តម្លៃប្រេងបន្តធ្លាក់ចុះថ្ងៃបើកជួញដូរប្រចាំសប្ដាហ៍ ដោយសារភាពតានតឹងពាណិជ្ជកម្ម

តម្លៃប្រេងអន្តរជាតិ​បន្តធ្លាក់ចុះសម្រាប់ការជួញដូរនៅលើទីផ្សារអាស៊ីនាព្រឹកថ្ងៃចន្ទនេះ ដែលជាថ្ងៃបើកការជួញដូរ​ប្រចាំសប្ដាហ៍ ដោយសារតែភាពតានតឹងពាណិជ្ជកម្ម​អាមេរិក-ចិន ដែលបន្ថែមទៅលើបញ្ហាពាក់ព័ន្ធនឹង​ភាពយឺតយ៉ាវនៃសេដ្ឋកិច្ច និងកម្សោយ​តម្រូវការប្រេង។ នេះបើតាមការចុះផ្សាយរបស់ទីភ្នាក់ងារសារព័ត៌មាន​រ៉យទ័រ។

តម្លៃប្រេងឆៅនាពេលអនាគត ម៉ាក Brent បាន​ធ្លាក់ចុះ ២៤ សេន ឬ ០,៤ ភាគរយ មកត្រឹម ៦១,០៥ ដុល្លារ/បារ៉ែល គិតត្រឹមម៉ោង ៨ កន្លះ ព្រឹកនៅទីក្រុងហុងកុង។ ចំណែកឯតម្លៃប្រេងអាមេរិក West Texas Intermediate (WTI) វិញ បាន​ធ្លាក់ចុះ​ ២១ សេន ឬ ០,៤ ភាគរយ មកត្រឹម ៥៧,៣៣ ដុល្លារ/បារ៉ែល។

តម្លៃប្រេងទាំង២ បាន​ធ្លាក់ចុះជាង ២ ភាគរយ កាលពីសប្ដាហ៍មុន ដែលនោះជាការធ្លាក់ចុះប្រចាំសប្ដាហ៍ ៣ សប្ដាហ៍ជាប់ៗគ្នា ខណៈ​ទីភ្នាក់ងារថាមពលអន្តរជាតិ​រំពឹងពីកំណើន​នៃការផ្គត់ផ្គង់នៅក្នុងឆ្នាំ ២០២៦ ចំពេលដែលតម្រូវការខ្សោយ។

អ្នកវិភាគទីផ្សារបាន​ប្រាប់រ៉យទ័រថា កង្វល់ពាក់ព័ន្ធនឹង​ការផ្គត់ផ្គង់លើសលុបពីប្រទេសផលិតប្រេង និងភាពយឺតយ៉ាវនៃសេដ្ឋកិច្ច ដែល​កើតចេញពីភាពតានតឹងពាណិជ្ជកម្មអាមេរិក-ចិន កំពុងដាក់សម្ពាធ​លើ​តម្លៃប្រេង។

លើសពីនេះ ក្នុងបរិបទដែល​អាមេរិកដាក់សម្ពាធឱ្យប្រទេសឥណ្ឌា​ឈប់ទិញ​ប្រេងរុស្ស៊ី ជំនួបរវាងលោកប្រធានាធិបតី​​អាមេរិក ដូណាល់ ត្រាំ និងសមភាគីរុស្ស៊ីលោក វ្ល៉ាឌីមៀរ ពូទីន ជុំវិញបញ្ហាអ៊ុយក្រែន កំពុង​បន្ថែមភាព​មិនប្រាកដប្រជាអំពីទស្សនវិស័យប្រេង។ ដំណោះស្រាយនៃជម្លោះអ៊ុយក្រែន មាន​ន័យថា ការរំខានផ្នែកផ្គត់ផ្គង់ប្រេងពីរុស្ស៊ីនឹង​ស្រាកស្រាន្ត ដែលធ្វើឱ្យការផ្គត់ផ្គង់ទៅទីផ្សារអន្តរជាតិ​កាន់ច្រើន៕