ប្រពន្ធវីរកងទ័ពជួរមុខ មានជំងឺប្រចាំកាយ ទទួលបានការព្យាបាលពីក្រុមគ្រូពេទ្យខេត្តក្រចេះ

អ្នកជំងឺម្នាក់ ត្រូវជាប្រពន្ធរបស់វីរកងទ័ពជួរមុខ ដែលមានជំងឺប្រចាំកាយ បានទទួល​ការពិនិត្យព្យាបាលជំងឺពីក្រុមគ្រូពេទ្យនៃមន្ទីរពេទ្យបង្អែកខេត្តក្រចេះ។ នេះតាមការឱ្យដឹងពីលោក​វេជ្ជបណ្ឌិត​​ ងី​ ប៊ុនឡែន​ ប្រធានមន្ទីរសុខាភិបាលខេត្តក្រចេះ។

អ្នកជំងឺមានឈ្មោះ ជី តែង អាយុ ៤១ ឆ្នាំ បច្ចុប្បន្នមានទីលំនៅ នៅភូមិភ្នំខៀវ ឃុំអូរកណ្តៀរសែនជ័យ ស្រុក​អូរគ្រៀងសែនជ័យ ខេត្តក្រចេះ មានកូនក្នុងបន្ទុក់ចំនួន ២ នាក់។

លោក​វេជ្ជបណ្ឌិត​​ ងី​ ប៊ុនឡែន​ ប្រធានមន្ទីរសុខាភិបាលខេត្តក្រចេះបាន​ឲ្យ​ដឹង​ថា បន្ទាប់ពីទទួលបានព័ត៌មាន លោកបានចាត់ចែងក្រុមគ្រូពេទ្យ និងរថយន្តគិលានសង្គ្រោះទៅយកអ្នកជំងឺ ហើយក្រុមគ្រូពេទ្យបានដឹកមកដល់មន្ទីរពេទ្យបង្អែកខេត្ត​ក្រចេះ នៅវេលាម៉ោង ១២ ថ្ងៃត្រង់ នាថ្ងៃទី ៦ ខែសីហា ឆ្នាំ២០២៥។ ក្រុម​គ្រូពេទ្យបានបញ្ជាក់ថា អ្នកជំងឺមានជំងឺក្រិនថ្លើម។

បន្ទាប់ពីទទួលបានការពិនិត្យព្យាបាលពីសំណាក់ក្រុមគ្រូពេទ្យបង្អែកខេត្តអស់​រយៈពេល ៦ ថ្ងៃ​ ពោលគឺនៅថ្ងៃទី១២ ខែសីហា ឆ្នាំ២០២៥ ដោយស្ថានភាពជំងឺមានភាពប្រសើរឡើង ក្រុមគ្រូពេទ្យក៏បានបញ្ជូនឱ្យត្រឡប់ទៅផ្ទះវិញ តាមរយៈរថយន្តគិលានសង្គ្រោះរបស់មន្ទីរពេទ្យបង្អែកខេត្ត ព្រមទាំងបានឧបត្ថម្ភជាគ្រឿងឧបភោគ បរិភោគ និងថវិកាមួយចំនួ​ន។

លោក វ៉ា ថន អភិបាលខេត្តក្រចេះបានមានប្រសាសន៍លើកឡើងថា «ទុក្ខលំបាករបស់បងប្អូនវីរៈកងទ័ព យើងត្រូវតែដោះស្រាយ។ សូមអរគុណចំពោះការផ្តល់ព័ត៌មានមកខ្ញុំ ហើយខ្ញុំសូមជម្រាបជូនថា ក្រុមគ្រូពេទ្យរបស់យើង បានទៅទទួល​និងនាំអ្នកជំងឺដែលត្រូវជាភរិយារបស់បងកងទ័ពជួរមុខ តាំងពីថ្ងៃទី០៦ ខែសីហា ដើម្បីសម្រាកព្យាបាលនៅមន្ទីរពេទ្យបង្អែកខេត្តក្រចេះ។ ច្រើនថ្ងៃបន្ទាប់ ដោយអ្នកជំងឺបានធូរស្រាលច្រើន ក្រុមការងារបានជូនគាត់ត្រលប់ទៅគេហដ្ឋានវិញ ដោយបានឧបត្ថម្ភជាគ្រឿងឧបភោគបរិភោគ និងថវិកាមួយចំនួន»៕

អត្ថបទ ប្រុញ វិធិន