សម្ដេចតេជោប្រាប់ម៉ាឡេស៊ីថា កម្ពុជាចង់បាននូវការគោរពបទឈប់បាញ់ពេញលេញមួយពីភាគីថៃ

ការគោរពបានពេញលេញនូវបទឈប់បាញ់រវាងកម្ពុជា និងថៃ ជាបំណងប្រាថ្នាដែលកម្ពុជាចង់បាន ដើម្បីឈានទៅស្វែងរកដំណោះស្រាយព្រំដែនដោយសន្តិវិធីរវាងប្រទេសទាំងពីរ។ នេះជាការគូសបញ្ជាក់របស់ប្រមុខរដ្ឋស្ដីទីកម្ពុជា សម្ដេចតេជោ ហ៊ុន សែន ប្រាប់ទៅកាន់សមាជិកសភាម៉ាឡេស៊ី ដែលកំពុងបំពេញទស្សនកិច្ចនៅកម្ពុជា។

ក្នុងជំនួបជាមួយប្រតិភូសមាជិកព្រឹទ្ធសភាសហព័ន្ធម៉ាឡេស៊ី ដឹកនាំដោយលោក Datuk Wira Dr. Mohd Hatta bin Md Ramli ដែលធ្វើឡើងកាលពីរសៀលថ្ងៃទី២ ខែតុលា ឆ្នាំ២០២៥ សម្ដេចតេជោ ហ៊ុន សែន បានចែករំលែកអំពីសភាពការណ៍វិវត្តចុងក្រោយនៃបញ្ហាជម្លោះតាមបន្ទាត់ព្រំដែនរវាងកម្ពុជា និងថៃ ពិសេសបញ្ហាប្រឈមពេលបច្ចុប្បន្នដែលកំពុងមានឡើងក្នុងជម្លោះនេះ។

សម្ដេចតេជោ បានពន្យល់ទៅកាន់ប្រតិភូសមាជិកសភាម៉ាឡេស៊ីពីរឿងរ៉ាវនៃការកើតឡើង និងបញ្ជាក់ពីគោលជំហររបស់កម្ពុជាដែលកំពុងតែព្យាយាមស្វែងរកដំណោះស្រាយដោយសន្តិវិធី ធ្វើយ៉ាងណាកាត់បន្ថយភាពតានតឹងដើម្បីឈានទៅសភាពការណ៍វិលមករកប្រក្រតីភាពឡើងវិញ។ សម្ដេចតេជោ ប្រាប់ប្រតិភូសមាជិកសភាម៉ាឡេស៊ី ថា នេះជាជំហររបស់កម្ពុជា។  

ជម្លោះ​ព្រំដែន​កម្ពុជា-ថៃ បាន​ផ្ទុះ​ឡើង​នៅ​តំបន់​មុំ​បី ខេត្ត​ព្រះវិហារ កាលពី​ថ្ងៃទី​២៨ ខែ​ឧសភា ឆ្នាំ​២០២៥ ហើយ​បាន​បន្ត​រាលដាល​ពេញ​ព្រំដែន​រវាង​ប្រទេស​ទាំង​ពីរ រហូត​​ក្លាយ​ទៅ​ជា​សង្គ្រាម​ដោយ​​ប្រដាប់​អាវុធ​ អស់​រយៈពេល៥​ថ្ងៃ កាលពី​ចុង​ខែ​កក្កដា។ តែយ៉ាងណា ក្រោយពី​មាន​កិច្ច​អន្តរាគមន៍​ពី​ប្រធានាធិបតី​សហរដ្ឋ​អាមេរិក លោក ដូណាល់ ត្រាំ និងនាយករដ្ឋមន្ត្រីម៉ាឡេស៊ី លោក អាន់វ៉ា អ៊ីប្រាហ៊ីម ដែលជា​ប្រធាន​អាស៊ាន​ប្តូរ​វេន ប្រទេស​ទាំង​ពីរ​បាន​ទទួល​យក​​កិច្ចព្រមព្រៀង​ឈប់​បាញ់​ កាលពី​យប់​ថ្ងៃទី​២៨ ខែ​កក្កដា ឆ្នាំ​២០២៥។

បើទោះជា​បទ​ឈប់​បាញ់​ចូល​ជា​ធរមានក៏ពិតមែន តែគេមើលឃើញថា ថៃនៅតែបន្តសកម្មភាពរំលោភបំពានបទឈប់បាញ់ ដោយថៃតែងតែបង្កហេតុនៅតាមខ្សែបន្ទាត់ព្រំដែន​ជាបន្តបន្ទាប់។

ក្នុងកាលៈទេសៈដែលបញ្ហាព្រំដែនកំពុងបន្តអូសបន្លាយដោយសារការបន្តលោភបំពានរបស់ភាគីថៃមកលើបទឈប់បាញ់ សម្ដេតេជោ ហ៊ុន សែន បានគូសបញ្ជាក់ជាថ្មីទៅកាន់ម៉ាឡេស៊ី ដែលជាប្រធានអាស៊ាន ថា អ្វីដែលកម្ពុជាចង់បាន គឺការរក្សានូវបទឈប់បាញ់ឱ្យបានពេញលេញ ហើយឈានទៅរកដំណោះស្រាយមួយឱ្យមានការវិលមករកនូវប្រក្រតីឡើងវិញ ដែលប្រទេសទាំងពីរធ្លាប់មានកន្លងមក។

សម្តេចតេជោ ក៏បានអរគុណចំពោះតួនាទីដ៏សកម្មរបស់ម៉ាឡេស៊ី ក្នុងការសម្របសម្រួលដោះស្រាយបញ្ហាព្រំដែនរវាងកម្ពុជា និងថៃ ជាពិសេសលោក អាន់វ៉ា អ៊ីប្រាហ៊ីម ដែលខិតខំប្រឹងប្រែងស្វែងរកបទឈប់បាញ់នេះ។

ឆ្លើយតបទៅនឹងសម្ដេចតេជោ លោក Datuk Wira Dr. Mohd Hatta bin Md Ramli សមាជិកសភាម៉ាឡេស៊ី បានបង្ហាញក្ដីសង្ឃឹមថា វិវាទព្រំដែនរវាងប្រទេសទាំងពីរនឹងអាចដោះស្រាយបានដោយសន្តិវិធី ក្នុងពេលខាងមុខ ហើយរំពឹងថា សន្តិភាពនឹងកើតមានឡើងវិញសម្រាប់ប្រទេសទាំងពីរ៕