សម្ដេចសភាធិបតីជំរុញវប្បធម៌សាមគ្គីដើម្បីរក្សាជ័យជម្នះរបស់គណបក្សបន្តទៀត

ប្រធានសភា និងជាសមាជិកគណៈអចិន្ត្រៃយ៍នៃគណៈកម្មាធិការកណ្ដាលគណបក្សប្រជាជនកម្ពុជា ប្រធានចលនាស្ត្រីគណបក្សចុះមូលដ្ឋានខេត្តកណ្ដាល សម្ដេចសភាធិបតី ឃួន សុដារី បានជំរុញដល់សមាជិកបានជំរុញដល់បណ្ដាញស្ត្រី​បន្ត​នូវវប្បធម៌សាមគ្គីគ្នាឱ្យបាន​ខ្ជាប់ខ្ជួន និងត្រូវខិតខំ​កសាងបក្ស និងបង្កើន​កម្លាំងគាំទ្រដើម្បី​រក្សា​ជ័យ​ជម្នះរបស់គណបក្សបន្តទៀត។

ថ្លែងក្នុងពិធីសំណេះសំណាលនិងប្រកាសទទួលស្គាល់សមាសភាពក្រុមការងារចលនាស្រ្តីគណបក្សស្រុកមុខកំពូល ខេត្តកណ្តាល នៅព្រឹកថ្ងៃសៅរ៍ទី២៦ ខែមេសា ឆ្នាំ២០២៥ សម្ដេចសភាធិបតី ឃួន សុដារី បាន​ថ្លែងថា គោលការណ៍ «រក្សាចាស់បង្កើនថ្មី» គឺនៅតែពង្រឹងដដែល ដោយវានឹងជួយដល់ការឈ្នះរបស់គណបក្ស នាំមកនូវជ័យជម្នះថ្មីៗបន្ថែមទៀតជូនគណបក្ស ពិសេសសម្រាប់ការបោះឆ្នោតឃុំ សង្កាត់នៅឆ្នាំ២០២៧ និងការបោះឆ្នោតសកលនៅឆ្នាំ២០២៨ ខាងមុខនេះ។

ជាមួយគ្នានេះសម្ដេចសភាធិបតីបានជំរុញដល់ក្រុមការងារត្រូវចុះជាប់ជាមួយប្រជាពលរដ្ឋ ក្តាប់ឱ្យបាននូវតម្រូវការរបស់ពួកគាត់ហើយរួមគ្នាដោះស្រាយនិងរាយការណ៍ជូនថ្នាក់ដឹកនាំ ឱ្យបានលឿន ក្នុងការដោះស្រាយជូនពលរដ្ឋ។

សម្ដេចថា៖ «វប្បធម៌របស់គណបក្សប្រជាជនកម្ពុជា តំាងពីដើមរៀងមក គឺមិនដែលទុកនិងរត់ចោលប្រជាពលរដ្ឋ ម្តងណាឡើយ»។

សម្តេចប្រធានក្រុមការងារចលនាស្រ្តីនៃក្រុមការងារគណបក្សចុះមូលដ្ឋានខេត្តកណ្តាល បានគូសបញ្ជាក់ថាក្នុងនាមជាសមាជិកគណបក្សត្រូវក្តាប់ឱ្យជាប់នូវសេចក្តីសម្រេចនិងគោលការណ៍នានារបស់គណបក្ស ក៏ដូចជារបស់រាជរដ្ឋាភិបាល ដែលបានឆ្លើយតបតម្រូវការរបស់ប្រជាពលរដ្ឋ ដូចជាការលើកកម្ពស់ជីវភាព ការផ្តល់សេវាសាធារណ:ជូនពលរដ្ឋ ដែលមានដូចជាគោលនយោបាយជាតិគំាពារសង្គម មានការផ្តល់ផលប្រយោជន៍ជាច្រើន ជូនពលរដ្ឋលើសេវាថែទំាសុខភាព និងជីវភាពរស់នៅ ពិសេសស្រ្តីនៅពេលពពោះនិងពេលសម្រាលបុត្រនោះ។

ក្នុងពិធីដែលមានអ្នកចូលរួមប្រមាណជាង២០០នាក់នោះ សម្ដេចសភាធិបតីបាន​ធានាថាដរាបណាកម្ពុជានៅតែរក្សាបាននូវសុខសន្ដិភាព ក្រោមការដឹកនាំរបស់គគណបក្សប្រជាជនកម្ពុជាពិតជាសម្រេចបាននូវគោលដៅអភិវឌ្ឍន៍ឆ្នាំ២០៣០ និងឆ្នាំ២០៥០។ ព្រមទាំងបានគូសបញ្ជាក់ថាថ្នាក់ដឹកនាំគណបក្សនិងប្រមុខរាជរដ្ឋាភិបាល តែងតែយកចិត្តទុកដាក់និងខ្វាយខ្វល់ពីសុខទុក្ខនិងជីវភាពរស់នៅរបស់សមាជិកគណបក្សនិងប្រជាពលរដ្ឋជាប់ជានិច្ច៕

អត្ថបទដោយ ហ៊ុន សិរីវឌ្ឍន៍