ក្រុងហូជីមិញស្នើការធានារ៉ាប់រងសុខភាព​ឥតគិតថ្លៃសម្រាប់សិស្ស និងមនុស្សចាស់

គណៈកម្មាធិការប្រជាមានិតទីក្រុងហូជីមិញនៃប្រទេសវៀតណាម បាន​ដាក់សំណើ​​ស្ដីពីការផ្ដល់ការ​ធានារ៉ាប់រងសុខភាពសម្រាប់សិស្សានុសិស្ស និងប្រជាជនដែល​មានអាយុលើស ៦៥ ឆ្នាំ ដោយត្រូវប្រើប្រាស់ថវិកាសរុប ២,១ ទ្រីលាន​ដុង (៨០ លាន​ដុល្លារ) ពីកញ្ចប់ថវិកាក្រុង និងរដ្ឋាភិបាលមជ្ឈិមវៀតណាម។ នេះបើតាមការចុះផ្សាយរបស់កាសែត Tuoi Tre កាលពីថ្ងៃសុក្រ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

គោលនយោបាយនេះ​រំពឹងថានឹងផ្តល់អត្ថប្រយោជន៍ដល់ប្រជាជនជាង ២,៧ លាន​នាក់​។ យោងតាមសំណើដែលបានដាក់ជូនគណៈកម្មាធិការអចិន្ត្រៃយ៍នៃក្រុមប្រឹក្សាប្រជាមានិតក្រុងកាលពីថ្ងៃព្រហស្បតិ៍ ​ក្រុងហូជីមិញមានគោលបំណងចេញសេចក្តីសម្រេចមួយក្រោមនីតិវិធីរហ័ស ដើម្បីផ្តល់ការគាំទ្រធានារ៉ាប់រងសុខភាព ១០០ ភាគរយ សម្រាប់ទាំងសិស្ស​ និងមនុស្សចាស់។ ​

ក្រោមផែនការនេះ ប្រជាពលរដ្ឋដែលមានអាយុពី ៦៥ ដល់ ៧៥ ឆ្នាំ ដែលមិន​​ស្ថិតនៅក្រោមគោលនយោបាយជំនួយណាមួយ នឹង​ទទួលបាន​ការធានារ៉ាប់រងរបស់ក្រុង។ សម្រាប់សិស្ស ពួកគេត្រូវមាន​ឈ្មោះក្នុងស្ថាប័នអប់រំណាមួយ​។ ​

ជាលម្អិត គោលនយោបាយនេះ​រំពឹងថានឹងគ្របដណ្តប់លើពលរដ្ឋវ័យចំណាស់ប្រហែល ៦៧៦ ០០០ នាក់ ​និងសិស្ស ២,០៣ លាននាក់ ដោយសរុបទាំងអស់ ២,៧ លាននាក់។ ​

សំណើរបស់គណៈកម្មាធិការប្រជាមានិត បានបញ្ជាក់ថា៖ «គោលនយោបាយដែលបានស្នើឡើងនេះ នឹងកាត់បន្ថយបន្ទុកហិរញ្ញវត្ថុនៃការព្យាបាលវេជ្ជសាស្រ្ត ធានាបាននូវសមភាពក្នុងការទទួលបានសុខុមាលភាពសង្គម និងពង្រឹងទំនុកចិត្តពីសាធារណជនលើអភិបាលកិច្ចមូលដ្ឋាន»។

រដ្ឋបាលក្រុងហូជីមិញ មានគម្រោងដាក់សេចក្តីសម្រេចនេះសម្រាប់ការអនុម័ត​ក្នុងសម័យប្រជុំលើកក្រោយរបស់ក្រុមប្រឹក្សាប្រជាមានិត​ក្រុងនៅឆ្នាំ ២០២៥។ ប្រសិនបើត្រូវបានអនុម័ត គោលនយោបាយនេះនឹងចូលជាធរមាន ១០ ថ្ងៃ បន្ទាប់​ពីនោះ។