វប្បធម៌ ជំនឿ
អាជ្ញាធរជាតិអប្សរា អះអាងព្យាយាមមិនយកដុំថ្មថ្មីជំនួសជួសជុលចម្លាក់បង្កាន់ដៃនាគប្រាសាទបន្ទាយសំរ៉ែ
តាមក្រសួងវប្បធម៌នាថ្ងៃទី២៥ ខែកក្កដា នេះបានឱ្យដឹងថា អាជ្ញាធរជាតិអប្សរាកំពុងបន្តជួសជុលនិងផ្គុំឡើងវិញនូវចម្លាក់បង្កាន់ដៃនាគមានប្រវែង ២៤ ម៉ែត្រ ស្ថិតនៅខាងជើងឈៀងខាងកើតនៃប្រាសាទបន្ទាយសំរ៉ែ ដែលធ្លាក់បាក់ជាច្រើនកំណាត់រយៈពេលជាយូរមកហើយឱ្យប្រសើរឡើងវិញ ដោយព្យាយាមមិនយកដុំថ្មថ្មីមកជំនួសឡើយ។
លោក ឡុង ណារី ប្រធានក្រុមការងារអភិរក្សថ្មនៃនាយកដ្ឋានអភិរក្សប្រាសាទនិងបុរាណវិទ្យាបានពន្យល់ថា ការងារជួសជុលចម្លាក់បង្កាន់ដៃនាគនៃប្រាសាទបន្ទាយសំរ៉ែ បានចាប់ផ្តើមរយៈពេលជិត ២ ខែមកហើយ ដោយក្រុមការងារបានប្រឹងប្រែងនៅក្នុងការស្វែងរកបំណែកនានាដែលបានបាក់បែកពីទីតាំងផ្សេងៗតាមដែលអាចធ្វើទៅបាន ក៏ដូចជាប្រមូលបំណែកតូចធំរបស់ចម្លាក់ដើមមកផ្គុំគ្នា ដោយព្យាយាមមិនយកថ្មថ្មីមកជំនួសទេ។
លោកអះអាងថា «ការប្រើបំណែកថ្មថ្មីទៅប៉ះជាមួយនិងបង្កាន់ដៃនាគ អាចធ្វើឡើងនៅត្រង់ចំណុចណាដែលសំខាន់ខ្វះមិនបាន ហើយលុះត្រាតែពុំអាចស្វែងរកបំណែកដើមឃើញប៉ុណ្ណោះ»។
លោក ឡុង ណារី ក៏បានសង្កត់ធ្ងន់ដែរថា «ជាច្រើនឆ្នាំមកហើយ ដែលបង្កាន់ដៃនៃប្រាសាទបន្ទាយសំរ៉ែ តែងមានបញ្ហាប្រឈមដែលបណ្ដាលមកពីកម្សោយរចនាសម្ពន្ធគ្រឹះមិនអាចទ្រទម្ងន់សង្កត់ ការបំផ្លាញដោយបរិស្ថានធម្មជាតិ ស្លែ ទឹក សីតុណ្ហភាព អាកាសធាតុ និងកង្វះការថែទាំជាដើម»។
ម្យ៉ាងវិញទៀត ការជួសជុលថ្ម ព្យាបាលថ្ម តភ្ជាប់បំណែកថ្មឡើងវិញ គឺប្រើប្រាស់ការស្វានដាក់ស្នូលតភ្ជាប់បំណែកដងខ្លួននាគ។ ការជួសជុលនេះ ក៏ផ្ដោតសំខាន់ទៅលើការដាប់ជើងទម្រចាស់ៗជាច្រើនបំណែក និងដងខ្លួននាគដែលបានប្រេះបែកទាំងស្រុងចេញពីគ្នាប្រឈមនឹងការបាក់រលំ។
បន្ទាប់មកក្រុមការងារបានពង្រឹងផ្ទៃថ្មដែលពុកផុយឱ្យរឹងមាំឡើងវិញ ចាក់បំពេញបាយអចូលក្នុងប្រហោង និងតំណបិទភ្ជិតរន្ធតូចឆ្មារ ស្នាមប្រេះ និងប្រហោងតូចៗនៅលើផ្ទៃថ្មចម្លាក់ សម្អាតស្លែ និងបន្សាបយកជាតិអំបិលចេញពីផ្ទៃថ្ម ដាប់យកចេញនូវដែកទាមចាស់ៗ និងស៊ីម៉ងត៍អស់គុណភាព រៀបដំឡើងបង្កាន់ដៃនាគឡើងវិញ ឱ្យស្របតាមទីតាំងដើម។
គួរបញ្ជាក់ដែរថា កិច្ចការងារជួសជុលនេះ គឺធ្វើឡើងដើម្បីលើកតម្លៃឡើងវិញនៅប្រាសាទបន្ទាយសំរ៉ែ ក៏ដូចជាធ្វើឱ្យមាននិរន្តភាពសម្រាប់ការអភិរក្សប្រាសាទខ្មែរផងដែរ៕
-
ព័ត៌មានជាតិ១ សប្តាហ៍ ago
ម្ចាស់សំណង់របងថ្មនៅរមណីយដ្ឋានឆ្នេរនេសាទ នៅតែរឹងទទឹងមិនព្រមវាយកម្ទេចរបងចេញ
-
ព័ត៌មានអន្ដរជាតិ៣ ថ្ងៃ ago
Breaking News! បណ្ដាញសង្គម Facebook មានបញ្ហានៅទូទាំងពិភពលោកជាថ្មី
-
ព័ត៌មានជាតិ១ សប្តាហ៍ ago
ដើម្បីកុំឱ្យភោជនីយដ្ឋានដួលរលំបះជើងទាន់ សម្ដេចធិបតី បញ្ជាឱ្យកែម៉ោងពិនិត្យជាតិអាល់កុល
-
ព័ត៌មានអន្ដរជាតិ៧ ថ្ងៃ ago
អ្នកវិទ្យាសាស្ត្រស្កុតឡែនរកឃើញហ្វូស៊ីលចម្លែករូបរាងដូចសត្វនាគចិនអាយុកាល ២៤០ លានឆ្នាំ
-
ជីវិតកម្សាន្ដ១ សប្តាហ៍ ago
តួជនទី៣ Benz ត្រលប់មកតំណែងស្រីស្អាតម្ដងទៀត ទោះឈានដល់អាយុ៤៣ឆ្នាំ
-
កីឡា៣ ថ្ងៃ ago
ជើងឯកម៉ុងហ្គោលី Erdene អរគុណបុរសធ្លាប់ដឹកដៃ ឈឿង ល្វៃ ធ្វើឲ្យក្តីស្រមៃក្លាយជាការពិត
-
ជីវិតកម្សាន្ដ២ ថ្ងៃ ago
ខេមរៈ សិរីមន្ត ៖ «ទោះខ្ញុំមិនមែនជាអ្នកធំ តែសុំធ្វើកិច្ចការធំខ្លះជូនជាតិតាមវិជ្ជាជីវៈសិល្បៈ បង្ហាញទៅពិភពលោក»
-
ព័ត៌មានជាតិ៦ ថ្ងៃ ago
សម្តេច ហ៊ុន សែន ៖ ហេតុអ្វីបានជាមកដល់ពេលនេះហើយមានមន្ត្រីយើងប្រព្រឹត្តបែបនេះ ដោយពាក់ស្បែកជើងចូលក្នុងព្រះវិហារ?