ចិន​សងសឹក ដោយ​គិតថ្លៃកំពង់ផែបន្ថែមលើ​នាវា​អាមេរិក​​

ក្រសួងដឹកជញ្ជូនចិន​ បានប្រកាសនៅថ្ងៃសុក្រនេះថា គ្រប់នាវាដែល​ជាកម្មសិទ្ធិ ឬប្រតិបត្តិការ​ដោយ​ក្រុមហ៊ុន ឬបុគ្គលអាមេរិក ឬនាវាដែលផលិតនៅ ឬបំពាក់ទង់ជាតិ​​អាមេរិក នឹង​ត្រូវគិតថ្លៃកំពង់ផែបន្ថែមរាល់ពេលធ្វើដំណើរទៅកាន់កំពង់ផែចិន​មួយជើងៗ ចាប់ពីថ្ងៃទី ១៤ តុលា តទៅ។ នេះបើតាមការចុះផ្សាយរបស់ទីភ្នាកងារសារព័ត៌មាន​រ៉យទ័រ។

ក្រសួងលើកឡើងថា ចំណាត់ការរបស់ចិន​នៅពេលនេះ ធ្វើឡើងដើម្បីជាការឆ្លើយតបទៅនឹង​វិធានការរបស់អាមេរិក ដែលកំណត់ថ្លៃកំពង់ផែសម្រាប់នាវាពាក់ព័ន្ធចិន ដោយ​ចូលជាធរមាន​នៅថ្ងៃទី ១៤ តុលា ដូចគ្នា។

អាមេរិក​កំណត់ថា រាល់នាវាផលិតនៅចិន ឬដំណើរការ ឬគ្រប់គ្រងដោយអង្គភាពរបស់ចិន នឹងត្រូវបង់ថ្លៃសេវានៅ​ពេល​ចត​នៅកំពង់ផែអាមេរិក​ដំបូងគេ។ ​រ៉យទ័រផ្សាយថា ថ្លៃសេវាអាចឡើងដល់ ១ លានដុល្លារ សម្រាប់​នាវា​មួយគ្រឿងដែលផ្ទុកលើសពី ១០ ០០០ កុងតឺន័រ ហើយតម្លៃនេះ​អាច​កើនឡើងជារៀងរាល់ឆ្នាំរហូតដល់ឆ្នាំ ២០២៨។នេះ​បើ​តាម «ការប៉ាន់ស្មានរបស់អ្នកវិភាគ»។ កប៉ាល់ដែលគ្រប់គ្រង ឬដំណើរការដោយចិន នឹងបង់ប្រាក់ ៨០ ដុល្លារ/ឯកតាស្តុកទំនិញ (per NT) សម្រាប់រាល់ការធ្វើដំណើរទៅកាន់សហរដ្ឋអាមេរិក។

ការដាក់ថ្លៃឈ្នួលលើនាវាអាមេរិក ​​​គឺជាផ្នែកមួយនៃការជំរុញផលិតកម្មនាវាអាមេរិក ​និង​ទប់ស្កាត់កំណើន​ឥទ្ធិពល​​របស់ចិនទាំងក្នុងការដឹកជញ្ជូនតាមជើងទឹក និងពាណិជ្ជកម្ម។

យ៉ាងណាមិញ ក្រសួងដឹកជញ្ជូនចិនបាននិយាយថា ចំណាត់ការរបស់អាមេរិក «គឺជាការរើសអើងយ៉ាងច្បាស់ និងធ្វើឱ្យខូចខាតយ៉ាងធ្ងន់ធ្ងរដល់ផលប្រយោជន៍ស្របច្បាប់នៃឧស្សាហកម្មដឹកជញ្ជូនរបស់ប្រទេសចិន រំខានយ៉ាងខ្លាំងដល់ស្ថិរភាពនៃខ្សែ​ច្រវ៉ាក់ផ្គត់ផ្គង់ពិភពលោក និងធ្វើឱ្យប៉ះពាល់យ៉ាងធ្ងន់ធ្ងរដល់សណ្តាប់ធ្នាប់សេដ្ឋកិច្ច និងពាណិជ្ជកម្មអន្តរជាតិ»។

គេមើលឃើញថា ក្នុងរយៈពេល ២ ទស្សវត្សរ៍មកនេះ ​ចិនបានឈានទៅដល់ចំណាត់ថ្នាក់លេខ ១ នៅលើពិភពលោកក្នុងផលិតកម្មនាវា ​ទាំងក្នុង​គម្រោងពាណិជ្ជកម្ម និងយោធា។ រ៉យទ័រផ្សាយថា ចំណាត់ការដំឡើងថ្លៃលើនាវាអាមេរិក អាចប៉ះពាល់អាមេរិក ជាង​ចំណាត់ការអាមេរិក​ដាក់នៅលើចិន។

បើតាមក្រសួងដឹកជញ្ជូនចិន នាវាអាមេរិកដែលចូលចតនៅកំពង់ផែចិនចាប់ពីថ្ងៃទី ១៤ ខែតុលា នឹង​ត្រូវបង់ថ្លៃសេវាកំពង់ផែ ៤០០ យន់ (៥៦,១៣ ដុល្លារ) per NT។ អត្រានេះនឹង​កើនដល់ ៦៤០ យន់ នៅខែមេសា ឆ្នាំក្រោយ, ​ដល់ ៨៨០ យន់ នៅខែមេសា ឆ្នាំ ២០២៧, និងដល់ ១ ១២០ យន់ នៅខែមេសា ឆ្នាំ ២០២៨។

គួរគូសបញ្ចាក់ថា ការដំឡើងថ្លៃសេវាកំពង់ផែរវាងអាមេរិក និងចិន គឺផ្នែកមួយ​នៃសង្រ្គាមពាណិជ្ជកម្ម​រវាងមហាអំណាចពិភព​លោកទាំង២ ដែល​មិនទាន់មាន​ការព្រមព្រៀងពាណិជ្ជកម្មណាមួយ​ជាក់លាក់នៅឡើយទេ៕ ​

​