កីឡា

ស្ថិតិ៩ប្រកួតផ្លូវការ របស់ក្រុមកម្ពុជានៅពហុកីឡដ្ឋានជាតិមរតកតេជោ មុនវគ្គផ្តាច់ព្រ័ត្រ ACL

បានផុស

៥៧ វិនាទី មុន

នៅ

ថ្ងៃសៅរ៍ ២៦ មេសា ២០២៥

ដោយ

ក្រុមជម្រើសជាតិ និងក្លិបកម្ពុជា បានប្រកួតផ្លូវការចំនួន៩លើកហើយនៅពហុកីឡដ្ឋានជាតិមរតកតេជោ គិតចាប់តាំងពីបើកដំណើរការតាំងពីឆ្នាំ២០២២ ដោយភាគច្រើនទទួលបានលទ្ធផលល្អ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ការប្រកួតពានរង្វាន់ AFF U-23 Championship កាលពីឆ្នាំ២០២២ គឺជាព្រឹត្តិការណ៍ផ្លូវការលើកដំបូងប្រៀបដូចជាពិធីបើកសម្ពោធពហុកីឡដ្ឋានជាតិមរតកតេជោថ្មី។ ក្រុមយុវជនកម្ពុជាឆ្លងកាត់វគ្គសន្សំពិន្ទុក្នុងពូល៣លើកគឺ ឈ្នះ២ និងចាញ់១។ ក្រុម U23 កម្ពុជា បានយកឈ្នះ ព្រុយណេ ដោយលទ្ធផល ៦-០, ឈ្នះ ហ្វីលីពីន ១-០ និងចាញ់ ទីម័រខាងកើត ០-១ ពីថ្ងៃទី១៤ ដល់ទី២០ ខែកុម្ភៈ ឆ្នាំ២០២២។

ក្រុមបាល់ទាត់ជម្រើសជាតិកម្ពុជាបានប្រកួតជាផ្លូវការចំនួន៤លើកនៅពហុកីឡដ្ឋានជាតិមរតកតេជោ។ ក្នុងចំណោម៤លើកនោះ កម្ពុជាបានចាញ់តែម្តងគត់គឺចាញ់ ក្រុមបាល់ទាត់ជម្រើសជាតិ បង់ក្លាដែស ដោយលទ្ធផល ០-១ កាលពីថ្ងៃទី២២ ខែកញ្ញា ឆ្នាំ ២០២២។ ៣ប្រកួតផ្សេងទៀត ក្រុមជម្រើសជាតិកម្ពុជាបានយកឈ្នះ ហ្វីលីពីន ២-១, ឈ្នះ ព្រុយណេ ៥-១ ក្នុងពានរង្វាន់ AFF Championship ក្នុងឆ្នាំ ២០២២ និងឈ្នះទីម័រខាងកើត ដោយលទ្ធផល ២-១ សម្រាប់ការប្រកូតមិត្តភាពអន្តរជាតិនៅក្នុងឆ្នាំ ២០២២។

ចាប់តាំងពីដាច់ឆ្នាំ ២០២២មក ក្រុមបាល់ទាត់ជម្រើសជាតិកម្ពុជាមិនបានរៀបចំការប្រកួតផ្លូវការនៅពហុកីឡដ្ឋានជាតិមរតកតេជោឡើយ។ ចូលឆ្នាំ២០២៥ទើបមានការប្រកួតផ្លូវការជាថ្មីគឺ ក្លិបបាល់ទាត់ ព្រះខ័នរាជស្វាយរៀងដែលបានប្រកួតពីរលើកហើយ។ លើកទី១ ពួកគេបានយកឈ្នះក្រុមរបស់ប្រទេសមីយ៉ាន់ម៉ា Shan United ដោយលទ្ធផល ៦-២ ជើងទី១ វគ្គ៨ក្រុមចុងក្រោយ និងលើកទី២បានយកឈ្នះក្រុមរបស់ប្រទេសឥណ្ឌូណេស៊ី Madura United ដោយលទ្ធផល ៣-០ ជើងទី១ វគ្គពាក់កណ្តាលផ្តាច់ព្រ័ត្រ ពានរង្វាន់ AFC Challenge League។

នៅថ្ងៃទី១០ ខែឧសភា ខាងមុខនេះគឺជាការប្រកួតលើកទី៣របស់ ព្រះខ័នរាជស្វាយរៀង នៅពហុកីឡដ្ឋានដ៏ធំបំផុតនៅប្រទេសកម្ពុជា ហើយជាការប្រកួតផ្តាច់ព្រ័ត្រ និងជាការធ្វើម្ចាស់ផ្ទះពានរង្វាន់អាស៊ីលំដាប់ទី៣លើកដំបូង៕