ប្រធានាធិបតីហ្វីលីពីន Ferdinand Marcos Jr. នឹងបំពេញទស្សនកិច្ចផ្លូវរដ្ឋនៅកម្ពុជា ពីថ្ងៃទី៧-៩ខែកញ្ញា

ប្រធានាធិបតីហ្វីលីពីន Ferdinand Marcos Jr. នឹងបំពេញទស្សនកិច្ចផ្លូវរដ្ឋនៅកម្ពុជា ពីថ្ងៃទី៧-៩ខែកញ្ញា។ នេះបើតាមការចេញផ្សាយរបស់សារព័ត៌មានរបស់ហ្វីលីពីន ប៉ុន្តែមិនបានលម្អិតអំពីខ្លឹមសារនៃគម្រោងដំណើរទស្សនកិច្ចនេះឡើយ។  

ចំណែកភាគីក្រសួងការបរទេស និងសហប្រតិបត្តិការអន្តរជាតិរបស់ភាគីកម្ពុជា គិតមកទល់ពេលនេះ ក៏មិនទាន់ចេញសេចក្ដីប្រកាសព័ត៌មានលម្អិតណាមួយ អំពីដំណើរទស្សនកិច្ចផ្លូវរដ្ឋនេះដូចគ្នា។

គូរគូសបញ្ជាក់ដែរ កន្លងមក នៅក្នុងដំណើរទស្សនកិច្ចផ្លូវរដ្ឋរបស់បណ្ដាមេដឹកនាំបរទេសដែលបំពេញទស្សនកិច្ចនៅកម្ពុជា គឺមេដឹកនាំទាំងនោះ បានអញ្ជើញបំពាក់កម្រងផ្កានៅវិមានឯករាជ្យ និងគោរពព្រះវិញ្ញាណក្ខន្ធព្រះបរមរតនកោដ្ឋ ចូលក្រាបបង្គំគាល់ព្រះកុរណា ព្រះមហាក្សត្រ នៃព្រះរាជាណាចក្រកម្ពុជា ឬប្រមុខរដ្ឋស្ដីទី ប្រជុំចង្អៀត  ជជែកពិភាក្សាការងារទ្វេភាគី ជាមួយនាយករដ្ឋមន្ត្រីកម្ពុជា ចូលជួបសម្ដែងការគួរសម ​និងពិភាក្សាការងារជាមួយប្រធានរដ្ឋសភា និងជាមួយប្រធានព្រឹទ្ធសភាកម្ពុជា។

សូមរំលឹកថាកាលពីថ្ងៃទី១០ និង១១ ខែកុម្ភៈ ឆ្នាំ២០២៥ សម្ដេចធិបតី ហ៊ុន ម៉ាណែត នាយករដ្ឋមន្ត្រីកម្ពុជា ធ្លាប់បានដឹកនាំគណៈប្រតិភូជាន់ខ្ពស់នៃរាជរដ្ឋាភិបាលកម្ពុជា អញ្ជើញបំពេញទស្សនកិច្ចផ្លូវការនៅប្រទេសហ្វីលីពីនម្ដងរួចមកហើយ ដោយសម្រេចបានលទ្ធផលផ្លែផ្កាត្រចះត្រចង់ផ្ដល់ជាប្រយោជន៍រួមដល់ប្រជាជនកម្ពុជា-ហ្វីលីពីន។ កាលណោះ កម្ពុជា និងហ្វីលីពីន បានចុះហត្ថលេខាលើអនុស្សារណៈយោគយល់គ្នាលើវិស័យចំនួន៨ ដូចជាពន្ធដា ពាណិជ្ជកម្ម វិនិយោគ វប្បធម៌ កសិកម្ម ការបណ្ដុះបណ្ដាលវិជ្ជាជីវៈ និងបច្ចេកទេស ទេសច​រណ៍ និងព័ត៌មានបច្ចេកវិទ្យា។

ដោយឡែកនៅក្នុងដំណើរទស្សនកិច្ចរបស់ប្រធានាធិបតីហ្វីលីពីននៅកម្ពុជាឆាប់ៗនេះ​ គេរំពឹងថាឯកសារសំខាន់ៗមួយចំនួននឹងត្រូវបានចុះហត្ថលេខា ក្នុងនោះមានដូចជា គម្រោងទូទាត់ឆ្លងដែនទ្វេភាគី តាមឃ្យូអរកូត(QR Code) ដើម្បីជួយ​សម្រួល​ដល់​ការ​ដោះ​ដូរ​ពាណិជ្ជ​កម្ម និងទេសចរណ៍ រវាងប្រជាជននៃកម្ពុជា-ហ្វីលីពីន និងការចេញអង្ករពីកម្ពុជាទៅកាន់ទីផ្សារហ្វីលីពីនជាដើម៕​

ដោយ៖ ង៉ិល ណារ៉ាត់