំនួន រួមមាន Punjab, Balochistan និង Sindh កំពុងធ្វើការត្រួតពិនិត្យពីផ្ទះមួយទៅផ្ទះមួយ ដើម្បីឃុំខ្លួន និងនិរទេសជនអាហ្វហ្គានីស្ថានដែលគ្មានឯកសារ។

ទីភ្នាក់ងារជនភៀសខ្លួនរបស់អង្គការសហប្រជាជាតិ (UNHCR) បានរិះគន់យ៉ាងខ្លាំងចំពោះចំណាត់ការនេះ ដោយព្រមានថា វាអាចធ្វើឲ្យអាហ្វហ្គានីស្ថានអស្ថិរភាព និងបំពានច្បាប់អន្តរជាតិ។ ទីភ្នាក់ងារនេះបានជំរុញឱ្យប៉ាគីស្ថានបញ្ឈប់ការវិលត្រឡប់ដោយបង្ខំ និងទទួលយកដំណើរការធ្វើមាតុភូមិនិវត្តន៍ប្រកបដោយមនុស្សធម៌ ស្ម័គ្រចិត្ត និងបន្តិចម្តងៗ។

គួរបញ្ជាក់ថាគ្រួសារអាហ្វហ្គានីស្ថានជាច្រើន ដែលខ្លះរស់នៅក្នុងប្រទេសប៉ាគីស្ថានអស់ជាច្រើនទស្សវត្សមកហើយ ឥឡូវនេះប្រឈមនឹងភាពមិនប្រាកដប្រជា ពេលដែលពួកគេរៀបចំវិលត្រឡប់ទៅកាន់ប្រទេសអាហ្វហ្គានីស្ថានដ៏ផុយស្រួយក្រោមការគ្រប់គ្រងរបស់ពួកតាលីបង់៕

អត្ថបទ៖ ប៊ុន សុភាព