កម្ពុជាជំរុញអាជីវកម្ម​ផ្តោតលើការផ្តល់ហិរញ្ញវត្ថុប្រកបដោយចីរភាព​

និយ័តករមូលបត្រកម្ពុជាកាលពីថ្ងៃ​ទី​១៥ ខែ​កញ្ញា ឆ្នាំ​២០២៥​ ​ បានសហការជាមួយគណៈកម្មការសេដ្ឋកិច្ច និង​សង្គម​សម្រាប់​តំបន់​អាស៊ីប៉ាស៊ីហ្វិករបស់អង្គការសហប្រជាជាតិ(UNESCAP) , វិទ្យាស្ថាន​អភិវឌ្ឍន៍​បៃតង​សកល(GGGI) , សាជីវ​កម្ម​ធានា​ឥណទាន​វិនិយោគ(CGIF) , ក្រុមហ៊ុន GuarantCo និង​សាជីវកម្ម​ធានា​ឥណទាន​កម្ពុជា(CGCC) រៀបចំសិក្ខាសាលា ស្តីពី “ការជំរុញ​ហិរញ្ញវត្ថុ​ប្រកប​ដោយ​ចីរភាពរបស់កម្ពុជា៖ មាគ៌ានៃសញ្ញាបណ្ណបៃតងឆ្ពោះទៅកាន់ការ វិនិយោគអាកាសធាតុ”។

សិក្ខាសាលានេះ ត្រូវ​បាន​រៀប​ចំ​ឡើង​នៅ​ក្នុង​គោលបំណង​ផ្សព្វផ្សាយ​ដល់​ក្រុមហ៊ុន​បោះផ្សាយ​សក្តានុពល​ដាក់​ពាក្យ​ស្នើសុំចូលរួមក្នុងកម្មវិធីផ្តល់ជំនួយបច្ចេកទេសកម្មវិធីជំរុញការបោះផ្សាយសញ្ញាបណ្ណចីរភាពនៅកម្ពុជា (CSBA) វគ្គទី៣ តាមរយៈ​ការពង្រឹង​ការយល់ដឹង​ពីការ​ប្រើប្រាស់​សាច់ប្រាក់​ដែល​បាន​មកពីការបោះផ្សាយ (Use-of-Proceeds-UOP) និង​សញ្ញាបណ្ណផ្សារភ្ជាប់នឹងចីរភាព (SLBs)។

ព្រម​ទាំង​ការ​ផ្សព្វផ្សាយ​របាយការណ៍​ស្តីពី “​ការកសាងគម្រោង​ហិរញ្ញវត្ថុរយៈពេលវែង​ក្នុងវិស័យ​មិនមែន​ហេដ្ឋារចនាសម្ព័ន្ធរបស់កម្ពុជា” ដែល​ជាកិច្ច​ខិតខំប្រឹង​ប្រែង​រួម​រវាង ន.ម.ក. និង UNESCAP ក្នុងគោល​ដៅ​កសាង​នូវហិរញ្ញប្បទាន​គម្រោង​ហិរញ្ញវត្ថុ​បៃតង​រយៈពេលវែង និងគាំទ្រ​ដល់​អន្តរកាល​ឆ្ពោះទៅរក​ការបំភាយ​ឧស្ម័ន​កាបូន​កម្រិតទាប​នៅ​ប្រទេសកម្ពុជា។

សិក្ខាសាលានេះ មានការផ្តល់សុន្ទរកថាបើកដោយ លោកស្រី Nathalie Andre នាយិកា GGGI ប្រចាំប្រទេសកម្ពុជា និងសុន្ទរកថាបិទដោយ លោកស្រី Deanna Morris មន្រ្តីទទួលបន្ទុកកិច្ចការសេដ្ឋកិច្ច នៃ UNESCAP និងមានសមាសភាពចូលរួមពីថ្នាក់ដឹកនាំ និងមន្ត្រីនៃ ន.ម.ក., UNESCAP, GGGI, CGCC, CGIF, ក្រុមហ៊ុន GuarantCo, ក្រសួងបរិស្ថាន, ធនាគារជាតិនៃកម្ពុជា, និយ័តករធានារ៉ាប់រងកម្ពុជា ក៏ដូចជាអ្នកពាក់ព័ន្ធផ្សេងៗជាច្រើនទៀតផងដែរ។ សិក្ខាសាលានេះ បានប្រព្រឹត្ដទៅដោយរលូន និងប្រកបដោយផ្លែផ្កាខ្ពស់៕