ក្រសួងវប្បធម៌ ប្រកាសពីការប្រឡងចាប៉ីដងវែង ក្នុងមហោស្រពចាប៉ីដងវែងទូទាំងប្រទេស ឆ្នាំ២០២៥

ក្រសួងវប្បធម៌ និងវិចិត្រសិល្បៈ បានប្រកាសរៀបចំមហោស្រពចាបុីដងវែងទូទាំងប្រទេសឆ្នាំ២០២៥ ចាប់ពីថ្ងៃទី១១ ដល់ ថ្ងៃទី១៣ ខែមិថុនា ឆ្នាំ២០២៥ នៅសាលមហោស្រពនាយកដ្ឋានសិល្បៈទស្សនីយភាព រាជធានីភំ្នពេញ ។ ក្នុងនោះ ក្រសួងក៏បានប្រកាសរើសបេក្ខជន បេក្ខនារី ដែលមានបំណងចូលរួមប្រកួតចាប៉ីដងវែង ក៏អាចដាក់ពាក្យប្រកួតក្នុងកម្មវិធីនេះបានដែរ។

បើតាមក្រសួងវប្បធម៌ ការរៀបចំកម្មវិធីនេះ ធ្វើឡើងក្នុងគោលបំណងចូលរួមលើកស្ទួយវប្បធម៌វប្បធម៌ អត្តសញ្ញាណជាតិ ដើម្បីជាចំណែកអភិវឌ្ឍន៍សង្គម និងលើកកម្ពស់កិត្យានុភាពជាតិ ជាពិសេស គឺលើកទឹកចិត្តដល់សិល្បករ សិល្បការិនី ដែលមានជំនាញផ្នែកចាប៉ីដងវែង មានសកម្មភាពផុសផុលឡើងវិញ។

ចំពោះការប្រកួតប្រជែងនេះ ក្រសួងតម្រូវឱ្យបេក្ខជនដែលដាក់ពាក្យប្រកួត មានសញ្ជាតិខ្មែរ, មិនមែនជាបេក្ខជនជ័យលាភីលេខ១ ក្នុងកម្មវិធីមហោស្រពចាបុីដងវែងទូទាំងប្រទេសកន្លងមក, អ្នកដាក់បាក្យប្រឡងត្រូវថតវីដេអូច្រៀង ឬសកម្មភាពសម្តែងចាប៉ីដងវែងថ្មីរបស់ខ្លួនរយៈពេល ១៥នាទី ក្នុងករណីដែលគណ​ៈកម្មការពិនិត្យឃើញថា វីដេអូដែលបេក្ខជនផ្ញើមកមានការកាត់តបច្ចេកទេសជួយសំឡេង នោះអ្នកប្រឡងនឹងត្រូវធ្លាក់ដោយស្វ័យប្រវត្តិ។ ជាងនេះទៀត បេក្ខជនដែលមានពិការភាព នឹងត្រូវបានលើកទឹកចិត្ត។

សម្រាប់វិញ្ញាសាប្រកួតប្រជែងវិញ ក្នុងវគ្គជម្រុះ គឺជាប្រធានបទសេរី ដែលមានបង្កប់អត្ថន័យខ្លឹមសារអប់រំរយៈពេល១៥នាទី។ វគ្គពាក់កណ្តាលផ្តាច់ព្រ័ត្រ ជាប្រធានបទទាក់ទងនឹងប្រធានបទ ទំពាំងស្នងឫស្សី ដែលមានរយៈពេល ១៥នាទី។ រីឯ វគ្គផ្តាច់ព្រ័ត្រ មានប្រធានបទទាក់ទងនឹង ទំពាំងស្នងឫស្សី  និងប្រធានបទដែលគណៈកម្មការមេប្រយោគដាក់ជូនអ្នកប្រឡងភ្លាមៗរយៈពេល ១៥នាទី។

បេក្ខជនដែលឈ្នះការប្រកួតប្រជែងចាប៉ីដងវែងនេះ ជ័យលាភីលេខ១ ទទួលបានពានមាស១ បណ្ណសរសើរ និងប្រាក់រង្វាន់ ៦លានរៀល។ ជ័យលាភីលេខ២ ទទួលបានពានប្រាក់១ បណ្ណសរសើរ និងប្រាក់ ៤លានរៀល, លេខ៣ ​ទទួលបានពានសំរឹទ្ធ១ បណ្ណសរសើរ និងប្រាក់ ២លានរៀល, ចំណែកជ័យលាភីកិត្តិយស ទទួលបានបណ្ណសរសើរ និងប្រាក់លើកទឹកចិត្ត ១លានរៀល។

ពាក្យសុំចូលរួមប្រកួត៖ https://drive.google.com/file/d/1Pcr4hkeie5K4lTZ1KueTw4A-REMZYMMm/view?usp=drive_linkសេចក្ដីជូនដំណឹង៖ https://m.facebook.com/story.php?story_fbid=975750654744146&id=100069276606598&mibextid=wwXIfr#កិច្ចការពារបេតិកភណ្ឌជាភារកិច្ចរបស់កូនខ្មែរគ្រប់ៗរូប ៕