អាកាសយានដ្ឋានជាច្រើននៅអឺរ៉ុបជួបចលាចល​បន្ទាប់​ពី​រងការ​វាយ​ប្រហារ​តាម​អ៊ីនធឺណេត​លើ​ប្រព័ន្ធ Check-In

ជើងហោះហើរនៅអាកាសយានដ្ឋានអឺរ៉ុបសំខាន់ៗមួយចំនួន រួមមាន Heathrow ក្នុងចក្រភពអង់គ្លេស ទីក្រុង Berlin-Brandenburg ក្នុងប្រទេសអាឡឺម៉ង់ ទីក្រុងព្រុចសែល ក្នុងប្រទេសបែលហ្ស៊ិក ទីក្រុង Dublin ក្នុងប្រទេសនិង Cork ក្នុងប្រទេសអៀរឡង់ បានប្រឈមនឹងការពន្យារពេលយ៉ាងទូលំទូលាយកាលពីថ្ងៃសៅរ៍ បន្ទាប់ពីការវាយប្រហារតាមប្រព័ន្ធអ៊ីនធឺណេតបានវាយប្រហារទៅលើប្រព័ន្ធCheck-Inនៅល្ងាចថ្ងៃសុក្រ។

ការរអាក់រអួលបានប៉ះពាល់ដល់ដំណើរការពិនិត្យចូល និងទម្លាក់ឥវ៉ាន់តាមប្រព័ន្ធអេឡិចត្រូនិក ដោយបង្ខំឱ្យអាកាសយានដ្ឋានពឹងផ្អែកលើប្រតិបត្តិការដោយដៃ។ អាកាសយានដ្ឋាន Heathrow ជិតទីក្រុងឡុងដ៍ បានជួបប្រទះការពន្យាពេលចេញដំណើរជាមធ្យម៣៤ នាទី ដោយជើងហោះហើរចំនួន ៤៤៥ ត្រូវបានពន្យារពេល និង ១៨ ត្រូវបានលុបចោល ខណៈដែលទីក្រុងព្រុចសែលបានលុបចោលពាក់កណ្តាលនៃជើងហោះហើរចេញដំណើររបស់ខ្លួនរហូតដល់ព្រឹកថ្ងៃចន្ទ។

បញ្ហានេះបណ្ដាលមកពីកម្មវិធី MUSE របស់ Collins Aerospace ដែលគ្រប់គ្រងការ Check-In អ្នកដំណើរសម្រាប់ក្រុមហ៊ុនអាកាសចរណ៍ប្រហែល ៣០០ នៅអាកាសយានដ្ឋានចំនួន ១០០។ អាកាសយានដ្ឋាននានាសង្កត់ធ្ងន់ថាការគ្រប់គ្រងចរាចរណ៍ផ្លូវអាកាសមិនត្រូវបានប៉ះពាល់ទេ ប៉ុន្តែអ្នកដំណើរនៅតែប្រឈមមុខនឹងការរង់ចាំយូរ និងការភ័ន្តច្រឡំ ដោយបុគ្គលិកបានប្រើឧបករណ៍បន្លឺសំឡេងដោយដៃដើម្បីប្រាប់អ្នកដំណើរជំនួស។

អាជ្ញាធរ រួមទាំងមជ្ឈមណ្ឌលសន្តិសុខអ៊ីនធឺណិតជាតិរបស់ចក្រភពអង់គ្លេស និងមន្ត្រីដឹកជញ្ជូន កំពុងសម្របសម្រួលជាមួយក្រុមហ៊ុន Collins Aerospace ដើម្បីស្ដារប្រព័ន្ធឡើងវិញ។

គួរបញ្ជាក់ថាឧបទ្ទវហេតុនេះគឺជាផ្នែកមួយការកើនឡើងនៃការវាយប្រហារតាមអ៊ីនធឺណិតលើការដឹកជញ្ជូន និងប្រព័ន្ធស្ថាប័ន បន្ទាប់ពីការវាយប្រហារពីមុនមកលើក្រុមហ៊ុនអាកាសចរណ៍ជប៉ុន សាកលវិទ្យាល័យColumbia និងទីក្រុងនានារបស់សហរដ្ឋអាមេរិក ដោយបង្ហាញពីភាពងាយរងគ្រោះនៅក្នុងហេដ្ឋារចនាសម្ព័ន្ធសំខាន់ៗ៕

អត្ថបទ៖ ប៊ុន សុភាព