រុស្ស៊ី សរសើរទ័ពកូរ៉េខាងជើង ដែលជួយខ្លួនរំដោះបានតំបន់ Kursk 

អំឡុងពេលរាយការណ៍អំពីប្រតិបត្តិការនៅសមរភូមិទៅកាន់ប្រធានាធិបតីរុស្ស៊ី វ្ល៉ាឌីមៀរ ពូទីន កាលពីថ្ងៃសៅរ៍ទី២៦ខែមេសាឆ្នាំ២០២៥ អគ្គសេនាធិការ Valery Gerasimov បានលើកសរសើរអំពីការរួមចំណែករបស់ទាហានកូរ៉េខាងជើង ដែលជួយឲ្យកងទ័ពរុស្ស៊ី វាយរំដោះបានតំបន់ Kursk ពីកងកម្លាំងអ៊ុយក្រែន។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តាមការចុះផ្សាយរបស់ RT, លោក Gerasimov រាយការណ៍ថា កងទ័ពកូរ៉េខាងជើង បានបង្ហាញពីការតស៊ូនិងវីរភាព ដោយឈរប្រកៀកស្មាជាមួយកងកម្លាំងរុស្ស៊ី  ខណៈលោកពូទីន ក៏ប្រកាសដែរថា ពេលនេះរុស្ស៊ី រំដោះតំបន់ព្រំដែនអ៊ុយក្រែន បានទាំងស្រុងហើយ។

ពាក់ព័ន្ធការចូលរួមរបស់កងទ័ពកូរ៉េខាងជើងនេះ លោក Gerasimov អះអាងថា ទ័ពកូរ៉េខាងជើងកំពុងចូលរួមក្នុងការរំដោះតំបន់ Kursk របស់រុស្ស៊ី ក្រោមកិច្ចព្រមព្រៀងភាពជាដៃគូយុទ្ធសាស្ត្រគ្រប់ជ្រុងជ្រោយរវាងទីក្រុងមូស្គូនិងព្យុងយ៉ាង ដែលបានចូលជាធរមានកាលពីខែធ្នូឆ្នាំមុន។ សន្ធិសញ្ញានេះគឺផ្តល់ជំនួយយោធាទៅវិញទៅមក ក្នុងករណីមានការវាយប្រហារ។

ការអនុវត្តកិច្ចព្រមព្រៀងនេះ គឺធ្វើឡើងក្រោយសហរដ្ឋអាមេរិកនិងអ្នកគាំទ្រកៀវផ្សេងទៀតអះអាងថា ទីក្រុងព្យុងយ៉ាងបានបញ្ជូនទាហានប្រហែល ១២ ០០០នាក់ទៅរុស្ស៊ីសម្រាប់ការបណ្តុះបណ្តាល និងការដាក់ពង្រាយនៅក្នុងជម្លោះអ៊ុយក្រែន។

ទោះបីជាយ៉ាងណាក៏ដោយ កាលនោះ ទាំងទីក្រុងមូស្គូនិងព្យុងយ៉ាង សុទ្ធតែមិនទទួលស្គាល់ឬបដិសេធរបាយការណ៍នោះឡើយ។

សូមជម្រាបថា នៅថ្ងៃទី៦ខែសីហាឆ្នាំ២០២៤ ទ័ពអ៊ុយក្រែន បានសម្រុកតំបន់ Kursk ដោយវាយយកបានទឹកដី ១ ៣០០ុះគីឡូម៉ែត្រការ៉េនិងទីតាំងជាង១០០។

អ្វីដែលកត់សម្គាល់គឺថា នោះគឺជាលើកដំបូងហើយដែល ទ័ពបរទេសចូលកាន់កាប់ទឹកដីរុស្ស៊ី ចាប់តាំងពីសង្គ្រាមលោកលើកទី២មក៕

អត្ថបទ៖ សុខ សុវណ្ណ

ចុចអាន៖ ​​​យោធា​​រុស្ស៊ី​​អះអាងថា​ រំដោះ​តំបន់​ Kursk ​ទាំង​​ស្រុង​​ ចំថ្ងៃ​ លោក ​ត្រាំ ជួប​​​​ហ្សេលេនស្គី និង​មេដឹកនាំអឺរ៉ុប