បម្រាម ៦យ៉ាង ដូនតាចិនហាមកូនចៅមិនឱ្យធ្វើដាច់ខាត នៅថ្ងៃចូលឆ្នាំថ្មី

១. ហាមនិយាយពាក្យអសុរោះ ឬឈ្លោះជាមួយអ្នកដទៃ

ពាក្យសម្ដីមិនសមរម្យ ពាក្យអសុរោះ ឬអាសអាភាស ក៏ដូចជាការឈ្លោះប្រកែកជាមួយអ្នកដទៃ បង្ហាញពីអត្ថន័យអវិជ្ជមានដែលមិនមែនជាលាភសំណាងឡើយ សម្រាប់កូនចៅចិន ក្នុងថ្ងៃចូលឆ្នាំថ្មី។ តាម​ជំនឿ​និង​ទំនៀមទម្លាប់​របស់​ជនជាតិ​ចិន គេ​ជឿថា ​ការប្រើពាក្យមិនពិរោះពិសារ​នឹង​នាំមក​នូវ​សំណាងអាក្រក់​។

២. ហាមកក់សក់ ឬកាត់សក់

ចំពោះជនជាតិចិន ការកាត់សក់ ឬកក់សក់ ក្នុង​ថ្ងៃ​ចូល​ឆ្នាំថ្មី ​បាន​ក្លាយ​ជា​ការ​ហាមប្រាម មិនឱ្យធ្វើដាច់ខាត ព្រោះ​គេ​ជឿ​ថា វា​ធ្វើ​ឱ្យ​ជីវិត​មិន​ស្ថិតស្ថេរ។ ដូច្នេះ​សម្រាប់​អ្នក​ណា​ដែល​ត្រូវ​កក់​សក់​រាល់​ថ្ងៃ គេណែនាំឱ្យប្រើសាប៊ូស្ងួត ឬបាញ់ស្រ្ពៃយ៍ជំនួសវិញ។

៣. ហាមស្លៀកសម្លៀកបំពាក់ពណ៌សនិងខ្មៅ

​ថ្ងៃ​ចូល​ឆ្នាំ​ចិន ឆ្នាំ​២០២៣នេះ ការស្លៀក​សម្លៀក​បំពាក់​ស-ខ្មៅ ជាបម្រាមចំពោះកូនចៅ និងអ្នកជាប់សែស្រឡាយ ព្រោះវាជានិមិត្តរូបនៃការស្លាប់ និងប្រផ្នូលអាក្រក់។ ឆ្នាំនេះ គេណែនាំឱ្យស្លៀកពាក់ចម្រុះពណ៌ដូចជា ពណ៌មាស ក្រហម ឬពណ៌ផ្សេងទៀត ដែលអាចផ្ដល់នូវសំណាងល្អដល់ខ្លួនឯង និងគ្រួសារ។

៤. ហាមខ្ចីលុយគេ

បម្រាមទី៤ ក្នុងថ្ងៃ​ចូល​ឆ្នាំ​ចិន​ ឆ្នាំថោះ ​គឺមិនត្រូវ​ខ្ចី​លុយ​នរណាដាច់ខាត ដោយសារតែគេជឿថា អ្នកនឹងជាប់បំណុលពេញមួយឆ្នាំ។ លើសពីនេះ ហាមនិយាយថាគ្មានលុយ ព្រោះវាគ្មានសិរីសួស្ដី នាំគ្មានលុយ គ្មានទ្រព្យ។

៥. ហាមទិញស្បែកជើងថ្មី

ប្រជាជនចិន មានជំនឿថា ការទិញស្បែកជើងមួយគូ ក្នុងថ្ងៃចូលឆ្នាំថ្មី នឹងធ្វើឱ្យពួកគេ សំណាងអាក្រក់ កើតរឿងមិនសប្បាយចិត្ត ពេញមួយឆ្នាំតែម្ដង។

៦. ហាមយំ

យំ ជានិមិត្តរូបនៃភាពសោកសៅ។ ដូច្នេះក្នុងឱកាសពិធីបុណ្យចូលឆ្នាំថ្មីប្រពៃណីជាតិរបស់ចិន បម្រាម​​សំខាន់​បំផុតមួយគឺ​ ហាម​យំ ព្រោះ​គេ​ជឿ​ថា​ នឹង​ធ្វើ​ឱ្យ​ឆ្នាំ​នេះ​ពោរពេញ​ទៅ​ដោយ​ទុក្ខព្រួយមិនចេះស្រាកស្រាន្ត។

ក្រៅពីនេះ នៅតំបន់ខ្លះមានជំនឿផ្សេងទៀតដូចជា កុំ​ចូល​ទៅ​ក្នុង​បន្ទប់​គេង​របស់​អ្នក​ដទៃ ឬ​អនុញ្ញាត​ឱ្យ​អ្នក​ដទៃ​ចូល​ទៅ​ក្នុង​បន្ទប់​របស់ខ្លួន ព្រោះសំណាងអាក្រក់នឹងមកនៅជាមួយរហូត ហើយកុំហូបបបរ ព្រោះវានឹងនាំទៅរកភាពក្រីក្រមិនចេះចប់៕

អត្ថបទ៖ សន្យា

ចុចអាន៖ ត្រណម ១០ ក្នុងពិធីចូលឆ្នាំចិនដែលគេជឿថាអាចបញ្ចៀសគ្រោះចង្រៃបាន

ចុចអាន៖ ត្រណមធំ ៥ យ៉ាង អ្នកជាប់សែស្រឡាយ ចិន មិនអាចប្រព្រឹត្តិ នៅថ្ងៃសែនចូលឆ្នាំថ្មីបានឡើយ