វប្បធម៌ ជំនឿ
រាត្រីសមោសរ សំពត់បត់ លើកទី១ មានកម្មវិធីពិសេសអ្វីខ្លះ?
ដោយមើលឃើញពីគុណតម្លៃ នៃសំពត់បត់ខ្មែរ និងដើម្បីចូលរួមថែរក្សាប្រពៃណីទំនៀមទម្លាប់ កេរដំណែលដូនតា រួមចំណែកអភិរក្សលើកតម្កើងតម្លៃ នៃសំពត់បត់ខ្មែរ ឱ្យកាន់តែមានប្រជាប្រិយភាព ពេញនិយមក្នុងកម្រិតជាតិ ក្រសួងវប្បធម៌ និងវិចិត្រសិល្បៈ នឹងរៀបចំកម្មវិធី “រាត្រីសមោសរសំពត់បត់ខ្មែរ” និងមានតាំងបង្ហាញ “ពិព័រណ៍សិប្បកម្មយើង” តម្បាញសូត្រ ហូល ផាមួង ក្រមា ដែលផលិតពីពណ៌ ធម្មជាតិ និងវត្ថុសិល្បៈដែលជាសិប្បកម្មស្នាដៃកូនខ្មែរ រយៈពេល ៣ថ្ងៃ ចាប់ពីថ្ងៃទី១ ដល់ ទី៣ ខែមីនា ឆ្នាំ២០២៤ នៅសាលសន្និសីទ ចតុម្មុខ។

អ្នកស្រី ឡងឌី សាន់ណារ៉ា រដ្ឋលេខាធិការ និងជាប្រធានគណ:កម្មការរៀបចំកម្មវិធី បានឱ្យ “កម្ពុជាថ្មី” ដឹងថា ការរៀបចំ “រាត្រីសមោសរ សំពត់បត់ខ្មែរ” មានគោលបំណងថែរក្សាប្រពៃណី កេរដំណែលអរូបីរបស់ដូនតាខ្មែរយើងដែលបន្សល់ទុកពីមួយជំនាន់ទៅមួយជំនាន់។ ហើយកម្មវិធីនេះជាការបំផុសស្មារតីកូនខ្មែរឱ្យស្រលាញ់វប្បធម៌របស់ខ្លួន ជាពិសេសជំរុញឱ្យស្ត្រីខ្មែរយល់ដឹងកាន់តែច្បាស់ពីគុណតម្លៃ ភាពស្រស់ស្អាត នៃសំពត់បត់ខ្មែរក្នុងសង្គមខ្មែរ។

កម្មវិធី “រាត្រីសមោសរសំពត់បត់ខ្មែរ” និងមានតាំងបង្ហាញ “ពិព័រណ៍សិប្បកម្មយើង” ថ្ងៃទី១ ត្រូវនឹងថ្ងៃសុក្រ ទី១ ខែមីនា ឆ្នាំ២០២៤ នេះ មាន ពិធីបើកកម្មវិធី “ពិព័រណ៍សិប្បកម្មយើង” ចាប់ពីម៉ោង ៩ ព្រឹក ដោយបើកការចូលរួមទស្សនាដោយសេរីជូនសាធារណជនទូទៅ និងភ្ញៀវជាតិ-អន្តរជាតិ។

ចំណែក កម្មវិធីថ្ងៃទី២ ត្រូវថ្ងៃសោរ៍ ទី២ ខែមីនា ឆ្នាំ២០២៤ បន្តដំណើរការកម្មវិធី “ពិព័រណ៍សិប្បកម្មយើង” ចាប់ពីម៉ោង ៩:០០ ព្រឹក ហើយនឹងមានដំណើរការកម្មវិធី រាត្រីសមោសរ សំពត់បត់ខ្មែរ ចាប់ពីម៉ោង ១៧:០០ សម្រាប់ភ្ញៀវកិត្តិយសជាតិ-អន្តរជាតិ ដែលមានលិខិតអញ្ជើញ។ កម្មវិធីនេះ នឹងមានការថ្លែងសុន្ទរកថាស្វាគមន៍ និងសេចក្តីរាយការណ៍របស់ អ្នកស្រី ឡងឌី សាន់ណារ៉ា រដ្ឋលេខាធិការ ក្រសួងវប្បធម៌ និងវិចិត្រសិល្បៈ និងជាប្រធានគណៈកម្មការរៀបចំកម្មវិធី “រាត្រីសមោសរ សំពត់បត់ខ្មែរ, សុន្ទរកថារបស់ សម្តេចកិត្តិសង្គហបណ្ឌិត ម៉ែន សំអន ឧត្តមប្រឹក្សាផ្ទាល់ព្រះមហាក្សត្រ នៃព្រះរាជាណាចក្រកម្ពុជា, វីដេអូឯកសារ ស្តីពីប្រវត្តិ នៃសម្លៀកបំពាក់តាមសម័យកាលដោយចាប់ផ្ដើមពីសម័យអង្គរ។

ជាមួយគ្នានេះ ក៏នឹងមានទស្សនីយភាពសិល្បៈដូចជា ១. បទចម្រៀង “សំបុត្របង” អមដោយរូបភាព នៃខ្សែភាពយន្ត រឿង “កូនប្រុសក្រោមពន្លឺព្រះច័ន្ទពេញបូណ៌មី” ច្រៀងដោយ អ្នកស្រី នៅ សៀងហៃ, ២. វីដេអូ បង្ហាញពីភូមិតម្បាញខ្មែរ សម្តែងដោយ កញ្ញា រឿន ណាត Miss universe 2018 ការបង្ហាញសម្លៀកបំពាក់ ដែលច្នៃពីសូត្រ ដែលមានរូបគោមចម្រុះ បង្ហាញដោយ កញ្ញា រឿន ណាត និងតារាបង្ហាញម៉ូត ១១រូប សម្លៀកបំពាក់កុមារ ដែលច្នៃពីសូត្រ បង្ហាញដោយ កុមារី Ellie, Bella និងកុមារី ១០រូប, ៣. ចាប៉ីដងវែង “គុណតម្លៃ នៃសំពត់បត់ខ្មែរ” ច្រៀងដោយ លោក សារី សិឡា, ៤. វីដេអូសម្ភាសន៍ថ្នាក់ដឹកនាំ និងព្រឹទ្ធាចារ្យ អំពីការប្រើប្រាស់សម្លៀកបំពាក់ក្នុងពិធីផ្សេងៗ ឯកសណ្ឋានផ្លូវការ (បុណ្យជាតិ) ដែលមាន ៧ពណ៌ សម្លៀកបំពាក់ ក្នុងពិធីបុណ្យប្រពៃណីជាតិខ្មែរ, ៥. របាំទេវស្រីសួគ៌ សម្តែងដោយ សិល្បការិនីនាយកដ្ឋានសិល្បៈទស្សនីយភាព, ៦. ការបង្ហាញម៉ូតសម្លៀកបំពាក់ រាត្រីសមោសរ បង្ហាញដោយ៖ ក្រុម Oliva Kong ។

ចំពោះ កម្មវិធីថ្ងៃទី៣ ត្រូវនឹងថ្ងៃអាទិត្យ ទី៣ ខែមីនា ឆ្នាំ២០២៤ បន្តដំណើរការកម្មវិធី “ពិព័រណ៍សិប្បកម្មយើង” ដោយទទួលការចូលរួមទស្សនារបស់សាធារណជនទូទៅ និងភ្ញៀវជាតិ អន្តរជាតិ ចាប់ពីម៉ោង ៩:០០ ព្រឹក។

គួរបញ្ជាក់ថា នេះជា លើកទី១ ដែលមានកម្មវិធី រាត្រីសមោសរ សំពត់បត់ខ្មែរ។ តាមគម្រោង ក្រសួងវប្បធម៌ និងវិចិត្រសិល្បៈ នឹងរៀបចំកម្មវិធី រាត្រីសមោសរនេះ នៅឆ្នាំក្រោយៗជាបន្តបន្ទាប់ទៀត៕

-
ព័ត៌មានអន្ដរជាតិ៧ ថ្ងៃ ago
ពលរដ្ឋថៃ នៅជាប់ព្រំដែនមីយ៉ាន់ម៉ា កំពុងត្រៀមខ្លួនសម្រាប់ភាពអាសន្ន
-
បច្ចេកវិទ្យា៣ ថ្ងៃ ago
OPPO Reno14 Series 5G សម្ពោធផ្លូវការហើយ ជាមួយស្ទីលរចនាបថកន្ទុយទេពមច្ឆា និងមុខងារ AI សំខាន់ៗ
-
ព័ត៌មានអន្ដរជាតិ៥ ថ្ងៃ ago
ថៃ អះអាងថា ជនកំសាកដែលលួចវាយទាហានកម្ពុជា គឺជាទេសចរ ប៉ុណ្ណោះ
-
ព័ត៌មានជាតិ៥ ថ្ងៃ ago
កម្ពុជា រងឥទ្ធិពលពីព្យុះមួយទៀត គឺជាព្យុះទី៥ ឈ្មោះ ណារី (Nari)
-
ព័ត៌មានអន្ដរជាតិ៣ ថ្ងៃ ago
រដ្ឋមន្ត្រីក្រសួងថាមពលថៃ ប្រាប់ពលរដ្ឋកុំជ្រួលច្របល់ បើសង្គ្រាមផ្ទុះឡើង អ្នកខាតធំគឺខ្លួនឯង
-
ព័ត៌មានជាតិ១ សប្តាហ៍ ago
ព្យុះទី៣ និងទី៤ អស់ឥទ្ធិពល តែកម្ពុជានៅតែមានភ្លៀងធ្លាក់ជាមួយផ្គររន្ទះ និងខ្យល់កន្ត្រាក់
-
ព័ត៌មានអន្ដរជាតិ៥ ថ្ងៃ ago
«នាយករដ្ឋមន្ត្រី៣នាក់ក្នុងពេល៣ថ្ងៃ» ជារឿងដែលមួយពិភពលោក មិនអាចធ្វើបានដូចថៃ
-
សន្តិសុខសង្គម៥ ថ្ងៃ ago
អាវុធហត្ថបង្ក្រាបរថយន្ត ១ គ្រឿង លួចដឹកទឹកដោះគោស្រស់ ២៧ កេះ នាំចូលពីថៃ