ព័ត៌មានជាតិ

រដ្ឋមន្ត្រីការបរទេសថាពិបាកកសាងទំនុកចិត្តឡើងវិញជាមួយថៃ

បានផុស

១០ ខែ មុន

នៅ

ថ្ងៃសៅរ៍ ១៦ សីហា ២០២៥

ដោយ

រដ្ឋមន្ត្រីការបរទេសកម្ពុជា ឧបនាយករដ្ឋមន្ត្រី ប្រាក់ សុខុន បានលើកឡើងថាឧបសគ្គចម្បងនៃទំនាក់ទំនងជាមួយថៃឡើងវិញពេលនេះគឺទំនុកចិត្ត ខណៈលោកស្វាគមន៍ការរួមចំណែករបស់ចិនក្នុងការសម្របសម្រួលទំនាក់ទំនងនេះឡើងវិញ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ឆ្លើយទៅនឹងសំណួរអ្នកយកព័ត៌មាន Phoenix TV ក្នុងពេលដែលលោកមានវត្តមាននៅប្រទេសចិនដើម្បីប្រជុំមេគង្គ-ឡានឆាង នៅប្រទេសចិន ដែលសួរថា អ្វីដែលអ្នកគិតថាជាឧបសគ្គចម្បងនៃការបង្កើនការទុកចិត្តជាមួយប្រទេសថៃ? លោក ប្រាក់ សុខុន ឆ្លើយថា៖ «ឧបសគ្គចម្បងនោះគឺការចាប់ផ្ដើមកសាងទំនុកចិត្ត»។

ជាមួយគ្នានេះលោកស្វាគមន៍ការរួមចំណែករបស់ប្រទេសចិនក្នុងការសម្របសម្រួលឱ្យទំនាក់ទំនងប្រទេសទាំងពីរត្រលប់មកប្រក្រតីភាពឡើងវិញផងដែរ។

លោកថា៖ «យើងស្វាគមន៍ការរួមចំណែកយ៉ាងសកម្មរបស់ចិនក្នុងការសម្របសម្រួលប្រក្រតីភាពឡើងវិញនៃទំនាក់ទំនងទ្វេភាគីប្រទេសយើងទាំងពី។ យើងកោតសរសេរដល់តួនាទីចិនក្នុងកិច្ចការនេះ»។

រដ្ឋមន្ត្រីការបរទេសកម្ពុជា និងថៃបានជួបពិភាក្សាគ្នាដោយមានការសម្របសម្រួលពីប្រទេសកាលពីថ្ងៃទី១៤ ខែសីហា ឆ្នាំ២០២៥ នៅទីក្រុងអាននឹង ខេត្តយូណាន ប្រទេសចិន។ ដោយក្នុងនោះបើតាមសេចក្ដីប្រកាសព័ត៌មានរបស់ក្រសួងការបរទេស «កិច្ចពិភាក្សានោះបានធ្វើឡើងប្រកបដោយស្មារតីបើកចំហ ស្មោះត្រង់ និងគោរពគ្នាទៅវិញទៅមក ដោយផ្ដល់នូវវេទិកាស្ថាបនាមួយដើម្បីដោះស្រាយស្ថានការណ៍ព្រំដែនដែលកំពុងវិវត្ត៍រវាងកម្ពុជា និងថៃ»។

គួរឱ្យដឹងផងដែរថាទោះបីជាសម្រេចបាននូវបទឈប់បាញ់តែទាហានថៃបានបន្តបំពានជាបន្តបន្ទាប់មកលើអធិបតេយ្យភាពកម្ពុជា ដោយមានទាំងការដើល្បាតជាន់មីននៅដីខ្មែរ រាយបន្លាលួស ព័ទ្ធយកផ្ទះពលរដ្ឋខ្មែរជាដើម។

ក្នុងកិច្ចប្រជុំ RBC នៅព្រឹកថ្ងៃទី១៦ ខែសីហា នេះដែលធ្វើនៅខេត្តត្រាតប្រទេសថៃ មេបញ្ជាការភូមិភាគទី៣កម្ពុជាលោក ឧត្តមសេនីយ៍ទោ អ៊ុយ ហៀង បានប្រាប់ទៅថៃថាសកម្មភាពរបស់ថៃដែលបានចូលមករាយបន្លាលួស និងបំផ្លាញហេដ្ឋារចនាសម្ព័ន្ធដែលមានស្រាប់ ពិសេសលំនៅដ្ឋានរបស់ប្រជាពលរដ្ឋខ្មែរ ព្រមទាំងការផ្សព្វផ្សាយព័ត៌មានក្លែងក្លាយ ឬមិនពិតពីប្រទេសថៃកំពុងតែបំផ្លាញទំនុកចិត្ត និងធ្វើឱ្យប៉ះពាល់ដល់កិច្ចខិតខំប្រឹងប្រែងបង្កើតបរិយាកាសរក្សាស្ថរិភាព និងសន្ដិភាពជាមួយកម្ពុជា។

ប្រធានវិទ្យាស្ថានទំនាក់ទំនងអន្តរជាតិកម្ពុជា លោកបណ្ឌិត គិន ភា បានលើកឡើងក្នុងវេទិកាអ្នកជំនាញកម្ពុជាថ្មីកាលពីថ្ងៃទី៩ ខែសីហា កន្លងទៅថា ពិបាកក្នុងការនិយាយថាពេលណាដែលកម្ពុជានិងថៃអាចទុកចិត្តគ្នាឡើងវិញណាស់ នៅពេលដែលស្ថានភាពព្រំដែនកំពុងប្រឈមមុខដាក់គ្នាដូចបច្ចុប្បន្ននេះ។ លោកមើលឃើញដំណោះស្រាយមួយចំនួនដែលអាចនាំឱ្យប្រទេសទាំងពីរអាចស្ដារទំនាក់ទំនងការទុកចិត្តគ្នាឡើងវិញបាននោះគឺការគោរពបទឈប់បាញ់ បញ្ឈប់ស្នូរកាំភ្លើង បើកព្រំដែនឡើងវិញ ប្រក្រតីកម្មនៃទំនាក់ទំនងការទូត រៀបចំយន្តការដើម្បីលើកកំពស់ទំនាក់ទំនង និងអ្វីដែលសំខាន់ជាងគេនោះគឺរៀបចំការបោះបង្គោលព្រំដែនរវាងប្រទេសទាំងពីរដោយផ្អែកលើកិច្ចព្រមព្រៀងឱ្យបានរួចរាល់៕